ކުރީ ސަރުކާރުން އަޅަން ވައުދުވި އެންމެ ގޭދޮށު މަސް ކާރުޚާނާއެއްގެ މަސައްކަތްވެސް ކުރިއަށްނުދާކަމަށް މަސްވެރިކަމާ ބެހޭ ވަޒީރު އަޙްމަދު ޝިޔާމު ވިދާޅުވެއްޖެއެވެ.

ވަޒީރު ޝިޔާމް މިފަދައިން ވިދާޅުވެފައި ވަނީ، މަޖިލީހުގައި ވަޒީރާއި ސުވާލު ކުރެއްވުމަށް ލިބިލެއްވި ފުރުސަތުގައި ފޭދޫ ދާއިރާގެ މެންބަރު މުޙައްމަދު ނިހާދު، ކުރީ ސަރުކާރުން ރާއްޖޭގެ އެކި ކަންކޮޅުތަކުގައި އަޅަން ފެށި ގޭދޮށު މަސްފެކްޓަރީތަކާ ގުޅޭ ގޮތުން ކުރެއްވި ސުވާލަށް ޖަވާބު ދެއްވަމުންނެވެ. 

ނިހާދުގެ ސުވާލަށް ޖަވާބު ދެއްވަމުން ޝިޔާމު ވިދާޅުވީ ކުރީ ސަރުކާރުން ފެށި ގޭދޮށު މަސްފެކްޓަރީތަކުގެ ތެރެއިން އެއްވެސް ފެކްޓަރީއެއްގެ މަސައްކަތް އެކަށީގެންވާ ދުވެލީގައި ކުރިއަށްނުދާ ކަމަށެވެ. އަދި މަސައްކަތް ފެށުނު ފެކްޓަރީތަކުގެ މަސައްކަތްވެސް ހުރީ އެންމެ ކުރީކޮޅުގައި ކަމަށް އޭނާ ފާހަގަކުރެއްވިއެވެ.

މިއާއެކު ޝިޔާމު ވިދާޅުވީ މަސް ފެކްޓަރީތަކުގެ ތެރެއިން ބައެއް މަސް ފެކްޓަރީތަކުގެ މަސައްކަތް އެކި ފަރާތްތަކާ ހަވާލުކޮށްފައި އެޑްވާންސް ފައިސާ ހަވާލުކުރި ނަމަވެސް މަސައްކަތް މިހާތަނަށް ނުވާ ކަމަށާ ކޮންޓްރެކްޓުތައް ބާތިލުކުރަންޖެހޭނެ ކަމަށް ބެލެވޭ ކަމަށާ، އެކަމުގެ މަޝްވަރާތައް މިހާރު ކުރިއަށްދާކަމަށެވެ. 

ގޭދޮށު މަސްފެކްޓަރީތައް ޤާއިމުކޮށް ރަށުގައި މަހުގެ އެކި އުފެއްދުންތައް އުފެއްދުމަށްފަހު ސީދާ ރާއްޖެއިން ބޭރަށް ބޭރުކުރެވޭނެ އިންތިޒާމުތައް ހަމަޖެއްސުމަކީ 2018 ވަނަ އަހަރު ކުރީގެ ރައީސް އިބްރާހީމް މުޙައްމަދު ޞާލިޙު ވެވަޑައިގެންނެވި ރިޔާސީ ވައުދުފުޅެކެވެ.

އެކަމަށްޓަކައި އައްޑޫގައި ގޭދޮށު 3 މަސް ފެކްޓަރީއާއި ނ.ކެނދިކުޅުދޫގައި އެފަދަ މަސްފެކްޓަރީއެއްގެ މަސައްކަތް ކުރިއަށްދާ ކަމަށް ކުރީ ސަރުކާރުން ބުނެފައިވީ ނަމަވެސް 5 އަހަރުގެ ދައުރު ނިމުނު އިރުވެސް އެންމެ ފެކްޓްރީ އެއްގެ މަސައްކަތް ވެސް ނިމިފައި ނުވާ ކަން ފާހަގަކޮށްލަން ޖެހެއެވެ. 

އެކަމާއި ގުޅިގެން ގިނަ ބައެއްގެ ފާޑުކިޔުންތައް އެ ސަރުކާރަށް އަމާޒުވެގެން ދިޔައެވެ.