އެމެރިކާގެ 45 ވަނަ ރައީސް ގެ މަގާމް ފުރުއްވި އެގައުމުގެ ކުރީގެ ރައީސް ޑޮނަލްޑް ޓްރަމްޕް ގެ މައްޗަށް މަކަރާއި ހީލަތުގެ ކުށް ސާބިތުވެ، 355 މިލިއަން ޑޮލަރު ދައްކަން ޖެހިވަޑައިގެންފިއެވެ.

ގިނަ ދުވަސްތަކަކަށް ދެމިގެން ދިޔަ މި ޝަރީއަތުގެ ހުކުމް އިއްވަމުން ފަޑިޔާރު ވަނީ ޑޮނާންޑް ޓްރަމްޕާއި އޭނާގެ އާއިލާ ވިޔަފާރީގައި ހިމެނޭ ހަރުމުދަލުގެ އަގު ބޮޑުކޮށްފައި ވަނީ އޮޅުވާލުމުގެ ތެރެއިން ކަމަށް ބުނެފައެވެ.

މައްސަލަ ބެއްލެވި ފަޑިޔާރު އާރތް އެންގޯރޮން ވަނީ ނިއުޔޯކްގައި އޮންނަ ޓްރަމްޕްގެ ވިޔަފާރީގެ ޑައިރެކްޓަރުކަމުން 3 އަހަރަށް ސަސްޕެންޑް ވެސް ކުރުމަށް ހުކުމް ގައި އިއްވާފައެވެ. މި މުއްދަތުގައި އޭނާ އާއި އޭނާގެ ވިޔަފާރިތަކަށް ނިއުޔޯކް ރެގިއުލޭޓަރުގައި ރަޖިސްޓްރީކޮށްފައިވާ މާލީ އިދާރާތަކުން ލޯނަށް އެދުމަކީ މަނާ ކަމެކެވެ.

ޓްރަމްގެ އިތުރުން ވެސް އޭނާގެ ދެ ދަރިކަލުންވެސް ވަނީ ސަސްޕެންޑް ކޮށްފައެވެ. އަދި އެއިން ކޮންމެ ބޭފުޅަކު 4 މިލިއަން އެމެރިކާ ޑޮލަރުން ވަނީ ޖޫރިމަނާ ކޮށްފައެވެ.މީގެ އިތުރުން ވެސް، 1 މިލިއަން ޑޮލަރުން އެ ވިޔަފާރީގެ ކުރީގެ ފައިނޭންޝަލް އޮފިސަރު އެލެން ޖޫރިމަނާ ކޮށް، މުޅި އުމުރަށް ވެސް މާލީ މުއާމަލާތްތަކާ ގުޅޭ އެއްވެސް ވަޒީފާއެއް އަދާކުރުން ވަނީ މަނާ ކޮށްފައެވެ.

މިއަހަރުގެ ފަހުކޮޅު އެމެރިކާގައި އޮންނަ ރިޔާސީ އިންތިހާބުގެ އިދިކޮޅު ކެންޑިޑޭޓްގެ ގޮތުގައި ޓްރަމްޕް ކުރިމަތިލައްވާއިރު، ކޯޓުގެ މި ނިންމުމަކީ ޓްރަމްޕަށް ލިބުނު ބޮޑު ގެއްލުމެކެވެ. ވިޔަފާރި އާއި ގުޅޭ ދައުވާގެ އިތުރުންވެސް 4 ޖިނާއީ މައްސަލައެއްގެ ދައުވާ އުފުލާފައިވާ ޓްރަމްޕް މިކަމާއި ގުޅޭ ގޮތުން ވިދާޅުވީ މި ދައުވާތަކަކީ އޭނާގެ މަގުބޫލު ކަމާ ހުރެ ބައިޑަންގެ ސަރުކާރުން ހަސަދަވެރިވާތީ ކުރަމުން ދާ ދައުވާތަކެއް ކަމަށެވެ.