ފަލަސްތީނުގައި މިނިވަން ދައުލަތެއް ބިނާކުރުމަށް ފުރުސަތު ނުދޭހާ ހިނދަކު އިސްރާއީލާއި އެކު ޚާރިޖީ ގުޅުމެއް ގާއިމު ނުކުރާނެ ކަމަށް ސައުދީ އަރަބިއާ އިން ބުނެފިއެވެ.

ސައުދީގެ ފޮރިން މިނިސްޓްރީން ނެރުނު މި ބަޔާނުގައި ބުނެފައި ވަނީ ފަލަސްތީނުގެ މިނިވަން ދައުލަތެއް ގާއިމް ނުވާހާ ހިނދަކު އިސްރާއީލާ އެކު ޚާރިޖީ ގުޅުމެއް ނޯންނާނެ ކަމަށް އެމެރިކާގެ ވޮޝިންޓަނަށް އަންގާފައިވާ ކަމަށެވެ. އަދި އިސްރާއީލުން ޣައްޒާއަށް ދެމުންގެންދާ ލާއިންސާނީ ހަމަލާތައް ހުއްޓާލައި، އިސްރާއީލުގެ ސިފައިން އަނބުރާ ގައުމަށް ގެންދިޔުމުން ނޫނީ އެއްވެސް ގުޅުމެއް ގާއިމު ނުކުރެވޭނެ ކަމަށް ވެސް ސައުދީން ވަނީ ބުނެފައެވެ.

އެ ބަޔާނުގައި އިތުރަށް ވަނީ ފަލަސްތީނުގެ ރައްޔިތުންނަށް އެމީހުންގެ ޙައްޤުތައް ހޯދައިދިނުމަށާއި، އިންސާފު ހޯދައިދީ، ސުލްހަ ގާއިމު ކުރުމަށް ފަލަސްތީނުގެ ދައުލަތް ބަލައިގަތުމަށް އދ.ގެ ސަލާމަތީ މަޖިލީހަށް ގޮވާލާފައެވެ. 

ސައުދީން މި ބަޔާން ނެރެފައިވަނީ ސައުދީ އަރަބިއްޔާ އާއި އިސްރާއީލުން ދެގައުމުގެ ދެމެދުގައި އޮތް ގުޅުމާއި މަޝްވަރާތައް ކުރިއަށް ގެންދަން ތައްޔާރަށް ތިބި ކަމުގެ "ޕޮޒިޓިވް ފީޑްބެކް" ލިބިފައިވާ ކަމަށް އެމެރިކާގެ ވައިޓް ހައުސްގެ ނެޝަނަލް ސެކިއުރިޓީގެ ތަރުޖަމާން ޖޯން ކާބީ ވިދާޅުވިތާ މާ ގިނަ އިރުތަކެއް ނުވަނީހެވެ.

މިދިޔަ ސެޕްޓެމްބަރު މަހު ސައުދީގެ ވަލީއަހުދު މުހައްމަދު ބިން ސަލްމާން ވަނީ ސައުދީއާއި އިސްރާއީލުގެ ގުޅުން އާންމު ހާލަތަށް އަންނަ ކަމަށް ވިދާޅުވެފަ އެވެ. ނަމަވެސް މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު އަނިޔާވެރި އިސްރާއީލުގެ އަސްކަރިއްޔާއިން ފަލަސްތީނުގެ ޣައްޒާއަށް ހަމަލާދޭން ފެށުމުން، ސައުދީ އަރަބިއްޔާއިން އިސްރާއީލާ އެކު ހަދަން ނިންމި އެއްބަސްވުން ވަނީ ހުއްޓާލާފައެވެ. އޭގެ ފަހުން ސައުދީގެ ދައުލަތުގެ އިސް ފަރާތްތަކުން ވަނީ އިސްރާއީލާއި އެކު އެއްވެސް އެއްބަސްވުމަކާއި އެކު ކުރިއަށް ދިއުމުގެ ކުރިން އިސްރާއީލުން ފަލަސްތީނުގައި ސުލްހަ ގާއިމްކޮށް ފަލަސްތީނުގެ ރައްޔިތުންގެ ހައްގުތައް ކަށަވަރު ކުރުމަށް ގޮވާލާފައެވެ.

ބޭރުގެ ނޫސްތަކުން ރިޕޯޓްކުރާ ގޮތުގައި އިސްރާއީލުން އަންނަނީ ސައުދީގެ މި ޝަރުތުތަކާއި ދެކޮޅު ހަދަމުންނެވެ. އެހެންކަމުން އެ ދެ ގައުމުގެ މެދުގައި ގުޅުން ގާއިމުކުރުމުގެ ފުރުސަތު ހަނި ކަމަށް ކަމާބެހޭ ފަރާތްތަކުން އަންނަނީ ބުނަމުންނެވެ.

އިސްރާއީލުން ފަލަސްތީނަށް ދޭން ފެށި ލާއިންސާނީ ހަމަލާތަކުގައި މިހާތަނަށް 27،585 އަށް ވުރެ ގިނަ ރައްޔިތުން ވަނީ ޝަހީދުވެފައެވެ. އޭގެ ތެރޭގައި އެންމެ ގިނައީ އަންހެނުންނާއި ކުޑަކުދިންކަން ފާހަގަކޮށްލަން ޖެހެއެވެ.