ސުޕްރީމް ކޯޓުން ނެރުނު ވަގުތީ އަމުރާއި ޚިލާފަށް ރައްޔިތުންގެ މަޖިލީހުގެ ޖުމުލަ މެންބަރުން ގުނާއިރު، މަޖިލިހުން ވަކިވެފައި ތިބި މެންބަރުން ނުގުނާގޮތަށް ގަވާއިދަށް ގެނައި އިސްލާހަށް އަމަލުކުރަން މަޖިލީހުން މިއަދު ނިންމައިފިއެވެ.
ސުޕްރީމް ކޯޓުގެ މި އަމުރާއި މެދު މަޖިލީހުގެ ރައީސް ވަނީ، މި މައްސަލައިގައި އަމަލުކުރާނެ ގޮތެއް ކަނޑައެޅުމަށް މެންބަރުންނަށް އެއް ގަޑިއިރުގެ ފުރުސަތެއް ހުޅުވާލައިފައެވެ. އެއަށްފަހު މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ހުށަހެޅި ހުށަހެޅުމެއްގެ ގޮތުގައި ވޯޓެއް ނަގާފައިވެ އެވެ. އެ ވޯޓުން ފާސްވެފައިވަނީ މަޖިލީހުން ނިންމި ގޮތަށް މެންބަރުން އުނި ކުރުމަށްފަހު މެންބަރުންގެ އަދަދު ގުނުމަށެވެ.
މި ހުށަހެޅުން މަޖިލީހުގެ ތަޅުމުން ފާސްކޮށްފައިވަނީ 45 މެންބަރުންގެ ތާއީދާ އެކު އެވެ.
"މި ވަގުތުން ފެށިގެން އަނެއްކާ ވެސް އަޅުގަނޑު، ވޯޓު ގުނުމަގަޔާއި ކޯރަމް ހަމަކުރުމުގައި މަޖިލީހުގެ ޖުމުލަ މެންބަރުންގެ އަދަދަކީ 80 ކަމުގައި ބަލައިގެން ކުރިއަށްދާނީ. އެ ނޫން ގޮތަކަށް މަޖިލީހުން ކަނޑަނާޅައިހާ ހިނދަކު"
އަސްލަމް ވިދާޅުވިއެވެ.
މި ގޮތަށް މަޖިލީހުން ފާސްކުރި ނަމަވެސް މަޖިލީސް ފައްޓަވަމުން އަސްލަމް ވިދާޅުވީ ކޯޓުގެ އަމުރަށް އިހުތިރާމް ކުރުމުގެ ގޮތުން، މި ވަގުތަށް މަޖިލީހުން ވަކި ގޮތެއް ކަނޑަނާޅާހާ ހިނދަކު، މަޖިލީހުގެ މެމްބަރުންގެ ޖުމްލަ އަދަދަކީ 87 ކަމުގައި ބަލައިގެން ޖަލްސާ ކުރިއަށް ގެންދާނެ ކަމުގައި ވިދާޅުވެފައެވެ.
އަސްލަމް ވަނީ މި އަމުރާއި ދޭތެރޭ ކަންބޮޑުވުން ފާޅުކުރައްވާ، ސުޕްރީމް ކޯޓަށް ހުށައެޅިފައިވާ މައްސަލައަކީ ދުސްތޫރީ ބަހުސެއް އުފެދޭ މައްސަލައެއް ކަމަށާއި ސިޔާސީ ސުވާލެއްގެ މައްޗަށް ބިނާވާ ނިންމުންތަކަކީ އެކަންކަމުގެ މައްޗަށް ކޯޓުގެ އިހުތިސާސް ނުހިނގާ ކަންކަން ކަމަށް ވިދާޅުވެފައެވެ.
މީގެ އިތުރުންވެސް އަސްލަމް ވިދާޅުވީ ގާނޫނު އަސާސީގެ ތަރަހައިގެ ތެރޭގައި މަޖިލީހުން ކުރާ ކޮންމެ މަސައްކަތަކީ މަޖިލީހާއި މަޖިލީހުގެ އިމްތިޔާޒުތަކާއި، މަޖިލީހުގެ ބާރުތަކާއި ގާނޫނު އަސާސީން މަޖިލީހަށް މަތި ކުރެވިފައިވާ ބާރެއް ކަމަށެވެ. އެހެންކަމުން ވަކި ފަރާތަކުން މަޖިލީހުން ކަންތައްތައް ކުރަންޖެހޭ ގޮތް ބުނެދިނުން ބަލައިގަތުން ދަތިކަމަށް އަސްލަމް ވިދާޅުވިއެވެ.
ބަންޑާރަ ނައިބު އޮފީހުން ހުށައެޅި މި މައްސަލައިގައި، މި މަހުގެ 8 ވަނަ ދުވަހު ސުޕްރީމް ކޯޓުން މަޖިލީހަށް ކުރި އަމުރުގައި ސުޕްރީމް ކޯޓުން ގޮތެއް ކަނޑައަޅަންދެން ފެށުނީއްސުރެ މަޖިލީހުން އަމަލުުރަމުންދިޔަ ގޮތް ދެމި އޮންނަންޖެހޭ ކަމަށް ދެކޭ ކަމަށާއި، މިއީ އާންމު މަސްލަހަތު ދެމެހެއްޓުމަށްޓަކައި ވަގުތީ އަމުރެއް ނެރެންޖެހޭ ހާލަތެއްކަމަށް ވަނީ ބަޔާންކޮށްފައެވެ.
ސުޕްރީމް ކޯޓުން މި އަމުރު ނެރެފައިވަނީ މައްސަލަ ބެއްލެވި ވި ފަސް ފަނޑިޔާރުންގެ އިއްތިފާގުންނެވެ.
Advertisement
This content is created and paid for by advertisers and does not involve Voice Journalists
