ރައީސް ޔާމީންގެ ތާއީދާއެކު އަމިއްލަގޮތުން ރ.އިނގުރައިދޫ ދާއިރާއަށް ވާދަކުރެއްވުމަށްޓަކައި ހަސަން ޤާސިމް ކެންޑިޑެންސީ ފޯމް އިއްޔެ އިލެކްޝަން ކޮމިޝަން އީސީ އާއި ހަވާލުކޮށްފިއެވެ.

އީސީ އާއި ފޯމް ހަވާލު ކުރެއްވުމަށްފަހު ހަސަން ޤާސިމް ވިދާޅުވި ގޮތުގައި އޭނާ އިނގުރައިދޫ ދާއިރާއަށް ކުރިމަތި ލައްވަނީ ދާއިރާގެ ރަށްތަކަށް އުމްރާނީ ގޮތުންނާއި، އިޤްތިޞަދީ ގޮތުން ކުރިއެރުން ގެނެސްދިނުމަށްޓަކައެވެ.

"އަޅުގަނޑުގެ މައިގަނޑު  އެއް މަސައްކަތަކަށް ވާނީ އިޤްތިޞާދީ ގޮތުން މިދާއިރާގެ ފަސްރަށް ތަރައްޤީ ކުރުން، އެޔާ އެކުއެކީގައި އެތަނުގެ އެންމެ އާބާދީ ބޮޑުއެއް ރަށަކީ އިނގުރައިދޫކަމަށް ވަތީވެ އަޅުގަނޑު ބޭނުންވަނީ އިނގުރައިދޫ އަސްލު އެތަނުގެ މެއިން ހަބަކަށް ހަދަން "  ހަސަން ޤާސިމް ބުނުއްވިއެވެ.

Advertisement

ޤާސިމް ފާހަގަކުރެއްވި ގޮތުގައި  އިނގުރައިދޫ ދާއިރާގައި ހިމެނޭ  ރ. ކިނޮޅަސް، ރ. ފައިނު، ރ. އިންނަމާދޫ އަދި ރ. ރަސްމާދޫގެއިތުރުން ރ.އިނގުރައިދޫ އަކީވެސް  އިޤްތިޞާދީ ގޮތުން ކުރިއެރުން ބޭނުންވާ ފަސްރަށެވެ. އެހެންކަމުން މިފަސްރަރަށް ސަމާލުކަން ދިނުމުގެ އިތުރުން އާބާދީ އެންމެ ބޮޑު އިނގުރައިދޫއަށް ޚާއްޞަ ސަމާލުކަމެއް ދެވޭނެއެވެ.

ޤާސިމް އިތުރަށް ހާމަކުރެއްވި ގޮތުގައި އިނގުރައިދޫ ދާއިރާއަށް އޭނާ އިންތިހާބުވެއްޖެ ނަމަ އެދާޢިރާއަށް އިމްރާނީ ތަރައްޤީ ގެނައުމަށް މަސައްކަތް ކުރައްވާނީ ދާއިރާގެ ރައްޔިތުންނަކީ އިޤްތިޞާދީ ގޮތުން ފުދުންތެރި ބަޔަކަށް ހެދުމަށްފަހުގައެވެ.

މަޖިލިހަށް އިންތިހާބުވުމަށް ފަހު އިންތިހާބުވާ ޕާޓީނޫން އެހެން ޕާޓީތަކަށް ބަދަލުވުމާއި ބެހޭގޮތުން ޤާސިމް ބުނުއްވީ އޭނާ މަޖިލިސް އިންތިހާބަށް ފޯމް ހުށަހެޅުއްވީ ކުރީގެ ރައީސުލްޖުމުހޫރިއްޔާ ޢަބުދުﷲ ޔާމީން ޢަބުދުލްޤައްޔޫމުގެ ފުރިހަމަ ތާއިދާއި އެކުގައި ކަމަށާއި ކުރިމަގުގައި ހުންނަވާނީ ވެސް ރައީސް ޔާމީންގެ ފަހަތްޕުޅުގައި އެމަނިކުފާނު އަންގަވާ ގޮތަކަށް ކަމަށެވެ.

ހަސަން ގާސިމް ހާމަކުރެއްވި ގޮތުގައި އިލެކްސަން ކޮމިޝަން އީސީން މިހާރު ވަނީ އޭނާގެ ކެންޑިޑެންސީ ބަލައިގެންފައެވެ.