ރައްޔިތުންގެ މަޖިލީހުގެ އިންތިހާބު ކުރިއަށް އޮތް ރޯދަ މަހުގެ ފަހުން ބާއްވާނަމަ، އިންތިހާބުގައި ވޯޓު ލުމަށް ރީރަޖިސްޓްރީ ކުރުމަށް އިތުރު ފުރުސަތެއް ދޭނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.

އިލެކްޝަން ކޮމިޝަނުން މަޖިލިސް އިންތިހާބު ބާއްވާނެ ކަމަށް އިއުލާން ކޮށްފައިވާ ތާރީހަކީ މި އަހަރުގެ މާޗު މަހުގެ 17 ވަނަ ދުވަހެވެ. ނަމަވެސް އިންތިހާބު ރޯދަ މަހާއި ދިމާވާތީ، އެމްޑީޕީން ރޯދައިގެ ފަހުން އިންތިހާބު ބޭއްވުމަށް އެދި ހުށައެޅި އިސްލާހު މަޖިލީހުގެ ކޮމިޓީން ވަނީ ފާސްކޮށްފައެވެ. އެ އިސްލާހުގައިވާ ގޮތުން އިންތިހާބު ބޭއްވޭނީ ރޯދަ މަސް ނިމި، 10 ދުވަސް ފަހުންނެވެ. 

އިލެކްޝަން ކޮމިޝަނުން މަޖިލިސް އިންތިހާބަށް ވޯޓު ލުމަށް ރީރަޖިސްޓަރ ކުރުމަށް ހުޅުވާލީ މިމަހުގެ 1 ވަނަ ދުވަހުއެވެ. މި މަހުގެ 7 ވަނަ ދުވަހު މި މުއްދަތު ހަމަވިއިރު، ރީރަޖިސްޓަރީ ކުރުމަށް 13,378 މީހުން ވަނީ ހުށައަޅާފައެވެ. އޭގެތެރެއިން 11,919 މީހުން ރީރަޖިސްޓަރީ ކޮށްދިން އިރު، 1,459 ހުށަހެޅުމެއް އީސީން ބަލައިގަނެފައެއް ނުވެއެވެ.

މި މުއްދަތުގެ ތެރޭގައި ރާއްޖޭން ބޭރުގައި ވޯޓު ލުމަށް ރީރަޖިސްޓަރީ ކުރުމަށް ކަނޑައަޅާފައިވާ ޢަދަދު ހަމަވެފައިވަނީ ހަމައެކަނި މެލޭޝިޔާ އާއި ސްރީލަންކާ ގައި ކަން ވެސް އީސީން ވަނީ ފާހަގަކޮށްފައެވެ.

އީސީ އިން ވަނީ މަޖިލިސް އިންތިހާބުގައި ބަހައްޓާ ވޯޓުފޮށީގެ ނަންބަރާއި، ވޯޓުފޮށީގެ ކޯޑާއި، ވޯޓުލާ ސަރަހައްދާއި، ވޯޓުފޮށި ބަހައްޓާ ރަށާއި ތަނުގެ މައުލޫމާތު މިހާރު އާންމުކޮށްފައެވެ. ވޯޓް ލާން ޖެހެނީ ކޮން ފޮއްޓަކަށްތޯ ޔަގީން ކުރުމަށް އިލެކްޝަންސް ކޮމިޝަންގެ ހޮޓްލައިން 1414 ން އަށް ގުޅުމުންވެސް ނުވަތަ މެސެޖް ކޮށްލުމުންވެސް މައުލޫމާތު ސާފުވެގެން ދާނެ ކަމަށް އީސީ އިން ބުނެއެވެ.