ދިވެހި ރާއްޖޭގެ ރައީސުލްޖުމްހޫރިއްޔާއާއި ރައީސުލްޖުމްހޫރިއްޔާގެ ނައިބު، ރައްޔިތުންގެ މަޖިލީހަށް ހާޒިރުކޮށް މަޖިލީހުގެ މެންބަރުންނަށް ސުވާލު ކުރެވޭ ގޮތަށް ރައްޔިތުންގެ މަޖިލީހުގެ ގަވާއިދު ބަދަލުކުރަން ހުށަހަޅައިފި އެވެ.
މި ގަވާއިދު ބަދަލު ކުރުމަށް ހުށައެޅުއްވީ މަޖިލީހުގެ ނައިބު ރައީސް އަދި ހޯރަފުށި ދާއިރާގެ އެމްޑީޕީ މެންބަރު އަހުމަދު ސަލީމެވެ. މި ބިލާއި މެދު ސަލީމް ވިދާޅުވީ މި ބިލު ހުށަހެޅުމުގެ ބޭނުމަކީ ރައްޔިތުންގެ މަޖިލީހުގައި ވަޒީރުންނާ ސުވާލު ކުރުމުގެ އުސޫލުތަކާއި ވަޒީރުންނާ ކުރެވޭ ސުވާލުތަކަށް ޖަވާބު ދިނުމުގެ އުސޫލަށް އިސްލާހު ގެނައުން ކަމަށާއި، މިހާރު އަމަލު ކުރަމުންދަނީ ވަރަށް ކުރީގެ ގާނޫނަކަށްކަމަށެވެ.
" ވަޒީރުންގެ މަޖިލިސް އެކުލެވިގެން ވަނީ ހަމައެކަނި ވަޒީރުންގެ މައްޗަކަށް ނޫން. ވަޒީރުންގެ މަޖިލިސްގެ އެންމެ އިސް ދެބޭފުޅުންނަކީ، ރައީސުލްޖުމްހޫރިއްޔާ އާއި ނައިބު ރައީސް. އޭގެއިތުރުން ގާނޫނުއަސާސީގައި މި ބުނަނީ ނުވަތަ ސަރުކާރުގެ އެހެންވެސް މަގާމެއްގައި ހުރި މީހަކު އެ މީހަކު އަދާކުރަން ޖެހޭ މަސްއޫލުއްތާ ގުޅޭގޮތުން ރައްޔިތުންގެ މަޖިލީހުން ކަނޑައަޅާ ގޮތެއްގެ މަތީން، އެ މީހަކާ ކުރެވޭ ސުވާލަށް ތެދުބަހުން ޖަވާބުދޭން ވާނެއޭ."
ސަލީމް ވިދާޅުވިއެވެ.
މީގެ އިތުރުންވެސް މި އިސްލާހާއި ގުޅޭ ގޮތުން ސަލީމް ވިދާޅުވީ، ރައީސްއާއި ނައިބު ރައީސް ހާޒިރުކުރުމަކީ މިހާރު ވެސް ގާނޫނު އަސާސީން މަޖިލީހަށް ލިބިދީފައިވާ ބާރެއް ކަމަށާއި، ހަމައެކަނި ވަޒީރުންނާ ސުވާލު ކުރެވޭ ގޮތަށް އެ މަސްއޫލިއްޔަތު މަތިކޮށްފައި އޮތުމުގެ ސަބަބުން ސަރުކާރު ޖަވާބުދާރީ ކުރުވަން ޖެހޭ އެންމެ ފުރިހަމަ ގޮތުގައި އެކަން ނުކުރެވޭ ކަމަށެވެ.
ގާނޫނު އަސާސީގައި އޮންނަ ގޮތުން، އެ ސަރުކާރެއްގެ ވަޒީރުންގެ މަޖިލީހާއި އެ ނޫން ވެސް ސަރުކާރުގެ އިސް މަގާމުގެ ބޭފުޅުން ހާޒިރުކޮށް ސުވާލު ކުރުމުގެ ބާރު މަޖިލީހަށް އޮވެއެވެ.
Advertisement
This content is created and paid for by advertisers and does not involve Voice Journalists
