ރާއްޖޭގައި ހިންގުމަށް ހަމަޖެހިފައިވާ ތަރައްގީގެ މަޝްރޫއުތަކާއި ރާއްޖޭގެ މިނިވަންކަމަށް ކުރިއަށް އޮތް ރައްޔިތުންގެ މަޖިލިސް ވަރަށް މުހިންމުކަމަށް ރައީސް ޑރ.މުއިއްޒު ވިދާޅުވެއްޖެއެވެ.
އައްޑޫ ސިޓީއަށާއި ފުވައްމުލައް ސިޓީގެ އިތުރުން ހުވަދުއަތޮޅު އުތުރުބުރިއާއި ހުވަދު އަތޮޅު ދެކުނުބުރީގެ ބައެއް ރަށްތަކަށް ރައީސް ޑރ.މުއިއްޒު ފެއްޓެވި ދަތުރުފުޅުގެ ތެރެއިން އައްޑޫ ސިޓީ އަށް ވަޑައިގެން އެ ސިޓީގެ ހުޅުމީދޫ ރައްޔިތުންނާއި އެމަނިކުފާނު ވަނީ ބައްދަލުކުރައްވާފައެވެ. މި ބައްދަލުކުރެއްވުމުގައި ރައީސް ޑރ.މުއިއްޒު ވިދާޅުވީ ސަރުކާރުން ރައްޔިތުންނަށް ކަންތައްތައް ކޮށްދޭން ބޭނުންވިޔަސް އެކަމަކަށް މަޖލީހުން ހުރަސް އަޅައިފިނަމަ ނުކޮށްދެވޭނެ ކަމަށެވެ.
އެހެންކަމުން ރައީސް ޑރ.މުއިއްޒު ވަނީ ތެދުވެރިކަމާ އަމާނާތްތެރިކަމާއެކު ރައްޔިތުން އެދޭ ކަންކަން ފުރިހަމަ ކޮށްދެއްވުމަށް ރައްޔިތުންގެ މަޖިލިސް ސަރުކާރަށް ކާމިޔާބު ކޮށްދިނުމަކީ މުހިންމު ކަން ފާހަގަކުރައްވާފައެވެ.
"މިއީ ގައުމުގެ ތަރައްގީއަށްޓަކައި، ރަށު ތަރައްގީއަށްޓަކައި، ސިޓީގެ ތަރައްގީއަށްޓަކާ ކުރަން ޖެހޭ ކަމެއްގެ ގޮތުގައި އަޅުގަނޑު ގަބޫލު ކުރާ ގޮތުގައި ތިބޭފުޅުން ވިސްނާ ވަޑައިގަންނަވާނެ. އެއްވެސް ހާލެއްގައި ސިޔާސީ ކަމެއް ނޫން."
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުއިއްޒު ވަނީ ބޭރުގެ ސިފައިން ރާއްޖެއިން ބޭލުމަށާއި ކަނޑުގެ ސަރަހައްދުން ރާއްޖެއަށް ގެއްލުނު ބައި އަނބުރާ ހޯދުމަށް ވެސް މަޖިލިސް ސަރުކާރަށް ކާމިޔާބު ކޮށްދިނުމަކީ މުހިންމު ކަމެއް ކަމަށް ވިދާޅުވެފައެވެ. އަދި މެއި 10 ގެ ކުރިން އިންޑިއާ ސިފައިން ރާއްޖެ އިން ފައިބާނެ ކަމަށާއި މިކަން މިގޮތަށް ދަމަހައްޓަން ސަރުކާރަށް މަޖިލިސް ހޯދައިދޭން ޖެހޭ ކަމަށެވެ.
Advertisement
This content is created and paid for by advertisers and does not involve Voice Journalists
