މިފްކޯއަށް މަސް ގަތުމަށް ފަހު މަސްވެރިންނަށް ދޫކުރަން ޖެހޭ ފައިސާ ވީ އެންމެ އަވަހަށް ދޫކުރުމަށް އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ، އެމްޑީޕީން ގޮވާލައިފި އެވެ. 

މަސްވެރިންނަށް ފައިސާ ނުލިބި ލަސްވަމުންދާތީ އެކަމާއި ގުޅިގެން ކަންބޮޑުވުން ފާޅުކޮށް އެމްޑީޕީން ނެރުނު ނޫސް ބަޔާނެއްގައި ބުނީ، މިފްކޯއަށް މަސް ގަތުމަށް ފަހު މަސްވެރިންނަށް ދޫކުރަން ޖެހޭ 400 މިލިއަނެއްހާ ރުފިޔާ މަސްވެރިންނަށް ދޫކޮށްފައިނުވާ ކަަމަށެވެ. 

އެހެންކަމުން ވީއެންމެ އަވަހަކަށް ރާއްޖޭގެ މަސްވެރިންނަށް ފައިސާ ދޫކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރަށް ގޮވާލަމުން، އެ ބަޔާނުގައި ބުނީ، ކޮވިޑްގެ އެންމެ ދަތި ހާލުގައި ވެސް ސަރުކާރުގެ އާމްދަނީ އެއްކޮށް ހުއްޓިފައި އޮތް ދަނޑިވަޅުގައި ވެސް މަސްވެރިންނަށް ދޭން ޖެހޭ ފައިސާ އެކަށީގެންވާ މުއްދަތެއްގެ ތެރޭގައި އެމްޑީޕީގެ ސަރުކާރުން ދޫކުރި ކަމަށެވެ. 

މިއާއެކު އެމްޑީޕީން ބުނީ، ރިޔާސީ އިންތިހާބަށް ހުށަހެޅި މެނިފެސްޓޯގައި 48 ގަޑިއިރު ތެރޭ މަސްވެރިންނަށް ޑޮލަރުން ފައިސާ ދޫކުރާނެ ކަމަށް ވައުދުވެ އެ އަހުދާ ވެރިކަމުގެ ފުރަތަމަ ދުވަހުން ފެށިގެން މި ސަރުކާރުން ހިލާފުވެފައިވާ ކަމަށެވެ. 

އަދި މަސްވެރިންނަށް ފައިސާ ދޫނުކުރި ކަމުގައިވީ ނަމަވެސް މި ސަރުކާރުން ބޭނުންވާ ހުރިހާ ހަރަދެއް ކުރަމުންދާކަމަށާ، މަސްވެރި އެތަކެއް އާއިލާއެއްގެ އާމްދަނީ އެއްކޮށް ހުއްޓިފައިވާއިރު ވެސް ސިޔާސީ މަގާމުތައް އުފައްދައި އަގުބޮޑު ޕްރޮޖެކްޓުތައް އިފްތިތާހު ކުރަމުންދިޔުން ބަލައެއްނުގަންނަ ކަމަށެވެ.

މީގެ އިތުރުން, ރަމަޟާން މަހަށް ފަހު މަސް ގަންނަ އަގު 15 ރުފިޔާއަށް ތިރިކުރުމަށް ސަރުކާރުން ނިންމާފައިވާ ކަމަށް ބުނެ މަސްވެރިން ކުރާ ބުރަ މަސައްކަތަށް ދޭން ޖެހޭ ހަމަ އަގު އަދާކުރުމަށް އެމްޑީޕީން ވަނީ ގޮވާލާފައެވެ.

އެމްޑީޕީން މިހެން ބުނެފައިވާއިރު، އަދުގެ ސަރުކާރުން ވެރިކަމާއި ހަވާލުވި އިރު 250 މިލިއަން ރުފިޔާ މަސްވެރިންނަށް ނުދީ އޮތް ކަމަށެވެ. 

އަދި މަސްވެރިންނަށް މިއަދާ ހަމައަށް އައިއިރު، 442 މިލިއަން ރުފިޔާ ދައްކާފައިވާ ކަމަށާއި އަދިވެސް 300 މިލިއަނެއްހާ ރުފިޔާ ދޭން ހުރިކަމަށް، ގދ. ފަރެސްމާތޮޑާއަށް ވަޑައިގެން ރައީސް ވިދާޅުވެފައިވާއިރު، ބާކީ ނުދެވި ހުރި ހުރިހާ ފައިސާއެއް އަންނަ މާރިޗު މަހުގެ 5 ވަނަ ދުވަހުގެ ކުރިން ދީ ޚަލާސްކުރައްވާނެ ކަމަށް ފިޝަރީޒް މިނިސްޓަރ އަހުމަދު ޝިޔާމް ވަނީ ވިދާޅުވެފަ އެވެ. 

މީގެ އިތުރުން، މަސް ވިއްކާ އަގު 13 ރުފިޔާ އަށް މި ސަރުކާރުން ތިރިކުރަން އުޅޭ ކަމަށް އެމްޑީޕީގެ ބަޔާނުގައި ބުނެފައި ވާއިރު, މިއަދުގެ ރައްޔިތުންގެ މަޖިލީހުގެ ޖަލްސާގައި ވަޒީރު ޝިޔާމް ވަނީ މަސް ގަންނަ އަގު 20 ރުފިޔާ އަށްވުރެ ކުޑަ ނުކުރުމަކީ ރައީސް މުޢިއްޒުގެ ވަޢުދުފުޅެއް ކަމަށާ، މި ސަރުކާރުން އެ އަގު 20 އަށްވުރެ ކުޑަ ނުކުރާނެ ކަމަށް ވިދާޅުވެފައެވެ.