ހައްދުފަހަނަ އަޅާފައިވާ އިސްރާއީލުން ފަލަސްޠީނުގެ ދެކުނު ޣައްޒާގައި އޮންނަ ރަފާހް ސިޓީއަށް އަރައިގަންނަން އުޅޭކަމަށް ބުނެ ދެމުންގެންދާ އިންޒާރުތައް ދިވެހި ސަރުކާރުން ހަރުކަށި އިބާރާތުން ކުށްވެރި ކޮށްފިއެވެ.

މި ކަން ކުށްވެރިކޮށް މިއަދު ޚާރިޖީ ވުޒާރާއިން ނެރުނު ބަޔާނެއް ގައި ބުނީ ރަފާހް އަކީ އިސްރާއީލުގެ އަނިޔާވެރި ސިފައިން ދެމުންގެންދާ ހަމަލާގެ ސަބަބުން  ގެދޮރު ގެއްލިފައިވާ އެތައް މިލިއަން ފަލަސްތީން ރައްޔިތުން ތަކެއްގެ އެންމެ ފަހުގެ ސަލާމަތީ ސަރަހައްދު ކަމަށެވެ.

ޚާރިޖީ ވުޒާރާއިން ބުނީ ފަލަސްތީނުގެ މައުސޫމް ރައްޔިތުންނަށް، އެމީހުންގެ ގެދޮރު ދޫކޮށްލުމަށް މަޖުބޫރުކޮށް ދެމުންގެންދާ ލާއިންސާނީ ހަމަލާތަކާއި، އިސްރާއީލުގެ އިސްތިއުމާރީ ބާރުތަކުން ފަލަސްތީނުގައި ހާލުގައި ޖެހިފައި ތިބި ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ދަތިތައް ކުރިމަތިކުރުވުމަކީ ބައިނަލްއަގްވާމީ ގާނޫނުތަކާއި ގަވާއިދުތަކާ ހިލާފު އަދި ހަނގުރާމައިގެ ޖަރީމާތަކާ އެއްވަރުގެ ކަމެއް ކަމަށެވެ.

އިސްރާއީލުގެ ސިފައިން ނަސްލު ނައްތާލުމުގެ މަގްސަދުގައި ކުރިއަށް ގެންދާ ހަމަލާތައް، ކުރިއަށް ނުގެންދިއުމަށް ނިންމާ ފިޔަވަޅު އެޅުމަށް ބައިނަލްއަގްވާމީ ކޯޓުން 26 ޖެނުއަރީ 2024 ގައި ނެރުނު ވަގުތީ ފިޔަވަޅުތަކުގެ އަމުރަށް ތަބާވާން އިސްރާއީލަށް ޕްރެޝަރުކުރުމަށް ބައިނަލްއަގްވާމީ މުޖުތަމައަށް އެ ވުޒާރާއިން ވަނީ ގޮވާލާފައެވެ. މި އަމުރުގައި އެ ކޯޓުން އިސްރާއީލުގެ މައްޗަށް ކުރި އަމުރުތަކުގެ ތެރޭގައި ވަގުތުން ހަނގުރާމަ ހުއްޓާލުމަށާއި ފަލަސްތީނަށް އިންސާނީ އެހީތެރިކަން މެދުކެނޑުމެއްނެތި ފޯރުކޮށްދިނުމަށް ހުރަސް ނޭޅުން ހިމެނެއެވެ.

ޚާރިޖީ ވުޒާރާގެ މި ބަޔާން ނިންމާލަމުން ވަނީ، 1967 ގެ ކުރިން އޮތް ބޯޑަރުތަކުގެ މައްޗަށް ބިނާކޮށް ފަލަސްޠީނުގެ އިސްތިގުލާލީ ދައުލަތެއް ގާއިމްކުރުމަށް ދިވެހި ސަރުކާރުން ގޮވާލާ ކަމަށް ވެސް ބުނެފައެވެ.