ތެލެސީމިއާ ހުންނަ މީހުންނަށް ބޭނުންވާ ޑެސްފަރޯލާއި ބޭސް ފޯރުކޮށްދިނުމަށް، ތެލަސީމިއާ ސެންޓަރުގައި އެސްޓީއޯގެ ފާމަސީއެއް ހުޅުވައިފިއެވެ.

މި ޚިދުމަތް ފޯރުކޮށްދިނުމަށް މޯލްޑިވްސް ބްލަޑް ސާވިސަސް (އެމްބީއެސް)އިން އެސްޓީއޯ އާއި ހަވާލުކުރުމުން, ކަންބޮޑުވުން ފާޅުކުރަން ފެށުމުން، އެ ކަމުގެ ކަންބޮޑުވުން ރައްޔިތުންގެ މަޖިލީހަށް ވަނީ ހުށަހަޅައިފައެވެ. އެހެންކަމުން މި މަސައްކަތުގެ ތަފްސީލު ހޯދުމަށް މިއަދު ބޭއްވި މަޖިލީހުގެ އިންސާނީ ހައްގުތަކާ ބެހޭ ކޮމިޓީއަށް ހެލްތު މިނިސްޓްރީއާއި އެމްބީއެސް އަދި ތެލަސީމިއާ ސޮސައިޓީގެ ބޭފުޅުން ވަނީ ހާޒިރުކޮށްފައެވެ.

މި ބައްދަލުވުމުގައި ވާހަކަފުޅު ދައްކަވަމުން، ހެލްތު މިނިސްޓްރީގެ ސްޓޭޓު މިނިސްޓަރު އަހުމަދު ގާސިމް ވިދާޅުވީ، ބައެއް ތަކެތި ލިބުން ދަތިވުމާއި މެދުކެނޑޭ ކަމުގެ ޝަކުވާ ކުރިން ލިބޭ ކަމަށާއި، ތެލެސީމިއާ ހުންނަ މީހުންނަށް ބޭނުންވާ ޑެސްފަރޯލާއި ބޭސް ފޯރުކޮށްދިނުން އެސްޓީއޯއާ ހަވާލުކުރީ މެދުނުކެނޑި ލިބެން ހުންނާނެކަން ކަށަވަރުކުރަން ކަމަށެވެ.

މީގެ އިތުރުންވެސް ގާސިމް ވިދާޅުވީ ބޭސް ހޯދަން ތަކުލީފެއް އުފުލަން ނުޖެހޭނެކަން ކަށަވަރުކޮށް، ތެލަސީމިއާ ސެންޓަރު ތެރެއިން ބޭނުންވާ ހުރިހާ ބޭހެއް ލިބޭނެ ކަމަށެވެ.

ތެލަސީމިއާ ބޭސް ނެގުމަށް ގެނައި ބަދަލާ ގުޅިގެން އާންމުން ވަނީ ކަންބޮޑުވުން ފާޅުކޮށްފައެވެ. މިގޮތުން  ޑޮކްޓަރަށް ދެއްކުމަށްފަހު ބޭސް ސިޓީ ހިފައިގެން ފާމަސީއަށް ގޮސް ކިއުގައި ޖެހި ބޭސް ނެގުމަކީ އެމްބީއެސްއިން ބޭސް ނެގުމަށް ވުރެ އުނދަގޫ ކަމެއް ކަމަށާއި ހަމައެކަނި ތެލެސީމިއާ ޕޭޝަންޓުން ބޭނުންވާ ބޭހެއް،ފާމަސީން ފޯރުކޮށްދިނުމަކީ މާނައެއް ނެތް ކަމެއްކަމަށް ވަނީ ބުނެފައެވެ. 

އެހެންނަމަވެސް މިނިސްޓްރީން ވަނީ އެ ސެންޓަރުގައި އެސްޓީއޯގެ ފާމަސީއެއް ގާއިމުކުރުމާ އެކު މިހާރު އެ ތަކުލީފު އުފުލަން ނުޖެހޭނެ ކަމުގެ ޔަގީން ކަން ދީފައެވެ.