ރައީސުލްޖުމުހޫރިއްޔާ ޑރ.މުހައްމަދު މުއިއްޒުގެ ފުރަތަމަ ރިޔާސީ ބަޔާނަށް ޖަވާބުދެއްވަމުން މަޖިލިހުގެ މެޖޯރިޓީ ލިޑަރުގެ ހައިސިއްޔަތުން އެމްޑީޕީ ޕާލިމެމްޓްރީ ގްރޫޕްގެ ލީޑަރ އަލިފުށި ދާއިރާގެ މެމްބަރ މުހައްމަދު ރަޝީދު (ބިގޭ) ހެއްދެވީ ބުހުތާނު ދޮގުކަމަށް ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ވިދާޅުވެއްޖެއެވެ.

މޮސްޓާ މިފަދައިން ވިދާޅުވެފައި ވަނީ މިއަދު މިޖިލިހުގައި ކުރިއަށްދިޔަ ޖަލްސާއަށް މަސްވެރިންނަށް ފައިސާދިނުމަށް ގޮވާލާ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ހުށަހެޅުއްވި ގަރާރަށް ވާހަކަ ދައްކަވަމުންނެވެ.

މޮސްޓާ ވިދާޅުވި ރިޔާސީ ބަޔާނަށް ޖަވާބު ދެއްވަމުން ބިގޭ ހެއްދެވީ ކަންޑައެޅިގެން ބުހުތާން ބޮޑު ދޮގުކަމަށާއި ވޭތުވެދިޔަ ސަރުކާރުން ރާއްޖެއަށް ގެނެސްދެވުނު ތަރައްޤީއެއް ފެންނަށް ނެތް ކަމަށެވެ.

މިއަދު މަޖިލިހުގެ ޖަލްސާގައި މޮސްޓާ ވަނީ މަޖިލިހުގައި ތިއްބެވި އެމްޑީޕީ މެމްބަރުންނަށް ވަރަށް ބޮޑަށް ފާޑު ވިދާޅުވެފައެވެ.  އެގޮތުން މޮސްޓާރ ވިދާޅުވީ މަސްވެރިންނަށް ލާރި ނުދެއޭ ކިޔަން އެމްޑީޕީގެ މެމްބަރުން ލަދުގަންނަން ޖެހޭނެ ކަމަށެވެ. މޮސްޓާރ ފާހަގަ ކުރެއްވި ގޮތުގައި ނިމިދިޔަ ސަރުކާރު ނިމިގެން ދިޔައިރު މަސްވެރިންނަށް ނުދީ އެތައް މިލިއަން ރުފިޔާއެއް އޮތްއިރު އެފައިސާ މަސްވެރިންނަށް ދައްކާ ހަލާސްކުރަމުން އެގެންދަނީ މިއަދުގެ ސަރުކާރުން ކަމަށެވެ.

މޮސްޓާ އިތުރަށް ފާހަގަކުރެއްވި ގޮތުގައި މިފަދަ ގަރާރުތައް ހުށަހަޅައިގެން އެމްޑީޕީއަށް ނިސްބަތްވާ މަޖިލިސް މެމްބަރުން އުޅެނީ މަސްވެރިން ހޫނުކޮށް މަސްވެރިންގެ ލޭކައްކުވައި މި ސަރުކާރާއި ދެކޮޅަށް މަޒާހަރާކުރުވަން ކަމަށެވެ. މޮސްޓާ އިތުރަށް ވިދާޅުވީ ރާއްޖޭގެ ތާރީހްގައިވެސް މަސްވެރިން އެންމެ ގިނައިން މުޒާހަރާ ކޮށްފައިވަނީ ނިމިދިޔަ އިބްރާހިމް މުހައްމަދު ޞާލިޙްގެ ސަރުކާރާއި ދެކޮޅަށް ކަމަށެވެ.

މޮސްޓާ ވަނީ އެމްޑީޕީގެ މެމްބަރުން މަޖިލިހުގައި ޖަހަމުންދާ "ސަކަރާތް" މިހާރުން މިހާރަށް ހުއްޓާލައި މިހާރުގެ ރައީސުލްޖުމުހޫރިއްޔާ ޑރ.މުހައްމަދު މުއިއްޒު ރީތިގޮތުގައި ރައްޔިތުންނަށް ޚިދުމަތްކުރުމުގެ ފުރުޞަތު ދިނުމަށް ގޮވާލައްވާފައެވެ.