ޙައްޖު ކޯޕަރޭޝަނުން ޙައްޖުގެ އަޅުކަން އަދާކުރުމަށް ރައްޔިތުންނަށް ފުރުޞަތު ދެމުންގެންދަނީ އެކޯޕަރޭޝަނުން ދޭ ޚިދުމަތެއްގެ ގޮތުގައި ކަމަށާއި ވިޔަފާރިއެއްގެ ގޮތުގައި ނޫންކަމުގައި އެކުންފުނީގެ މެނޭޖިންގ ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

އަސްލު ޓީވީގެ ބާބު ޕްރޮގްރާމްގައި ވާހަކަ ދައްކަވަމުން އެމް.ޑީ ޝަކީލް ވިދާޅުވީ، ވޭތުވެ ދިޔަ 2023 ވަނަ އަހަރު ޙައްޖުގެ އަޅުކަން އަދާކުރުމަށްޓަކައި ބޮލަކަށް ގާތްގަނޑަކަށް  126,000.00ރުފިޔާ ޚަރަދުވެފައިވާކަމަށާއި، ޚަރަދު ބޮޑުވެގެން ދިޔަ ކަމުގައި ވީނަމަވެސް ޙައްޖު ކޯޕަރޭޝަނުން އަދިވެސް މީހަކު އަތުން ނަގަމުންދަނީ 69,965.00 ރުފިޔާ ކަމުގައެވެ.

އަދި ތަކެތީގެ އަގު، އެއާލައިން ޓިކެޓް އަދި ސައުދީގެ ހޮޓެލްތަކުގެ އަގަށް އައިސްފައިވާ ބޮޑު ބަދަލު ރައްޔިތުންނަށް އެނގޭނެ ކަން ފާހަގަކުރައްވައި ޝަކީލް ވިދާޅުވީ ޙައްޖަށް މީހުން ގެންދިއުމަށް މިހާރުވެސް ޙައްޖު ކޯޕަރޭޝަނުން ނަގަމުންދާ 69,965.00 ރުފިޔާ އަކީ މީގެ 11 އަހަރު ކުރިން 2013 ވަނަ އަހަރު ކަނޑައެޅުނު އަގު ކަމަށެވެ. 

ހަމައެހެންމެ،ވޭތުވެދިޔަ 10 ވަރަކަށް އަހަރުތެރޭ ސައުދީ ސަރުކާރުން އެކި އެކި ނަންނަމުގައި ގާއިމްކުރެވިގެން ދިޔަ އެކިއެކި ޓެކްސްތަކަކީވެސް އިތުރަށް ހިނގާނެ ބޮޑެތި ޚަރަދުތަކެއް ކަމަށާ، ހުރިހާ ޚަރަދުތަކަށް ބަލާއިރު 70,000.00 ރުފިޔާއަކީ ވަރަށް ކުޑަ މިންވަރެއްކަން ޝަކީލް ފާހަގަކުރެއްވި އެވެ. އަދި މިއަދަދުވެސް އިތުރަށް ކުޑަ ކުރެވޭނެ ގޮތްތަކެއް ހޯދުމަށް މަސައްކަތްކުރަމުންދާކަމަަށް އޭނާ ވިދާޅުވި އެވެ. 

މިކަމާ ގުޅިގެން އިތުރަށް ވާހަކަ ދައްކަވަމުން ޝަކީލް ވިދާޅުވެފައިވަނީ، ޙައްޖުގެ އަޅުކަމަށް ގޮސްއުޅޭއިރު ޒަމާނުންސުރެ ދިމާވާ މީހުން ގެއްލުމުގެ މައްސަލަ ޙައްލު ކުރުމަށްޓަކައި އެކޯޕަރޭޝަނުން ޙައްޖައް ގެންދާ އެންމެހާ ފަރާތްތަކަށް ޓްރެކިންގ ޓެގް ބޭނުން ކުރުމަށް އެކޯޕަރޭޝަނުން ނިންމާފައިވާ ކަމަށާއި، މިކަމަށް ބޮޑު ހޭދައެއް އެކޯޕަރޭޝަނުން ކުރިނަމަވެސް ޙައްޖާޖީންގެ އަތުން ނަގަމުންދާ އަދަދަށް އެއްވެސް ބަދަލެއް ނާންނާނެ ކަމުގައެވެ.

މޯލްޑިވްސް ޙައްޖު ކޯޕަރޭޝަން ލިމިޓެޑުގެ މަޤްސަދަކީ، ދިވެހި ރައްޔިތުންނަށް އެކަށީގެންވާ އަގެއްގައި ލުއިފަސޭހަކަމާއިއެކު ޙައްޖަށް އަދި ޢުމްރާއަށް ދެވޭނެ މަގު ފަހިކޮށްދިނުމެވެ. އެގޮތުން 2013 ވަނަ އަހަރުން ފެށިގެން އަގަށް އެއްވެސް ބަދަލެއް ނުގެނެސް އެކުންފުނިން މިހިދުމަތް އަންނަނީ ދެމުންނެވެ.