މާލެ ސިޓީގެ ލޭންޑް ޔޫސް ޕްލޭން ސަރުކާރުން ފާސްކޮށްދީފައިވާ ކަމަށް ރައީސް ޑރ.މުއިއްޒު ވިދާޅުވެއްޖެއެވެ.
މިއަދު އެމަނިކުފާނުގެ ރިޔާސީ ބަޔާން އިއްވަމުން ވިދާޅުވީ ހަދާ ނިމިފައި އޮތް މާލެ ސިޓީގެ ލޭންޑް ޔޫސް ޕްލޭން މި ސަރުކާރުން ވާނީ ފާސްކޮށްދީފައި ކަމަށާއި، ރަށްރަށުގެ ލޭންޑް ޔޫސް ޕްލޭން ފާސްކުރުމަށް ޚާއްސަ އެހީތެރިކަމެއް ދީގެން، ހުރިހާ ރަށެއްގެ ލޭންޑް ޔޫސް ޕްލޭން މިއަހަރު ނިމުމުގެ ކުރިން ހަދައިދެއްވާނެ ކަމަށެވެ.
"ރަށްރަށުގެ ލޭންޑް ޔޫސް ޕްލޭން ފާސްކުރުމަށް ޚާއްސަ އެހީތެރިކަމެއް ދީގެން، ހުރިހާ ރަށެއްގެ ލޭންޑް ޔޫސް ޕްލޭން މިއަހަރު ނިމުމުގެ ކުރިން އިރާދަކުރެއްވިއްޔާ ހަދައިދޭނަން. މީގެ އިތުރުން، ހަދާ ނިމިފައި އޮތް މާލެ ސިޓީގެ ލޭންޑް ޔޫސް ޕްލޭން މި ސަރުކާރުން ވާނީ ފާސްކޮށްދީފައިކަން ދަންނަވަން."
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވިދާޅުވީ ކައުންސިލްތަކަށް ކަންކަން ފަހިކޮށްދިނުމަށް ޚާއްޞަ ފުލްޓައިމް ވަޒީރަކު ހުންނަވާގޮތަށް ސަރުކާރު ހިންގުމަށް ގެނައި ބަދަލުގެ ހެޔޮ ނަތީޖާ މިހާރުވެސް ފެންނަމުންދާ ކަމަށެވެ.
މިގޮތުން ކައުންސިލްތަކަކީ ފުދުންތެރި، އަދި ތަރައްޤީގެ މަސައްކަތްތައް ކުރިޔަށް ގެންދެވޭފަދަ މާލީ ޤާބިލުކަން ހުރި ތަންތަނަށް ހައްދަވާނެ ކަމަށް އެމަނިކުފާނު ވިދާޅުވިއެވެ. މީގެ ތެރޭގައި ކައުންސިލްތަކުގެ އިޚްތިޞާޞްތެރޭގައި ހިމެނޭ ފަޅުރަށްތައް ނުވަތަ އިޚްތިޞާޞުން ބޭރުންނަމަވެސް، ފަޅުރަށްތައް ހަމަޖެއްސޭނެ ގޮތަށް ހެދިފައިވާކަމަށާއި އަތޮޅު ފިހާރަތަކުން ލިބޭ އާމްދަނީ އެ އަތޮޅެއްގެ އަތޮޅު ކައުންސިލާ ހަވާލުކުރުމުގެ ނިޒާމް ހަރުދަނާކުރުމަށް ނިންމަވާފައިވާ ކަން އެމަނިކުފާނު ވަނީ ފާހަގަކުރައްވާފައެވެ.
ރައީސް ޑރ.މުއިއްޒު ވަނީ ކައުންސިލްތަކުގެ އާމްދަނީ އިތުރުކޮށް ކައުންސިލްތައް ބާރުވެރިކުރުމަށް ސަރުކާރުން ކޮށްދެވޭން ހުރި ހުރިހާ މަސައްކަތެއް ކޮށްދެއްވުމަށް ތައްޔާރަށް ހުންނެވި ކަމަށް ވިދާޅުވެ، ސަރުކާރު ހިންގަން ބޭނުންފުޅު ވަނީ، ކައުންސިލްތަކާ ގުޅިގެން، މަޝްވަރާކޮށްގެން، އެއްބާރުލުންދީގެން ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
