ކުރިއަށް އޮތް ރައްޔިތުންގެ މަޖިލީހުގެ އިންތިހާބު ރީދަ މަސް ނިމޭތާ 10 ދުވަސް ފަހުން ބޭއްވުމަށް އިންތިހާބުތަކާބެހޭ އާންމު ޤާނޫނަށް ގެނެސްފައިވާ އިސްލާހު ތަސްދީގުކުރުން ލަސްވާތީ މަޖިލީހަށް ކުއްލި މައްސަލައެއް ހުށަހަޅައިފިއެވެ.

މި ކުއްލި މައްސަލަ ރައްޔިތުންގެ މަޖިލީހަށް ހުށައަޅާފައިވަނީ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) އެވެ. 23 މެމްބަރުންގެ ވޯޓުން މި މައްސަލަ މަޖިލީހުން ބަލައިގެން އިރު، ކުއްލި މައްސަލަ ބަލައިގަތުމާ ދެކޮޅަށް 1 މެންބަރަކު ވޯޓު ދެއްވާފައިވެއެވެ.

ވަހީދު ހުށައެޅި މި ކުއްލި މައްސަލައިގައި ބުނެފައިވަނީ އިންތިހާބުތަކާބެހޭ އާންމު ޤާނޫނަށް އިސްލާހުގެނެސް ފާސްކޮށްފައިވާ ބިލު ތަސްދީގުކުރުމަށް ފޮނުވާފައިވާތާ ހަފްތާއަކަށްވުރެ ގިނަ ދުވަސްވީ އިރުވެސް މި ބިލު ތަސްދީގުކުރާނެ ކަމުގެ އެއްވެސް އިޝާރާތެއް ލިބިފައިނުވާ ކަމަށެވެ.

މި ބިލު ތަސްދީގު ނުކޮށް އޮއްވާ، އައްޑޫ ސިޓީ އަށް ރައީސް ޑރ.މުއިއްޒު ވަޑައިގެން، އިންތިހާބު އޮންނާނީ މި އަންނަ މަހުގެ 17 ވަނަ ދުވަހު ކަމަށް ވިދާޅުވެފައިވާކަން މި ބިލުގައި ވަނީ ފާހަގަކޮށްފައެވެ. އެހެންކަމުން، ބިލު ތަސްދީގުނުކުރައްވާ އަދި މަޖިލީހަށް އަނބުރާ ފޮނުވާ ނުލައްވާ، ވަގުތު ބޭކާރުކުރައްވަން ބިލު ހިފަހައްޓަނީ ސަރުކާރުން ބޭނުންވާގޮތަށް މާޗް 17 ގައި އިންތިހާބު ބޭއްވުމަށް ކަމަށް ބެލެވޭ ކަމަށް މުހައްމަދު ވަހީދު ހުށައެޅުއްވި މި ކުއްލި މައްސަލައިގައި ވަނީ ބުނެފައެވެ.

އިންތިހާބު ފަސްކުރުމަށް ޤާނޫނު އިސްލާހުކުރީ ރޯދަ މަހު އިންތިހާބު ބޭއްވުމުން ރައްޔިތުންނަށް ކުރިމަތިވާނެ ދަތިތަކަށް ހަލެއް ހޯދުމަށް ނަމަވެސް ބިލު ތަސްދީގު ނުކޮށް ލަސްވުމުން މަޖިލީހުގެ އިންތިހާބު އޮންނާނެ ތާރީހަކާމެދު ރައްޔިތުން އޮޅުންބޮޅުންވާ ފަދަ ހާލަތެއްގައި ތިބޭންޖެހުމަކީ ކަންބޮޑުވާ ކަމެއް ކަމަށް ވެސް މި މައްސަލައިގައި ވަނީ ބުނެފައެވެ. 

އެހެންކަމުން އެ ބިލު ވީއެންމެ އަވަހަކަށް ތަސްދީގު ކުރުމަށް ރައީސް ޑރ. މުއިއްޒު އަށް މި ކުއްލި މައްސަލައިގައި ވަނީ ގޮވާލާފައެވެ.

ރޯދަ މަސް ނިމި، 10 ދުވަސްފަހުން ރައްޔިތުންގެ މަޖިލީހުގެ އިންތިހާބު ބޭއްވުމަށް މަޖިލީހުން ފާސްކޮށްފައިވަނީ މި މަހުގެ 11 ވަނަ ދުވަހުއެވެ. މި އިސްލާހު މަޖިލީހުން ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 46 މެންބަރުން ގެ ވޯޓުންނެވެ. އިންތިހާބު ފަސްކުރަން ނުފެންނަ ކަމަށް ވޯޓް ދެއްވީ 3 މެމްބަރުންނެވެ.

އިންތިހާބު ލަސްކުރުމުގެ އިތުރުން މި ބިލުގައި، ވޯޓު ކަރުދާހުގައި ކެންޑިޑޭޓެއްގެ ނަމާއި ދިމާލުގައި ރަނގަޅު ފާހަގައެއްގެ ގޮތުގައި ބެލެވޭ ނިޝާނެއް ހިމަނާފައިވާނަމަ އެއީ ސައްޙަ ވޯޓެއް ކަމުގައި ބަލައިގަންނަން ޖެހޭނެ ކަމަށްވެސް ބުނެފައިވެއެވެ. އަދި ފާހަގަ ފުރިހަމަކުރުމުގެ ގޮތުން، އެ ފާހަގަ މަތިން ފެވިގެންދާ ގޮތަށް ރަނގަޅު ފާހަގައެއް ޖަހާފައި އޮތް ނަމަވެސް ވޯޓު ބާތިލު ނުވާނެކަމަށްވެސް އެ އިސްލާހުގައިވެއެވެ.