ކުރިއަށް އޮތް 20 ވަނަ ރައްޔިތުންގެ މަޖިލީހުގައި އިދިކޮޅު މައި ޕާޓީ، އެމްޑީޕީގެ ފަރާތުން ވާދަކުރައްވާ ހުރިހާ ކެންޑިޑޭޓުން އީސީއަށް ފޯމު ލައްވައިފި އެވެ. 

އެމްޑީޕީން ބުނެފައިވާގޮތުން މިއަދު އެޕާޓީގެ ކެންޑިޑޭޓުން ވަނީ ފޯމު ލައިފައެވެ. 

ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީން މަޖިލީހުގެ 93 ދާއިރާއަކަށް ވާދަކުރެއެވެ. އެ ދާއިރާ ތަކުގެ ތެރެއިން 40 ދާއިރާއަކަށް ވާދަކުރާނެ ކެންޑިޑޭޓުން ކަނޑައެޅުމަށް މިމަހު 3 ވަނަ ދުވަހު ޕްރައިމަރީ ބާއްވާފައި ވާއިރު، ޕްރައިމަރީން މިހާރުގެ ބައެއް މެންބަރުން ވަނީ ކާމިޔާބީ ހޯއްދަވާފައެވެ. 

Advertisement

އެގޮތުން ޕްރައިމަރީގައި ޓިކެޓް ކާމިޔާބު ކުރެއްވި ބައެއް ބޭފުޅުންނަށް ބަލާލާއިރު މިހާރު ވެސް ވިލިނގިލީ ދާއިރާގެ މެމްބަރު ކަމުގައި ހުންނެވި ސައުދު ހުސެއިން އާއި، ބިލެއްދޫ ދާއިރާގެ މެމްބަރު އަހުމަދު ހަލީމް، ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ، ވެލިދޫ ދާއިރާގެ މެމްބަރު މުހައްމަދު އަބްދުالله ޝަފީގު، ކާށިދޫ ދާއިރާގެ މެމްބަރު އަބްދުالله ޖާބިރު ހިމެނިވަޑައިގަންނަވައެވެ.

އެތަނުން ޖާބިރުގެ ޓިކެޓް އަތުލައި އޭނާ އެ ޕާޓީންވެސް ވަކި ކޮށްފައި ވާއިރު، އެ ދާއިރާގެ ޓިކެޓް މިހާރު ދީފައި ވަނީ ކުރީގެ ރައީސް އިބްރާހީމް މުހައްމަދު ޞާލިޙުގެ ސަރުކާރުގައި، ރައީސް އޮފީހުގެ ލީގަލް އަންޑަ ސެކްރެޓަރީގެ މަގާމު އަދާކުރެއްވި އަބްދުالله ނަސީރަށެވެ. 

މީގެ އިތުރުން އެމްޑީޕީގެ ޓިކެޓް ލިބިލެއްވި އެހެން މެންބަރުންނަކީ، ކުޅުދުއްފުށީ ދެކުނު ދާއިރާއަށް ކުރީ ސަރުކާރުގެ ފުރަތަމަ ޓޫރިޒަމް މިނިސްޓަރު އަލީ ވަހީދާއި ނިމުނު ރިޔާސީ އިންތިޚާބުގައި އުމަރު ނަސީރުގެ ރަނިންމޭޓެއްގެ ގޮތުގައި ނިކުންނެވި އަހުމަދު ސަލީމް (މާޒް ސަލީމް) ވެސް ހިމެނިވަޑައިގަންނަވައެވެ.

އަދި އެމްޑީޕީ ސަރުކާރުގައި އާރުޑީސީގެ މެނޭޖިން ޑިރެކްޓަރުކަމުގައި ހުންނެވި މޫސާ އަލި މަނިކު ހުޅުމާލޭ އުތުރު ދާއިރާގެ ޓިކެޓް ކަށަވަރު ކުރައްވާފައިވާއިރު ކުރީގެ ޔޫތު މިނިސްޓަރ މަހުލޫފުގެ އަބިކަނބަލުން ނަޒްރާ ނަސީމަށްވަނީ ފުވައްމުލަކު ދެކުނު ދާއިރާގެ ޓިކެޓް ކަށަވަރުވެފައެވެ.

ނަމަވެސް، މިހާރުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް އާއި ކެލާ ދާއިރާގެ މެންބަރު އިބްރާހީމް ޝަރީފަަށް ވަނީ ޕްރައިމަރީގައި ނާކާމިޔާބީ އާއި ކުރިމަތިލާން ޖެހުފައެވެ.