މަސް ގަންނަ އަަގު 25 ރުފިޔާ އިން 20 ރުފިޔާ އަށް ދަށްކުރީ، މަސްވެރިންނާއި މިފްކޯ ސަލާމަތުން ބޭއްވުމަށްޓަކައި ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ. 

ވަޒީރު ޝިޔާމް މިފަދައިން ވިދާޅުވީ ރައްޔިތުންގެ މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.

މަސްގަންނަ އަގު މިހާރު 25 އިން 20 އަށް ދަށް ކޮށްފައިވާކަން ފާހަގަކުރައްވަމުން ޝިޔާމް ވިދާޅުވީ މި ބަދަލަކީ މަސްވެރިން މިއަދު ތިބި ހާލަތު ބަދަލު ކުރުމަށް ގެނެވުނު ބަދަލެއް ކަމަށެވެ. އަދި ދައުލަތަށް ކެތްވާ އަގެއްގައި މަސް ގަންނަ ޖެހޭ ކަމަށް މަސްވެރިން ވެސް ގަބޫލުކުރާ ކަމަށާއި މަސްވެރިންނަށް ނުދެވޭ އަގެއްގައި މަސް ގަނެގެން މަސްވެރިން ނިކަމެތި ކުރުމުގެ ވިސްނުމެއް ސަރުކާރުގެ ނެތް ކަމަށެވެ. މަސްގަންނަ އަގަށް މި ބަދަލު ގެނެސްގެން މަސްވެރިންނަށް ބަރާބަރަށް ފައިސާ ދެވޭނެ ކަމަށް ޝިޔާމް ވިދާޅުވިއެވެ.

ޝިޔާމް ވިދާޅުވީ ކުރީ ސަރުކާރުން މަސް ގަންނަ އަގު 17 ރުފިޔާއިން 25 ރުފިޔާއަށް ބޮޑު ކުރީ އީޔޫ އާއި އިނގިރޭސި ވިލާތަށް އެކްސްޕޯޓްކުރާ މަހުގެ ޓެރިފް ކުޑަ ނޫނީ ޒީރޯ ވާނެ ކަމުގެ ފެހި ސިގްނަލް ލިބިގެން ކަމަށް ކުރީ ސަރުކާރުން ބުނި ކަމަށެވެ. ނަމަވެސް މި ސަރުކާރު ވެރިކަމާއި ހަވާލުވެ، ފޮތްތައް ހާވާ ބަލާލިއިރުގައި ހާލަތު އޮތީ އެކަން ކުރެވޭ ހިސާބަކު ނޫން ކަމަށް ވެސް ޝިޔާމް ވިދާޅުވިއެވެ. އަދި ކުއްލި އަކަށް މަސް ގަންނަ އަގު ބޮޑުކުރުމަކީ ކުރީ ސަރުކާރުގެ ބޮޑު އޮޅުވާލުމެއް ކަމަށާއި އެކަމުގެ ސަބަބުން މިފްކޯއަށް ބޮޑެތި ގެއްލުންތަކެއް ވެފައިވާ ކަން ވެސް ޝިޔާމް ފާހަގަ ކުރެއްވިއެވެ.

މިފަދައިން ކުރީ ސަރުކާރުން މަސް ގަންނަ އަގު ބޮޑު ކުރީ ރިޔާސީ އިންތިޚާބުގެ ދެވަނަ ބުރުގެ ކުރިންކަމަށާއި، މިއީ އެއްވެސް ދިރާސާއެއް ކުރުމެއް ނެތި ސިޔާސީ ފައިދާއެއް ހޯދުމުގެ ބޭނުމުގައި ކުރި ކަމެއް ކަމަށް ވެސް ޝިޔާމް ވިދާޅުވިއެވެ. މިކަމުގެ ސަބަބުން ދައުލަތަށް ނުހަނު ބޮޑު ބުރައެއް އުފުލަން ޖެހިފައިވާކަން ފާހަގަކުރައްވާ ޝިޔާމް ވިދާޅުވީ، މިދިޔަ އަހަރުގެ ބަޖެޓުގައި ސަބްސިޑީގެ ގޮތުގައި 250 މިލިއަން ރުފިޔާ ހޭދަކުރުމަށް ކަނޑައަޅާފައި އޮތް ނަމަވެސް މަހުގެ އަގަށް ގެނައި ބަދަލާއެކު އެ އަދަދު 500 މިލިއަން ރުފިޔާއަށް އިތުރުވެގެންދިޔަކަމަށެވެ.

ރައީސް ޑރ.މުއިއްޒު ވެރިކަމާއި ހަވާލުވެވަޑައިގެންނެވިއިރު، މަސްވެރިންނަށް ނުދީ 250 މިލިއަން ރުފިޔާ ހުރިކަމަށާއި، އޭގެ ތެރެއިން މިހާރު 422 މިލިއަން ވާނީ ދޫކޮށްފައިކަމަށް ޝިޔާމް ވިދާޅުވިއެވެ. އަދި މިި ރުފިޔާ އިން ބާކީ ދޫނުކޮށް 270 މިލިއަން ރުފިޔާ ރުފިޔާ ހުރި ކަމަށާއި، މި ބެކްލޮގް ފިލުވުމުގެ މަސައްކަތް ކުރަމުންދާ ކަމަށް ވިދާޅުވިއެވެ. ޝިޔާމް ވިދާޅުވީ މިހާރު އޮތް ބެކްލޮގް ފިލުވާލައި މާޗު މަހުން ފެށިގެން ބަރާބަރަށް ފައިސާ ދިނުމަށް ސަރުކާރުން މަސައްކަތް ކުރައްވަމުންދާ ކަމަށެވެ.

ޝިޔާމް ވިދާޅުވީ ކުރިއަށް އިންތިޚާބެއް އޮތް ދަނޑިވަޅެއްގައި، މަހުގެ އަގު ކުޑަކުރަން ސަރުކާރުން ނިންމުމަކީ ރައީސް ޑރ.މުއިއްޒުގެ ނިޔަތް ރަނގަޅުކަން ހާމަވެގެންދާ ކަމެއް ކަމަށެވެ.އަދި މި ގެނައި ބަދަލާއި އެކު މިފްކޯ ބަނގުރޫޓުނުވެ، މަސްވެރިންގެ ހާލަތު ވެސް ރަނގަޅުވެގެންދާނެކަމުގެ ޔަގީންކަން ވެސް ޝިޔާމް ދެއްވިއެވެ.