އެމެރިކާގެ ސެންޑީއެގޯއިން ލަސް ވޭގަސް އަށް, އެ ގައުމުގެ ކަނޑުގެ ސިފައިންގެ ފަސް މީހުންނާއެކު ދަތުރުކުރި ހެލިކޮޕްޓަރެއް ގެއްލިއްޖެ އެވެ.

އިއްޔެގެ ވަގުތެއްގައި މި ހެލިކޮޕްޓަރުގެ ޚަބަރެއް ނުވެ ގެއްލިފައިވާއިރު، ހެލިކޮޕްޓަރާއި އޭގައި ތިބި މީހުން ހޯދުމުގެ މަސައްކަތް ބިމުންނާއި މަތިންވެސް އެމެރިކާގެ އެއާފޯހުން ކުރަމުން އަންނަ ކަމަށް ބީބީސީއިން ބުނެއެވެ. ނަމަވެސް އަދި މިހާތަނަށް ހެލިކޮޕްޓަރުގެ އަދި އޭގެން ދަތުރުކުރި ސިފައިންގެ އެއްވެސް ހަބަރެއް ނުވާކަމަށް ރިޕޯޓު ކޮށްފައިވެއެވެ. 

ހެލިކޮޕްޓަރު ގެއްލުނު ސަރަހައްދަށް ސްނޯވ އާއި ދުންފިނީގެ އަސަރުގެ އިތުރުން ވާރޭވެސް ވެހެފައިވާތީ ސިފައިން ހޯދުމުގެ މަސައްކަތަށް ހުރަސް އެޅެމުންދާ ކަމަށް އޮފިޝަލުންނާއި ހަވާލާދީ ބީބީސީން ބުނެފައިވެއެވެ. އަދި އެއީ ފަރުބަދަމަތީ ސަރަހައްދަކަށް ކަމުން ރެސްކިއު ޓީމުތަކަށް ގިނަ ދަތިތަކަކާއި ކުރިމަތިލާންޖެހިފައިވާ ކަމަށް އޮފިޝަލުން ބުނެއެވެ.

Advertisement

އެމެރިކާގެ ނޭވީން ވަނީ އެ ހެލިކޮޕްޓަރަކީ ގިނަ އަދަދެއްގެ ސިފައިންނާއި އާލާތްތައް އުފުލުމުގެ ގާބިލުކަން ލިބިފައިވާ ވަރުގަދަ ހެލިކޮޕްޓަރެއްކަމަށް ބުނެފައެވެ. އެގޮތުން އެ ހެލިކޮޕްޓަރުގައި 16 ޓަނުގެ ކާގޯ އުފުލުމުގެ ގާބިލުކަން ހުންނާނެ ކަމަށްވެސް އޮފިޝަލުން ފާހަގަކޮށްފައިވެއެވެ. 

ހަމަ އެހެންމެ، ފަސިންޖަރުން އުފުލާ ނަމަ އެއްފަހަރާ 36 ފަސިންޖަރުންނަށް ވެސް އޭގައި ދަތުރުކުރެވޭނެ ކަމަށްވެސް ބުނެފައިވެއެވެ. 

މީގެ ކުރިންވެސް މި ހެލިކޮޕްޓަރު ގެއްލުނު ކެލިފޯނިޔާ ފަރުބަދަ ތަކާއި ދިމާއިން މިފަދަ ހާދިސާތައް ހިނގާފައި ވެއެވެ. އެގޮތުން މީގެ ކުރިންވެސް އެ ސަރަހައްދުގައި ފަރުބަދައިގައި ޖެހި އެކްސިޑެންޓް ހިނގައި ހެލިކޮޕްޓަރާއި، އޭގެން ދަތުރު ކުރި މީހުން މަރުވެފައި ވެއެވެ.

ނަމަވެސް މި ފަހަރުގެ ހާދިސާގައި ސިފައިން މަރުވެފައިވާ ކަމެއް ނުވަތަ ނުވާ ކަމެއްވެސް އަދި އެނގިފައިނުވެއެވެ.