ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިޙާބު ބާއްވާ ތާރީޚަށް ބަދަލެއް އަޔަސް، އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ދެން އިތުރު މުއްދަތެއް ނުދޭނެ ކަމަށް އެކޮމިޝަނުން ވިދާޅުވެއްޖެއެވެ.
އީސީން މިފަދައިން ވިދާޅުވެފައި ވަނީ އެކޮމިޝަންގެ ނައިބުރައީސް އަލްފާޟިލް އިސްމާއިލް ހަބީބު އެކްސް މެދުވެރިކޮށް ކުރެއްވި ޕޯސްޓެއްގައެވެ.
ހަބީބުގެ ޕޯސްޓުގައި ވިދާޅުވެފައިވަނީ ރައްޔިތުންގެ މަޖިލީހުގެ އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ޢާންމުކޮށް އިޢުލާން ކުރިތާ މިވީ 12 ދުވަސް ކަމަށާއި، އަދި އިންތިޚާބަށް ކުރިމަތިލުމަށް ބާކީ ދެން އޮތީ 4 ދުވަސް ކަމަށެވެ.
އިންތިހާބުގެ ތާރީޚަށް ބަދަލެއް އަޔަސް، އިންތިޚާބަށް ކުރިމަތިލުމަށް އިލެކްޝަންސް ކޮމިޝަނުން ދެން އިތުރު މުއްދަތެއް ނުދޭނެކަމަށްވެސް ހަބީބުވިދާޅުވިއެވެ.
ހަބީބު އިތުރަށް ވިދާޅުވެފައި ވަނީ ފޯމު ބަލައިގަތުމުގެ އެންމެ ފަހު ތާރީޚަކީ ފެބުރުއަރީ 14 ވާ ބުދަ ދުވަހުގެ މެންދުރު ފަހު 2:00 ކަމަށާއި، އަދި ހޮނިހިރު ދުވަހާއި، ރަސްމީ ދުވަސްތަކުގައި ފޯމު ބަލައިގަތުމަށް ހަމަޖެހިފައިވަނީ ހެނދުނު 9:00 ން މެންދުރުފަހު 14:00 އަށް ދަރުބާރުގޭގެ ރަންނަބަނޑޭރި މާލަމުގައި ކަމަށެވެ. ހަބީބުގެ ޕޯސްޓުގައި ފާހަގަ ކުރެއްވި ގޮތުގައި މިހާތަނަށް އީސީއަށް ލިބިފައިވަނީ 18 އެޕްލިކޭޝަން ފޯމެވެ.
"މިހާތަނަށް އީސީއަށް ލިބިފައިވަނީ 18 އެޕްލިކޭޝަން ފޯމު. އިއްޔެ ލިބުނީ ޕީއެންސީ ގެ ފަރާތުން ވާދަކުރައްވާ ކެންޑިޑޭޓަކާއި، އަމިއްލަ 2 ފަރާތަކުން ހުށަހެޅުއްވި 2 ފޯމު. މި 3 ހުށަހެޅުން ވެސް އީސީން ވަނީ ގަބޫލު ކޮށްފައި."
ތަފްސީލް ދެއްވަމުން ހަބީބު ވިދާޅުވެފައިވެއެވެ.
އީސީގެ ނައިބު ރައީސް ހަބީބުގެ މި ޕޯސްޓުގައި ވަނީ އަމިއްލަގޮތުން އިންތިހާބުގައި ވާދަކުރައްވާ ފަރާތްތަކުން އެ ވާދަކުރައްވާ ދާއިރާއެއްގެ މަދުވެގެން 50 މީހުންގެ ސޮޔާއި، ވާދަކުރައްވާ ފަރާތުގެ ދެފުށް ފެންނަ ސާފް އައިޑީ ކާޑުގެ ކޮޕީއެއް ހުށައަޅަން ޖެހޭނެކަމަށާއި، އަދި ދަރަނި އަދާކުރަމުންދާ ފަރާތެއް ނަމަ އެކަމުގެ ތަފްސީލްވެސް ހުށަހަޅަން ޖެހޭނެކަން ހަނދާން ކޮށްދެއްވާފައެވެ. އެކައުންޓް ހުޅުވުމުގައި، ދިމާވި ދަތިތައް ޙައްލުކުރުމަށް އެމްއެމްއޭ އިން ވަނީ ބޭންކުތަކުގައި ދަންނަވާފައި ކަމަށްވެސް ހަބީބުގެ ޕޯސްޓުގައި ފާހަގަކުރައްވާފައިވެއެވެ.
ހަބީބުގެ ޕޯސްޓް ނިންމަވާލައްވާފައި ވަނީ އިންތިހާބުގައި ބައިވެރިވާން ބޭނުންވާ ފަރާތްތަކުން އެންމެފަހުގަތަށް މަޑު ނުކުރެއްވުމަށް އެދިލައްވަމުންނެވެ.
"އެންމެ ފަހު ވަގުތުގައި ފޯމު ލައްވަން މަޑުކުރައްވައިފިނަމަ، ފަހަރެއްގައި ފޯމުގެ މައްސަލައެއް ދިމާވެގެން ފޯމު އިސްލާޙް ކުރަން ޖެހިއްޖެ ހިނދެއްގައި، ފޯމު އިސްލާޙް ކުރުމުގެ ފުރުޞަތު ލިބިވަޑައި ނުގެންފާނެ."
އީސީގެ ނައިބު ރައީސް ހަބީބު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
