މަޖިލީހުން ރައީސް އަޒުލުކުރުމުގެ ގަވާއިދަށް ގެނައި އިސްލާހުގެ މައްސަލަ ރައްދުވާ ފަރާތެއް ނެތް ގޮތަށް ކުރިއަށް ގެންދަނީ މަޖިލިހުން އެގޮތަށް އެދިގެންކަމަށް އެޓާނީ ޖެނެރަލް އަހްމަދު އުޝާމް ވިދާޅުވެއްޖެއެވެ.

މިއަދު ހެނދުނު 10 ޖެހިއިރު، ސުޕްރީމް ކޯޓުގައި މި މައްސަލައިގެ ޝަރީއަތް ވަނީ ފަށާފައެވެ.

މި މައްސަލަ ބައްލަވަނީ ފަސް ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު ޑރ. އަޒްމިރަލްދާ ޒާހިރެވެ. ދެން ތިއްބެވީ ފަނޑިޔާރު އައިޝާ ޝުޖޫނާއި، ފަނޑިޔާރު ހުސްނުއްސުއޫދު، ފަނޑިޔާރު މަހާޒު އަލީ ޒާހިރު، އަދި ފަނޑިޔާރު ޑރ. މުހައްމަދު އިބްރާހީމެވެ.

ފަނޑިޔާރު އަޒްމިރަލްދާ ވިދާޅުވީ މި މައްސަލަ ފުރަތަމަ ރައްޔިތުންގެ މަޖިލީހަށް ރައްދުވާ ގޮތަށް ހުށަހެޅި ނަމަވެސް އެ ކަން ބަދަލުކޮށްދިނުމަށް އެދި ބަންޑާރަ ނައިބު ސިޓީއެއް ފޮނުއްވާފައިވާކަމަށެވެ. އެޓާނީ ޖެނެރަލް ގެ އޮފީހުން މިހެން ނިންމެވި ސަބަބު ހާމަކޮށްދެއްވަމުން ފަނޑިޔާރު އަޒްމިރަލްދާ ޒާހިރު ވިދާޅުވީ މި ސިޓީގައި މަޖިލިސް ހާޒިރުކޮށްފައިނުވަނީ ރައްޔިތުންގެ މަޖިލިސް ތަމްސީލް ކުރަން ޖެހޭ ފަރާތަކީ ވެސް ބަންޑާރަ ނައިބުގެ އޮފީސް ކަމަށް ބުނެފައިވާ ކަމަށެވެ.

މިކަމާއި ގުޅިގެން މިއަދު އެޓާނީ ޖެނެރަލް އަހްމަދު އުޝާމް އެކްސް ގައި ކުރެއްވި ޕޯސްޓެއްގައި ވިދާޅުވީ،  މައްސަލަ ރައްދުވާ ފަރާތެއް ނެތް ގޮތަށް މިމައްސަލަ ކުރިއަށް ގެންގޮސްދިނުމަށް ރައްޔިތުންގެ މަޖިލީހުން އެ އޮފީހަށް ސިޓީ އެއް ފޮނުވާފައި ކަމަށެވެ.

އުޝާމް މިފަދައިން ވިދާޅުވިއިރު، މިއަދުގެ ޝަރީއަތު އަޑުއެހުމަށް ވެސް ހާޒިރުވެ ތިބީ ބަންޑާރަ ނައިބުގެ އޮފީހުގެ ވަކީލުން އެކަންޏެވެ. ރައްޔިތުންގެ މަޖިލީހުގެ ފަރާތުން އެއްވެސް މީހަކު ހާޒިރުވެފައެއް ނުވެ އެވެ.

މިއަދު ކުރިއަށް ދިޔަ އަޑުއެހުން ސުޕްރީމް ކޯޓުން ކުރިން ބޭއްވުމަށް ނިންމީ މި މަހުގެ 25 ވަނަ ދުވަހުއެވެ. ނަމަވެސް ފަހުން ވަނީ ޝަރީއަތް އަވަސް ކުރުމަށް ނިންމާފައިވާ ކަމަށް އަންގާފައެވެ.

ސުޕްރީމް ކޯޓުން ރައްޔިތުންގެ މަޖިލީހަށް ވަނީ މި މައްސަލައިގައި އެ އިސްލާހުތަކަށް އަމަލުކުރުން މަޑުޖައްސާލުމަށް އަމުރެއް ނެރެފައެވެ. ނަމަވެސް، ކޯޓުން މިފަދައިން އަމުރުނެރެފައި ވަނިކޮށް، މިމަހުގެ 15 ވަނަ ދުވަހު އޮތް އާންމު ކޮމިޓީގެ ބައްދަލުވުމުގައި، ގާނޫނު އަސާސީއާ ހިލާފުކަމަށް ބުނާ އެ ތިން މާއްދާ ގަވާއިދުން އުނިކުރުމަށް ވަނީ ފާސްކޮށްފައެވެ. އަދި މީގެ ބަދަލުގައި ގަވާއިދުގެ 242 މާއްދާއަށް އަކުރެއް އިތުރުކޮށް އެ މާއްދާގައި ހިމެނުމަށް އެ ކޮމިޓީން ފާސްކުރިއެވެ.

ބަންޑާރަ ނައިބު އޮފީހުން ރައްޔިތުންގެ މަޖިލީހަށް ރައްދުވާގޮތަށް ހުށައަޅާފައިވާ ދުސްތޫރީ މައްސަލައިގައި، މި މަހުގެ 8 ވަނަ ދުވަހު ސުޕްރީމް ކޯޓުން މަޖިލީހަށް ކުރި އަމުރުގައި ސުޕްރީމް ކޯޓުން ގޮތެއް ކަނޑައަޅަންދެން ފެށުނީއްސުރެ މަޖިލީހުން އަމަލުުރަމުންދިޔަ ގޮތް ދެމި އޮންނަންޖެހޭ ކަމަށް ދެކޭ ކަމަށާއި، މިއީ އާންމު މަސްލަހަތު ދެމެހެއްޓުމަށްޓަކައި ވަގުތީ އަމުރެއް ނެރެންޖެހޭ ހާލަތެއްކަމަށް ވަނީ ބަޔާންކޮށްފައެވެ.

އެހެންނަމަވެސް މަޖިލީހުން ވަނީ ސުޕްރީމް ކޯޓުން ނެރުނު ވަގުތީ އަމުރާއި ޚިލާފަށް ރައްޔިތުންގެ މަޖިލީހުގެ ޖުމުލަ މެންބަރުން ގުނާއިރު، މަޖިލިހުން ވަކިވެފައި ތިބި މެންބަރުން ނުގުނާގޮތަށް ގަވާއިދަށް ގެނައި އިސްލާހަށް އަމަލުކުރަން ނިންމާފައެވެ.

މަޖިލީހުގެ ރައީސް އަސްލަމް ވެސް ވަނީ މި އަމުރާއި ދޭތެރޭ ކަންބޮޑުވުން ފާޅުކުރައްވާ، ސުޕްރީމް ކޯޓަށް ހުށައެޅިފައިވާ މައްސަލައަކީ ދުސްތޫރީ ބަހުސެއް އުފެދޭ މައްސަލައެއް ކަމަށާއި ސިޔާސީ ސުވާލެއްގެ މައްޗަށް ބިނާވާ ނިންމުންތަކަކީ އެކަންކަމުގެ މައްޗަށް ކޯޓުގެ އިހުތިސާސް ނުހިނގާ ކަންކަން ކަމަށް ވިދާޅުވެފައެވެ. އަދި ވަކި ފަރާތަކުން މަޖިލީހުން ކަންތައްތައް ކުރަންޖެހޭ ގޮތް ބުނެދިނުން ބަލައިގަތުން ދަތިކަމަށް ވެސް އަސްލަމް ވިދާޅުވިއެވެ.

މިދިޔަ އަހަރު މަޖިލީހުގެ މި ގަވާއިދަށް ގެނައި އިސްލާހުތަކުގައިވާ ގޮތުން ޖުމްލަ މެމްބަރުންގެ އަދަދު ގުނާއިރު ހުސްވެފައި ހުރި ގޮނޑިތައް ނުހިމަނާ ގުނަންޖެހޭނެ އެވެ. ނަމަވެސް ގާނޫނު އަސާސީ ބުނާގޮތުން ރައީސާއި ނައިބު ރައީސް މަގާމުން ވަކި ކުރެވޭނީ މަޖިލީހުގެ ޖުމްލަ މެމްބަރުންގެ ތިން ބައި ކުޅަ ދެ ބައި މެމްބަރުންގެ ވޯޓުންނެވެ. އެއީ 87 މެންބަރުންގެ ތެރެއިން 58 މެންބަރުންނެވެ.

އެހެންނަމަވެސް ރައީސް ޑރ.މުއިއްޒުގެ ސަރުކާރުގެ އިސްމަގާމު ތަކަށް ބައެއް މެމްބަރުން އައްޔަނު ކުރުމަާއި ގުޅިގެން މަޖިލީހުގެ 7 ގޮނޑިއެއް ވަނީ ހުސްވެފައެވެ. މިއާއި އެކު ޖުމްލަ މެމްބަރުންގެ އަދަދު 80 އަށް ބަދަލުވެ، މަޖިލީހުގެ މެޖޯރިޓީ އޮތް އެމްޑީޕީން މި ގެނައި އިސްލާހާއި އެކު އެމްޑީޕީ ގެ 44 މެމްބަރުންނާއި އާއި ދަ ޑިމޮކްރެޓްސް 13 މެމްބަރުން ވޯޓް ލުމުން ރައީސް އަޒުލު ކުރެވޭނެއެވެ.