ބިލިއަނަރު އެލޮން މަސްކްގެ ސްޕޭސްއެކްސް އިން ހިންގާ ސްޓާލިންކް އިންޓަނެޓް ހިދުމަތް ޣައްޒާގެ ހޮސްޕިޓަލަކަށް ދިނުމަށް ހަމަޖެހިއްޖެއެވެ.

ޔޫއޭއީގެ ޚާރިޖީ ވުޒާރާއިން އިއްޔެ ބުނީ ބަލިމީހާ ފެންނަ ގޮތަށް ރިއަލް ޓައިމް ވީޑިއޯ މެޑިކަލް ކޮންސަލްޓޭޝަން ބޭނުންވާ ބަލިމީހުންނަށް އެ ހިދުމަތް ފޯރުކޮށްދިނުމުގެ ގޮތުން ސްޓާލިންކް އިންޓަނެޓް ހިދުމަތް ޣައްޒާގެ ދެކުނުގައި ހުންނަ ޔޫއޭއީގެ ފީލްޑް ހޮސްޕިޓަލަށް ފޯރުކޮށްދޭނެ ކަމަށެވެ.

ޣައްޒާގެ ރަފާހްގައި ހުންނަ މި ހޮސްޕިޓަލަކީ ޣައްޒާގައި އިސްރާއީލުން ހަލާކުނުކޮށްލާ ހުރި ބައިނަލްއަގްވާމީ ފީލްޑް ހޮސްޕިޓަލްތަކުގެ ތެރެއިން އެއް ހޮސްޕިޓަލެވެ. ޣައްޒާގެ މުވާސަލާތީ ޚިދުމަތް ކެނޑުމުގެ ސަބަބުން މިތަނުގައި މަސައްކަތް ކުރާ މުއައްޒަފުންނަށް، ބަލިމީހުނަށް އެހީތެރިކަން ފޯރުކޮށްދިނުމުގައި ވަނީ ދަތިތަކާއި ކުރިމަތި ލާން ޖެހިފައެވެ.

އެހެންނަމަވެސް މި ޚިދުމަތް ގާއިމު ކުރެވުމާއި އެކު، އެހެން ހޮސްޕިޓަލްތަކާއި އެކު ބާއްވާ ވީޑިއޯ ކޮންފަރެންސް މެދުވެރިކޮށް ލިބޭ ސިއްހީ އެހީތެރިކަން ބަލިމީހުންނަށް ދިނުމަށް މަގުފަހި ވެގެން ދާނެ ކަމަށް ޔޫއޭއީ ގެ ހާރިޖީ ވުޒާރާއިން ބުނެއެވެ.

ސްޕޭސްއެކްސް އިން ހިންގާ ސްޓާލިންކުން ބްރޯޑްބޭންޑް ފޯރުކޮށްދިނުމަށް ބައިވަރު ސެޓެލައިޓްތަކެއްގެ ނެޓްވޯކެއް ބޭނުންކުރާއިރު، އާންމުކޮށް އިންޓަނެޓްގެ ނުލިބޭ ސަރަހައްދުތައް ހިމެނޭ ގޮތަށް އެ ހިދުމަތް ބޭނުންކުރާ ފަރާތްތަކަށް ހައިސްޕީޑް، ލޯ ލެޓެންސީ އިންޓަނެޓް މި ހިދުމަތް މެދުވެރިކޮށް ފޯރުކޮށްދެ އެވެ.

އަނިޔާވެރި އިސްރާއީލުން ދެމުންގެންދާ ހަމަލާ ތަކުގެ ސަބަބުން ފާއިތުވި ހަތަރު މަސް ދުވަހުގެ ތެރޭގައި ޣައްޒާގެ މުވާސަލާތީ ހިދުމަތްތައް އެތައް ފަހަރަކު ވަނީ މެދުކެނޑިފައެވެ. ޣައްޒާގައި މަސައްކަތް ކުރާ ނޫސްވެރިންނާއި އެހީތެރިންނަށް ބައިނަލްއަގްވާމީ ނުވަތަ އިލެކްޓްރޯނިކް ސިމް ބޭނުންކޮށްގެން މުއާމަލާތު ކުރެވުނު ނަމަވެސް ހައްދުފަހަނަ އަޅާފައިވާ އިސްރާއީލުުން އަޅަމުންދާ ދަތިކުރުމުގެ ފިޔަވަޅު ތަކުގެ ސަބަބުން ޣައްޒާގައި ތިބި ރައްޔިތުންނަށް ބޭރު ދުނިޔެ އާއި މުއާމަލާތުކުރުން ވަނީ ދަތިވެފައެވެ.