ރާއްޖޭގައި ފުރަތަމަ ފަހަރަށް މަލްޓިސްޓޯރީ "ފުޓްސަލް ކޮމްޕްލެކްސް" އަދި "ނެޓްބޯޅަ ކޮމްޕްލެކްސް"އެއް އެޅުމަށް ހުޅުމާލެ އިން 2 ބިން ކަނޑައަޅާފައިވާ ކަމަށް ރައީސް ޑރ.މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒުގެ ފުރަތަމަ ރިޔާސީ ބަޔާން އިއްވަމުން އެމަނިކުފާނު ވިދާޅުވީ ރާއްޖޭގެ ބިމުގެ ޖާގައަށް ބަލާއިރު، ފަންގިފިލާތަކަށް މަތިމައްޗަށް ހެދިފައިވާ ކުޅިވަރުކުޅޭ ތަންތަން ގާއިމްކުރަންޖެހޭ ކަމަށެވެ.
"މިގޮތުން ފުރަތަމަ ފަހަރަށް މަލްޓިސްޓޯރީ "ފުޓްސަލް ކޮމްޕްލެކްސް" އަދި "ނެޓްބޯޅަ ކޮމްޕްލެކްސް"އެއް އެޅުމަށް ހުޅުމާލެއިން 2 ބިން މިހާރުވަނީ ކަނޑައެޅިފައި."
ރައީސް ޑރ.މުއިއްޒު ވިދާޅުވިއެވެ.
ރައީސް ޑރ.މުއިއްޒު ވިދާޅުވީ މިއަހަރު ކުޅިވަރު އެސޯސިއޭޝަންތަކަށް ކުރިއެރުމާއި ހަރަކާތްތެރިކަން އަންނާނެ މަގުތައް ފަހިކޮށްދެއްވާނެ ކަމަށެވެ. އަދި ކުޅިވަރު މުބާރާތްތަކަށް ދިވެހި އެތުލީޓުންނާ ކުޅުންތެރީން ތަމްރީނުކުރުން ދުރު ރާސްތާގެ ދެމެހެއްޓެނިވި ކާމިޔާބީއަށް އަމާޒު ހިފައިގެން ފައްޓަވާދެއްވާނެ ކަމަށް ވެސް އެމަނިކުފާނު ވިދާޅުވިއެވެ.
މިގޮތުން ސަރުކާރުން ވަނީ އެކަމަށް ހާއްސަ ވުޒާރާއެއް އުފައްދައި މި ވުޒާރާގެ ދަށުން މި ދާއިރާއަށް ބޭނުންވާ ކަންކަން ހޯދައި އެކަންކަމަށް އެދެވިގެންވާ ހައްލެއް ހޯދައިދިނުމުގެ މަސައްކަތް ފަށާފައި ކަމަށް ރައީސް ގެ ރިޔާސީ ބަޔާނުގައި ފާހަގަކުރެއްވިއެވެ. މިގޮތުން މިއަހަރުގެ ޖެނުއަރީ މަހުގެ 15 ވަނަ ދުވަހު ޤައުމީ އަދި ބައިނަލްއަޤްވާމީ ކުޅިވަރު މުބާރާތްތައް ބާއްވާ ސްޓޭޑިއަމްތަކުގައި ހުރުން ލާޒިމް ޞިއްޙީ ޚިދުމަތްތަކާބެހޭ މިންގަނޑުތައް އެކުލަވާލުމުގެ ގޮތުން ދިވެހިރާއްޖޭގައި ރާވައި ހިންގާ ކުޅިވަރު މުބާރާތްތަކުގައި ފުރިހަމަކުރަންޖެހޭ "މިނިމަމް މެޑިކަލް ރިކުއަރމަންޓް" އާބެހޭ އުސޫލު ތައްޔާރުކޮށް މި ޚިދުމަތް ރާއްޖޭގައި އިފްތިތާހް ކޮށްފައިވާކަން ފާހަގަކުރައްވާ އެމަނިކުފާނު ވިދާޅުވީ މި ޚިދުމަތް އަތޮޅުތެރޭގައާއި މާލޭގައި ބޭއްވޭ ޤައުމީ އަދި ބައިނަލްއަޤުވާމީ މުބާރާތްތަކަށް ލިބިދޭނެ އިންތިޒާމް މި އަހަރުގެ ތެރޭގައި ހަމަޖެހިގެންދާނެ ކަމަށެވެ.
"މިނިމަމް މެޑިކަލް ރިކުއަރމަންޓް" ގެ ޚިދުމަތުގެ އިތުރުން، ގައުމީ ކުޅުންތެރިންގެ ފެންވަރު ރަނގަޅުކޮށް ކުރިއެރުވުމަށް ބޭނުންވާ "ހައި ޕާރފޯމަންސް ސެންޓަރ"ގެ މަސައްކަތް ފަށައި، ކުޅިވަރާއި ކަސްރަތުގެ މުހިންމުކަމާއި ގުޅޭގޮތުން ސްކޫލު ކުދިންނާއި އާންމު ރައްޔިތުން ހޭލުންތެރި ކުރުމަށް ރާއްޖޭގެ ހުރިހާ ރަށެއްގައި ޕްރޮގްރާމު ހިންގުމަށް ހަމަޖެހިފައިވާ ކަމަށް ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ސްޕޯޓްސް ނިއުޓްރިޝަން އަދި ކުޅިވަރުގެ ރިވެތި އަޚްލާޤާއި ގުޅޭގޮތުން ކުޅުންތެރިންނަށް މަޢުލޫމާތުދީ ހޭލުންތެރިކުރުމުގެ ޕްރޮގްރާމު ފެށުމަށް ވަނީ ހަމަޖެހިފައެވެ.
ރައީސް ޑރ.މުއިއްޒު ވަނީ ދިވެހި ޒުވާނުންގެ ޝައުޤު އިތުރުވަމުންދާ ކުޅިވަރުތައް ރާއްޖޭގައި ކުރިއަރުވަން ސަރުކާރުން މަސައްކަތް ފައްޓަވާނެ ކަމަށާއި މި ސަރުކާރުގައި ހުރިހާ ކަމަކުންވެސް ކުރިއަށް ދިއުމުގައި ދެޖިންސަށް ހަމަހަމަ ފުރުޞަތު އަބަދުވެސް އޮންނާނެ ކަމަށް ވިދާޅުވެފައެވެ.
"ހަމައެއާއެކު އަޅުގަނޑު ފާހަގަކުރަން. ދުނިޔެއަށް އަންނަ ބަދަލުތަކާއެކު، ދިވެހި ޒުވާނުންގެ ޝައުޤު އިތުރުވަމުންދާ، ރޭސިންގ، ސާރފިންގ، މޫދުކުޅިވަރު، އީ-ގޭމިން ފަދަ ކަންކަން ރާއްޖޭގައި ކުރިއަރުވާން ސަރުކާރުން އިރާދަކުރެއްވިއްޔާ މަސައްކަތް ފަށާނަން."
ރައީސް ޑރ.މުއިއްޒު ވިދާޅުވިއެވެ.
ހަމައެހެންމެ، ކުޅިވަރުގެ ބޮޑެތި ކްލަބްތައް މާލީ އަނދަވަޅުތަކުން ސަލާމަތްކޮށް، ކުރިއަރާނެ ގޮތްތައް ފަހިކޮށް، ކުޅުންތެރީންނަށް ތަމްރީނާ އާމުދަނީގެ ފުރުޞަތު އިތުރުކުރަން ޖެހޭ ކަމަށް ވެސް ވިދާޅުވެފައެވެ. އެމަނިކުފާނު ވަނީ މިހުރިހާ ކަމެއްގައި ވެސް ދިވެހި ހުރިހާ އެތުލީޓުންނާ ކުޅުންތެރީންގެ އަޑުއަހައިގެން، ކުޅިވަރު ކުރިއެރުވުމަށް ސަރުކާރުން ފުރިހަމަ އެއްބާރުލުން ދޭނެކަމުގެ ޔަގީންކަން އެމަނިކުފާނު ވަނީ އަރުވާފައެވެ.
Advertisement
This content is created and paid for by advertisers and does not involve Voice Journalists
