މޯލްޑިވްސް އިސްލާމިކް ބޭންކު އެމްއައިބީގެ ގެ 4 ވަނަ ޑޮލަރު އޭޓީއެމްގެ ގޮތުގައި ހުޅުމާލޭގައި މުޅިން އަލަށް ޑޮލަރު އޭޓީމެއް ހުޅުވައިފިއެވެ.

މި އޭ ޓީއެމް ހުޅުވައި ދެއްވާފައި ވަނީ ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދުއެވެ.

މިއޭޓީމް އެމް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން  އެޗްޑީސީގެ މެނޭޖިންގ ޑިރެކްޓަރ ފަޒުލް    ވިދާޅުވީ ޑޮލަރު އޭޓީއެމް ހުޅުމާލޭ ފޭސް އެކެއްގައި ހުޅުވާފައިވާއިރު، ފޭސް ދޭއްގައި ވެސް އިތުރު ޑޮލަރު އޭޓީއެމްތަކެއް ގާއިމުވެގެން ދާނެ ކަމަށް އުންމީދުކުރައްވާ ކަމަށެވެ. އެމްއިބީން ރައްޔިތުންގެ ފައިދާއަށް ކުރައްވަމުން ގެންދަވާ މަސައްކަތްތަކަށް އެޗްޑީސީގެ ފުރިހަމަ އެއްބާރުލުން ލިބިގެންދާނެ ކަމަށްވެސް ފަޒުލް ވިދާޅުވިއެވެ.

މިއަދު މި ހުޅުވުނު ޑޮލަރު އޭޓީއެމްވެސް ބަހައްޓާފައިވަނީ ހުޅުމާލެ ވަން އެވެނިއު ތިރީގައި ހުންނަ އެ ބޭންކުގެ އޭޓީއެމް ބުރާންޗުގައެވެ. މިހާރުވެސް އެތަނުގައި ރުފިޔާ ނެނގޭ 2 އޭޓީއެމެއް ބަހައްޓާފައި ހުރެއެވެ.

މިއަދު ހުޅުމާލޭގައި މި ހުޅުވުނު ޑޮލަރު އޭޓީއެމް އާއި ގުޅޭގޮތުން މޯލްޑިވްސް އިސްލާމިކް ބޭންކު އެމްއައިބީ އިން ބުނެފައިވަނީ އެ އޭޓީއެމުން ޑޮލަރު ނެގުމާއި ޑޮލަރު ޖަމާކުރުމުގެ ޚިދުމަތްވެސް ލިބިގެން ދާނެ ކަމަށެވެ. އެގޮތުން އަމިއްލަ ފަރުދުންނަށާއި ވިޔަފާރި ތަކަށް ދުވާލަކަށް 1600 ޑޮލަރު ނެނގޭނެކަމަށާއި، އަދި މަހެއްގެ މައްޗަށް 10000 ޑޮލަރު ނެނގޭނެކަމަށެވެ. ހަމަ އެއާއި އެކު އަމިއްލަ ފަރުދުންނަށް ދުވާލެއްގެ މައްޗަށް 12000 ޑޮލަރު ޖަމާކުރެވޭނެ ކަމަށާއި، އަދި ވިޔަފާރިތަކަށް ދުވާލަކަށް 32000 ޑޮލަރު ޖަމާކުރެވޭނެ ކަމަށެވެ.

އެމްއަބީން ހުޅުމާލޭގައި މިއަދު ޑޮލަރު އޭޓީއެމް އެއް ހުޅުވި އިރު މާލޭގައި އެބޭންކުގެ އިތުރު 3 އޭޓީއެމެއް ބަހައްޓާފައި އެބަހުއްޓެވެ.