ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިހާބުގައި ރ.އިނގުރައިދޫ ދާއިރާއަށް ވާދަކުރެއްވުމަށް އިނގުރައިދޫ ދާއިރާގެ ކުރީގެ މެންބަރު އިބްރާހީމް ފަލާހު އިލެކްޝަން ކޮމިސަނަށް ކެންޑިޑެންސީ ފޯމް ހުށަހަޅުއްވައިފިއެވެ.

ފަލާހްގެ ކެންޑިޑެންސީ ފޯމް އީސީއަށް ހުށަހަޅުއްވާފައި ވަނީ އޭނާއަށް ތާއިދު ކުރައްވާ ގިނަ އަދަދެއްގެ މެމްބަރުންނާއި އެކު ވަޑައިގެން އިއްޔެގެ ވަގުތެއްގައެވެ. އީސީގެ ފަރާތުން ފަލާހުގެ ފޯމާއި ހަވާލުވެ ވަޑައިގެންފައިވަނީ އެ ކޮމިޝަނުގެ ރައީސް އަލްފާޟިލް ފުއާދު ތައުފީގެވެ.

ކުރިއަށް އޮތް 20 ވަނަ ރައްޔިތުން މަޖިލހުގެ އިންތިހާބުގައި ފަލާހް ވާދަކުރައްވަނީ މިވަގުތު ވެރިކަން ކުރަމުންގެންދާ ޕާޓީ ޕީއެންސީގެ ޓިކެޓުގައެވެ. ޕީއެންސީގެ ފަރާތުން އިނގުރައިދޫ ދާއިރާގައި ބޭއްވުނު ޕްރައިމަރީ ފަލާހް ކާމިޔާބު ކުރައްވާފައި ވަނީ މުޅި ޕްރައިމަރީއަށް ބަލާއިރުވެސް އެ ޕްރައިމަރީގައި އެއް ކެންޑީޑޭޓަކު ހޯއްދެވި އެންމެބޮޑު ކާމިޔާބީ އާއި އެކުގައެވެ.

އެގޮތުން އިނގުރައިދޫ ދާއިރާގެ ޕްރައިމަރީ ފަލާޙް ކާމިޔާބު ކުރައްވާފައިވަނީ 882 މީހުންގެ ބޮޑު ތާއިދަކާއި އެކުގައެވެ. އެ ޕްރައިމަރީގައި ފަލާހް އާއި ވާދަކުރެއްވި ޒުހުރިއްޔާ ޙުސައިންފުޅަށް ލިބިފައިވަނީ 209 ވޯޓެވެ. އަދި ޙުސައިން އަސްލަމަށް ލިބުނީ 127 ވޯޓެވެ.

ކުރިންވެސް އެދާޢިރާގެ މެމްބަރުކަން ކުރައްވާފައިވާ ފަލާޙް ވަނީ ނިމިދިޔަ ރިޔާސީ އިންތިޙާބުގައި މިހާރުގެ ރައީސް ޑރ.މުހައްމަދު މުއިއްޒަށް ތާޢިދު ކުރައްވާ އެ އިންތިހާބު ކާމިޔާބު ކުރުމަށްޓަކައި ވަރަށް ގިނަ މަސައްކަތްތަކެއް ކުރައްވާފައެވެ.

އެގޮތުން ނިމި ދިޔަ ރިޔާސީ އިންތިހާބުގައި މިހާރުގެ ރައީސުލްޖުމުހޫރިއްރިއްޔާ ޑރ.މުހައްމަދު މުއިއްޒަށް ރ.އަތޮޅުން އެންމެ ބޮޑު ތާއީދެއް ލިބިގެން ދިޔަ އެއްދާއިރާއަކީ އިނގުރައިދޫ ދާއިރާއެވެ.

ފަލާހް ބޮޑަށް ފާހަގަ ކުރެވިފައިވަނީ ބުނަން ބޭނުންވެލައްވާ އެއްޗެއް ވަރަށް ސާފުކޮށް ސީދަލަށް ވިދާޅުވާ އަދި ރައްޔިތުންނާއި ގުޅިގެން މަސައްކަތްކުރައްވާ ވަރަށް ހީވާގި މެމްބަރެއްގެ ގޮތުގައެވެ.