ހަންގޭރީގެ ރައީސް ކަޓަލިން ނޮވަކް މަގާމުން އިސްތިއުފާ ދެއްވައިފިއެވެ.

ރައީސްގެ މަގާމުން އިސްތިއުފާ ދެއްވިކަން ކަޓަލިން އިއުލާން ކުރައްވާފައި ވަނީ އިއްޔެގެ ވަގުތެއްގައި ހަންގޭރީގެ ގައުމީ ޓީވީ މެދުވެރިކޮށެވެ.

އެކަމަނާ އިސްތިއުފާ ދެއްވައިފައިވަނީ ފިރިހެނަކު ކުޑަ ކުއްޖަކަށް ޖިންސީ ގޯނާ ކުރި މައްސަލައެއް ފޮރުވައި، ކުށްވެރިވި މީހާއަށް މައާފު ދިން ކަމަށް ބުނާ މައްސަލައެއް ފެންމަތިވެ، އާންމުންގެ ޕްރެޝަރާ ކުރިމަތިވެގެން ކަމަށް އަލްޖަޒީރާ ގައި ބުނެފައި ވެއެވެ. 

އިސްތިއުފާ ދެއްވަމުން ކަޓަލިން ވަނީ އޭނާއަށް ހެދުނީ ގޯހެއް ކަމަށް ގަބޫލުކުރާ ކަމަށް ވިދާޅުވެފައެވެ.

"އަޅުގަނޑަށް ހެދުނީ ގޯހެއް. މިއަދަކީ ރައީސުލްޖުމްހޫރިއްޔާގެ ހައިސިއްޔަތުން ތިޔަބޭފުޅުންނާ އަޅުގަނޑު މުހާތަބުކުރައްވާ އެންމެ ފަހު ދުވަސް،" 

"މިދިޔަ އޭޕްރިލް މަހުގައި އަހަރެން އެ ފިރިހެން މީހާއަށް މަޢާފު ދިނީ އޭނާގެ ބެލުމުގެ ދަށުގައި ތިބި ކުދިންނަށް ޖިންސީ ގޯނާ ނުކުރާ ކަމަށް ގަބޫލު ކޮށްގެން. މާ ބޮޑަށް ސުވާލު އުފެއްދުމެއް ނެތި އެކަން ކޮށް އެފަދަ ކަން ކަމަށް ހިތްވަރު ދެވުނު ކަމީ އަހަރެންނަށް ހެދުނު ގޯހެއް" ދަޢުލަތުގެ މީޑިއާ މެދުވެރިކޮށް އިސްތިޢުފާ އިއުލާން ކުރައްވަމުން ކަޓަލިން ވިދާޅުވިއެވެ.

ޖިންސީ ގޯނާގެ މައްސަލަ ފޮރުވަން ކަޓަލިން އެހީތެރިވެދިން ކަމަށް ބުނެ މިދިޔަ ހުކުރު ދުވަހު 1،000 އަށްވުރެ މީހުން ވަނީ މަގުތަކަށް ނުކުމެ އޭނާގެ އިސްތިއުފާއަށް ގޮވައިލައިފައެވެ.

ބައެއް މީޑިއާ ރިޕޯޓްތައް ބުނާގޮތުން ކަޓަލިން އެހީވެދީފައި ވަނީ ސަރުކާރުގައި ހިމެނޭ އިސް މީހެއްގެ ދަރިފުޅު ކޮށްފައިވާ ކުށެއް ފޮރުވުމަށެވެ.

އުމުރުން 46 ގެ ކަޓަލިން ހަންގޭރީގެ ރައީސްގެ މަގާމާ ހަވާލުވެވަޑައިގެންނެވީ 2022 ވަނަ އަހަރުގެ މެއި 10 ވަނަ ދުވަހުއެވެ. ރައީސްކަމާ ހަލާވުވަޑައިގެންނެވުމުގެ ކުރިން ކަޓަލިން ހުންނެވީ ކޮންޒަވޭޓިވް ބޮޑުވަޒީރު ވިކްޓާ އޯރްބާންގެ އާއިލާއާ ބެހޭ ވަޒީރުގެ މަގާމުގައެވެ. ކަޓަލިން އަކީ ބޮޑުވަޒީރު ވިކްޓާ އާއި ގާތް ގުޅުމެއް އޮންނަ އޭނާއާ ވަފާތެރި ބޭފުޅެކެވެ.