ކުރިއަށް އޮތް  20 ވަނަ ރައްޔިތުންގެ މަޖިލީހުގައި ވާދަކުރާ ކެންޑިޑޭޓުންނަށް މަންދޫބުން ހަމަޖެއްސުމުގެ ފުރުސަތު ހުޅުވާލައިފިއެވެ.

މިކަން ހުޅުވާލައިފައިވަނީ އިލެކްސަން ކޮމިޝަން، އީސީން ކުރި އިއުލާނަކުންނެވެ.

އީސީގެ މި އިއުލާނުގައި ބުނެފައި ވަނީ މަޖިލިސް އިންތިހާބުގެ ވޯޓުނެގުމާއި ވޯޓުގުނުމުގެ ކަންތައްތައް ހިނގާ ނުހިނގާ ގޮތް ބެލުމަށް، އެ ކެންޑިޑޭޓެއްގެ މަސްލަހަތު ހިމެނޭ ކޮންމެ މަރުކަޒަކަށް މަންދޫބަކު އައްޔަން ކުރުމުގެ ފުރުސަތު ހުޅުވާލާ ކަމަށެވެ.

Advertisement

ކެންޑިޑޭޓުންގެ މަންދޫބުންގެ ޝަރުތުތަކުގެ ގޮތުގައި ހިމަނާފައި ވަނީ 18 އަހަރު ފުރިފައިވާ ދިވެއްސަކަށް ވުމާއި، ޖިނާއީ ކުށެއްގައި ހުކުމް ތަންފީޒުކުރެވެމުންދާ މީހެއް ކަމުގައި ނުވުމާއި، އަދި އިންތިހާބާއި ބެހޭ މަސައްކަތެއް އީސީގެ ފަރާތުން ހަވާލުވެގެން ހުރި މީހެއް ކަމުގައިނުވުމެވެ.

މީގެ އިތުރުން ފަނޑިޔާރެއް ނުވަތަ މިނިވަން މުއައްސަސާއެއްގެ މެންބަރެއް އަދި ވެރިއެއް ކަމުގައިނުވުމާއި، ދިވެހި ފުލުހެއް ނުވަތަ ސިފައިންގެ މީހަކަށް ވެގެން ނުވާނެއެވެ. އަދި ހަމަ މިއާއިއެކު  ކުށެއްގެ ތުހުމަތުގައި ބަންދުކޮށްފައި ހުރި މީހަކު ކަމުގައިނުވުމާއި، ސުލޫކީ މިންގަނޑާއި ހިލާފުވެގެން ފިޔަވަޅެއް އަޅައިފައިވާ މީހަކު ކަމުގައިވެސް ވެގެން ނުވުމާއި، އިންތިހާބީ ކުށެއް ފާއިތުވި ފަސް އަހަރު ދުވަހުގެ ތެރޭގައި ސާބިތުވެފައިވާ މީހަކު ކަމުގައި ވެގެން ނުވުންވެސް ޝަރުތުތަކުގެ ތެރޭގައި ހިމެނެއެވެ.

އީސީގެ އިއުލާނުގައި އެންމެފަހުން ބުނެފައިވަނީ މިފަހަރުގެ އިންތިޚާބުގައި ކެންޑިޑޭޓުންގެ މަންދޫބުންނަށް ދޫކުރާނީ ޑިޖިޓަލް ފާހެއްކަމަށާއި، އަދި މަންދޫބުންނަށް ވުމަށް އެދި އީމެއިލް އަދި އިންތިޚާބާ ބެހޭ މަރުކަޒަށް ފޯމް ހުށައެޅޭނެކަމަށެވެ.

އީސީން ހާމަކޮށްފައިވާ ގޮތުގައި ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި 368 ކެންޑިޑޭޓަކު ވާދަކުރާނެއެވެ. އެއީ 42 އަންހެނުންނާއި އަދި 326 ފިރިހެނުންނެވެ.