އެމެރިކާ އާއި އިނގިރޭސިވިލާތުން ފަލަސްތީނަކީ މިނިވަން ދައުލަތެއް ގޮތަށް ބަލައިގަންނާނެ ކަމުގެ އިޝާރާތްތަކެއް ދީފިއެވެ.

ފެބްރުއަރީ 1 ވަނަ ދުވަހު ލުބުނާނަށް ކުރެއްވި ދަތުރުފުޅުގައި އިނގިރޭސިވިލާތުގެ ފޮރިން ސެކްރެޓަރީ ޑޭވިޑް ކެމަރަން ވިދާޅުވީ  ފަލަސްތީނުގެ ރައްޔިތުންނަށް މިނިވަން ދައުލަތެއް ބިނާ ކުރުމަށް ފުރުސަތު ދިނުމަކީ އެ ސަރަހައްދުގެ ސުލްހައާއި ސަލާމަތަށް  މުހިންމު ކަމެއް ކަމަށެވެ. 

މީގެ އިތުރުން އެމެރިކާގެ މީޑިއާ ސައިޓް އެކްސިއޯސް އަށް މައުލޫމާތު ދެއްވަމުން، އެމެރިކާގެ ސެކްރެޓަރީ އޮފް ސްޓޭޓް އެންޓޯނީ ބްލިންކެން ވިދާޅުވީ އެމެރިކާ އިން ފަލަސްތީނަކީ މިނިވަން ދައުލަތެއް ގޮތުގައި ބަލައިގަނެވޭނެ ގޮތްތައް މުރާޖައާ ކުރުމަށް އެގައުމުގެ ސްޓޭޓް ޑިޕާޓްމަންޓަށް ހަވާލުކޮށްފައިވާ ކަމަށެވެ. ބްލިންކެން މިފަދައިން ވިދާޅުވެފައިވާއިރު، މީގެ ކުރިން ފަލަސްތީނުގައި މިނިވަން ދައުލަތެއް ބިނާކުރުމާއި މެދު އެމެރިކާގެ ވިސްނުމުގައި އޮތީ އެއީ އިސްރާއީލާއި ފަލަސްތީނާއި ދެމެދު މަޝްވަރާ ކުރަންޖެހޭ ކަމެއްގެ ގޮތުގައެވެ.

ފަލަސްތީނުގައި ހިނގަމުންދާ އަނިޔާވެރި ހަނގުރާމަ އާއި ގުޅޭ ގޮތުން ބޭއްވުނު ބައްދަލުވުމެއްގައި އދ ގެ 193 މެމްބަރުންގެ ތެރެއިން 139 މެމްބަރުން، ފަލަސްތީނަކީ މިނިވަން ދައުލަތެއްގެ ގޮތުގައި ވަނީ ބަލައިގެންފައެވެ. ނަމަވެސް އޭރު އެ ބައްދަލުވުމުގައި އެމެރިކާ އާއި، އިނގިރޭސިވިލާތާއި، ޖަރުމަނާއި، އިޓަލީ އަދި ފްރާންސް ފަދަ ބައެއް ގައުމު ތަކުން މި ކަން ބަލައެއް ނުގަނެއެވެ.

އިނގިރޭސިވިލާތާއި އެމެރިކާއިން މިފަދަ އިޝާރާތްތަކެއް ދީފައިވާއިރު، ސައުދީ އަރަބިއާއިން ވަނީ ފަލަސްތީނުގައި މިނިވަން ދައުލަތެއް ބިނާކުރުމަށް ފުރުސަތު ނުދޭހާ ހިނދަކު އިސްރާއީލާއި އެކު ޚާރިޖީ ގުޅުމެއް ގާއިމު ނުކުރާނެ ކަމަށް ބުނެފައެވެ.