ހުޅުމާލޭގައި ހުންނަ ވަގުތީ މަސްމާރުކޭޓް ހިންގަން ކުއްޔަށް ހިފުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.

އެޗްޑީސީ އިން މިއަދު ކުރި އިުލާނެއްގައި ބުނީ ހުޅުމާލޭގައި ހުންނަ ވަގުތީ މަސްމާރުކޭޓް ކުއްޔަށް ހިފުމުގެ ފުރުސަތު މިހާރު ހުޅުވާލާފައިވާ ކަމަށާއި އެތަން ކުއްޔަށް ދޭނީ ފޯމު ހުށަހަޅާ ފަރާތްތަކުގެ މެދުގައި ކުރިއަށް ގެންދާ ގުރުއަތުލުމަކުން ކަމަށެވެ.

އެޗްޑީސީން ބުނީ މި މާކެޓް ކުއްޔަށް ދޭނީ  އެއް އަހަރަށް ކަމަށާއި ކޮންމެ މަހަކު ކުލީގެ ގޮތުގައި 6،000ރ. ދައްކަން ޖެހޭނެ ކަމަށެވެ. އަދި ލީސް ޑިޕޮސިޓްގެ ގޮތުގައި 18،000ރ. ވެސް ދައްކަން ޖެހޭނެ ކަމަށް އެ ކުންފުނިން ބުންޏެވެ. މަސް މާރުކޭތު ކުއްޔަށް ހިފުމަށް ލިބުނުކަން އެ ކޯޕަރޭޝަނުން އަންގާތާ 5 ދުވަސް ތެރޭ ލީސް ޑިޕޮސިޓް ދައްކަން ޖެހޭނެ ކަމަށް ވެސް އެޗްޑީސީން ވަނީ ބުނެފައެވެ.

މަސްމާރުކޭޓުގައި މަސްކަނޑާދިނުމުގެ ހިދުމަތް ދެވޭނީ އެ ކުންފުނިން ކަނޑައަޅާފައިވާ އަގުގައި ކަމަށާއި އެ އަގު ލިސްޓު އާންމުންނަށް ފެންނާނެހެން ބަހައްޓަން ޖެހޭ ކަމަށް ވެސް އެޗްޑީސީން ބުންޏެވެ.

އެތަން ކުއްޔަށް ހިފަން ކުރިމަތިލާ ފަރާތަކީ 100 ޕަސެންޓް ދިވެހި ވިޔަފާރިއަކަށް ވާން ޖެހޭނެ ކަމަށާއި އެއްވެސް ދަރަންޏެއް އޮތް ފަރާތަކަށް ވެގެން ނުވާނެ ކަމަށް އެޗްޑީސީން ވަނީ ބުނެފައެވެ.

އެޗްޑީސީން ކުއްޔަށް ދޫކުރުމަށް ހުޅުވާލާފައިވާ ހުޅުމާލޭ ވަގުތީ މަސްމާރުކޭޓަކީ 2،378.82 އަކަފޫޓުގެ ތަނެކެވެ.

މަސްމާރުކޭޓު ކުއްޔަށް ހިފަން ޝައުގުވެރިވާ ފަރާތްތަކުން އަންނަ މަހު ތިނެއްގެ ކުރިން ފޯމު ހުށަހަޅަން ޖެހޭނެ ކަމަށް އެ އިއުލާނުގައި ވަނީ ބުނެފައެވެ. މި ތަން ކުއްޔަށް ހިފުމަށްޓަކައި ހުށައަޅަން ޖެހޭ ފޯމު އެޗްޑީސީން ވަނީ އެ ކުންފުނީގެ ވެބްސައިޓުގައި އާންމުކޮށްފައެވެ.