ނިމިދިޔަ ސަރުކާރު ނިމިގެން ދިޔައިރުވެސް 25 ރުފިޔާގެ އަގުގައި މަސްވެރިންނަށް އެއްވެސް ވަރަކަށް ފައިސާ ދީފައިނުވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ކުރީ ސަރުކާރުން މަސް ގަންނަ އަގު 17 ރުފިޔާއިން 25 ރުފިޔާއަށް ބަދަލު ކުރިކަން ފާހަގަކުރައްވާ ވަޒީރު ޝިޔާމް މިފަދައިން ވިދާޅުވީ ރައްޔިތުންގެ މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. 

މީގެ އިތުރުންވެސް ވަޒީރު ވިދާޅުވީ ކުރީ ސަރުކާރުން ރިޔާސީ އިންތިޚާބުގެ ދެވަނަ ބުރުގެ ކުރިން މަސް ގަންނަ އަގު 25 ރުފިޔާއަށް ބޮޑުކޮށްފައިވަނީ އެއްވެސް ދިރާސާއެއް ކުރުމެއް ނެތި ސިޔާސީ ފައިދާއެއް ހޯދުމުގެ ބޭނުމުގައި ކަމަށާއި، އޭގެ ސަބަބުން ދައުލަތަށް ބޮޑު ބުރައެއް އުފުލަން ޖެހިފައިވާ ކަމަށެވެ. މިގޮތުން މިދިޔަ އަހަރުގެ ބަޖެޓުގައި ސަބްސިޑީގެ ގޮތުގައި 250 މިލިއަން ރުފިޔާ ހޭދަކުރުމަށް ކަނޑައަޅާފައި އޮތް ނަމަވެސް މަހުގެ އަގަށް ގެނައި ބަދަލާއެކު އެ އަދަދު 500 މިލިއަން ރުފިޔާއަށް އިތުރުވެގެންދިޔަކަން އެބޭފުޅާ ފާހަގަކުރެއްވިއެވެ.

ޝިޔާމްގެ ވާހަކަފުޅުގައި މި ސަރުކާރުން މަސްގަންނަ އަގު 25 އިން 20 އަށް ކުޑަކުރިކަން ފާހަގަކުރައްވަމުން ވިދާޅުވީ މިއީ މަސްވެރިން މިއަދު ތިބި ހާލަތު ބަދަލު ކުރުމަށް ގެނެވުނު ބަދަލެއް ކަމަށެވެ. އަދި ދައުލަތަށް ކެތްވާ އަގެއްގައި މަސް ގަންނަ ޖެހޭ ކަމަށް މަސްވެރިން ވެސް ގަބޫލުކުރާކަމަށާއި، މަސްވެރިންނަށް ނުދެވޭ އަގެއްގައި މަސް ގަނެގެން މަސްވެރިން ނިކަމެތި ކުރުމުގެ ވިސްނުމެއް ސަރުކާރުގެ ނެތް ކަމަށް ޝިޔާމް ވިދާޅުވިއެވެ. އަދި މިފަދައިން އަގަށް ބަދަލު ގެނެސްގެން މަސްވެރިންނަށް ފައިސާ ދެވޭނެ ކަމުގެ ޔަގީން ކަން ޝިޔާމް ވަނީ އަރުވާފައެވެ.

ޝިޔާމް އިތުރަށް ވިދާޅުވީ ރައީސް ޑރ.މުހައްމަދު މުއިއްޒު ވެރިކަމާއި ހަވާލުވެވަޑައިގެންނެވިއިރު، މަސްވެރިންނަށް ދޭންޖެހޭ 250 މިލިއަން ރުފިޔާ ނުދީ ހުރި ކަމަށާއި، އެ ބެކްލޮގް ފިލުވުމުގެ މަސައްކަތް ކުރައްވަމުން ގެންދަވާ ކަމަށެވެ. އެގޮތުން، ކުރެވުނު މަސައްކަތްތަކުގެ ތެރެއިން މިހާތަނަށް މަސްވެރިންނަށް 422 މިލިއަން ރުފިޔާ ދޫކުރެވިފައިވާ ކަމަށާއި، ބާކީ 270 މިލިއަން ރުފިޔާ ދޫނުކޮށް ހުރި ކަން ޝިޔާމް ފާހަގަކުރެއްވިއެވެ.

މަސްވެރިން ބޭނުންވަނީ އެ ފަރާތްތަކުން ކިރާ މަހުގެ ފައިސާ ވަގުތުން ވަގުތަށް ލިބޭނެ އިންތިޒާމެއް ކަމަށާއި، ރައީސް ޑރ.މުއިއްޒު ވަޢުދުވެ ވަޑައިގެންނެވި ފަދައިން 48 ގަޑިއިރު ތެރޭ އެ ފައިސާ މަސްވެރިންނަށް ލިބޭނެ ގޮތް ހެދުމަށް މަސައްކަތް ކުރައްވަމުންދާ ކަމަށް ވެސް ޝިޔާމް ވިދާޅުވިއެވެ.