ކުރީގެ ރައީސް އަބުދުالله ޔާމީން ޢަބުދުލް ޤައްޔޫމުގެ ތާޢިދާއިއެކު ކުރިއަށް އޮތް 20 ވަނަ ރައްޔިތުންގެ މަޖިލިސް އިންތިހާބުގައި 40 ކެންޑިޑޭޓަކު ވާދަކުރުމަށް މިއަދު ކެންޑިޑެންސީ ފޯމް އިލެކްޝަން ކޮމިޝަން އީސީ އާއި ހަވާލުކޮށްފިއެވެ.

ރައީސް ޔާމީން އިސްވެ ހުންނަވައިގެން އުފެއްދެވުމަށް މަސައްކަތް ކުރައްވަމުން ގެންދާވާ ސިޔާސީ ޕާޓީ ޕީޕަލްސް ނެޝަނަލް ފްރަންޓް (ޕީއެންއެފް) އުފެއްދުމުގެ މަސައްކަތުގައި އެންމެ އިސްކޮށް ހަރަކާތްތެރިވެ ލައްވަމުން ގެންދަވާ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް ޖަމާލް ވިދާޅުވީ ޔާމީންގެ ތާއީދާ އެކު 40 ކެންޑިޑޭޓުން މި އިންތިހާބު ގައި ވާދަ ކުރާނެ ކަމަށާއި، އެ ކެންޑިޑޭޓުންނާއި، އެ ކެންޑިޑޭޓުން ކުރިމަތިލާ ދާއިރާތަކުގެ މައުލޫމާތު ޓީވީ އާއި ނޫސްތައް މެދުވެރިކޮށް އާންމުންނާއި ހިއްސާ ކުރާނެ ކަމަށެވެ.

ރައީސް ޔާމީންގެ ތާއިދާއިއެކު ކުރިއަށް އޮތް މަޖިލިސްގެ އިންތިހާބުގައި ވާދަކުރާ 40 މީހެއްގެ ފޯމް އީސީ އާއި ހަވާލުކުރެއްވުމަށް ފަހު ރައީސް ޔާމީނާއި އެންމެ އަރިހުގައި މިވަގުތު އުޅުންވާ ކުރީގެ ނައިބު ރައީސް ޑރ.މުހައްމަދު ޖަމީލް އަޙްމަދު ވިދާޅުވީ ޕީއެންއެފްގެ ތާއީދާއިއެކު އިންތިހާބު ގައި ވާދަކުރެއްވުމަށް ފޯމް ހުށަހެޅުއްވި ބޭފުޅުންނަކީ ރައީސް ޔާމީނުގެ ފިކުރުގެ ބޭފުޅުން ކަމަށެވެ.

Advertisement

ރައީސް ޔާމީން އިސްވެ ހުންނަވައިގެން އުފެއްދެވުމަށް މަސައްކަތް ކުރައްވާ ޕީއެންއެފް އުފެއްދުމުގެ ހުއްދަ އީސީން ދީފައި ވީ ނަމަވެސް 3000 މީހުންގެ ސޮއިހަމަކޮށް އީސީއަށް އަދި ހުށަހަޅާފައެއް ނުވެއެވެ. މިކަމާއި ގުޅޭގޮތުން މަލީހް ވިދާޅުވީ ޕީއެންއެފް އުފެއްދުމުގެ މަސައްކަތް ކުރަމުން ގެންދާ ކަމަށާއި އެ މަސައްކަތަށް ހުއްޓުމެއް މަޑުޖެހުމެއް ނެތް ކަމަށެވެ.

އިލެކްސަން ކޮމިޝަނުން ހާމަކޮށްފައިވާ ގޮތުގައި ކުރިއަށް އޮތް 20 ވަނަ ރައްޔިތުން މަޖިލިހުގެ އިންތިހާބަށް ފޯމް ހުށަހެޅުމުގެ އެންމެފަހު ވަގުތަކީ މިއަދުގެ 2.00 އެވެ.