ކުރިއަށްއޮތް 20 ވަނަ ރައްޔިތުން މަޖިލިސް އިންތިހާބަށް މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ތަރުޖަމާނެއްގެ ގޮތުގައި ކެނދިކުޅުދޫ ދާއިރާގެ މެމްބަރ އަހްމަދު އީސަ ހަމަޖައްސައިފިއެވެ.

މިކަން ހާމަކޮށްފައި ވަނީ އެކްސް މެދުވެރިކޮށް އެމްޑީޕީން ކުރި ޕޯސްޓެއްގައެވެ.

އެމްޑީޕީގެ ތަރުޖަމާނެއްގެ ގޮތުގައި އީސަ ހަމަޖައްސާފައިވާއިރު ކުރިއަށް އޮތް މަޖިލިސް އިންތިހާބުގައި އެންމެ ގިނަ ކެންޑިޑޭޓުން ވާދަކުރުމަށް އީސީއަށް ފޯމް ހުށަހަޅާފައި ވަނީވެސް އެމްޑީޕީގެ ފަރާތުންނެވެ. އެގޮތުން އެމްޑީޕީގެ ފަރާތުން މިފަހަރުގެ އިންތިހާބުގައި 90 ކެންޑިޑޭޓުން ވާދަކުރުމަށް ފޯމް ހުށަހަޅާފައި ވެއެވެ.

Advertisement

އިލެކްސަން ކޮމިޝަން އީސީން ހާމަކޮށްފައިވާ ގޮތުގައި ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި 368 ކެންޑިޑޭޓަކު ވާދަކުރާނެއެވެ. އެއީ 42 އަންހެނުންނާއި އަދި 326 ފިރިހެނުންނެވެ.

ކުރިއަށް އޮތް 20 ވަނަ ރައްޔިތުންގެ މަޖިލިހުގެ އިންތިޚާބު ބާއްވަން އިލެކްޝަން ކޮމިޝަނުން ކަނޑައަޅާފައި ވަނީ މިއަންނަ މަހުގެ 17 ވަނަ ދުވަހެވެ. ނަމަވެސް ރައްޔިތުންގެ މަޖިލިހުން މިހާރު ވަނީ ރޯދަ މަސް ނިމޭތާ 10 ދުވަސް ފަހުން އިންތިޚާބު ބާއްވަން ޖެހޭގޮތަށް ޤާނޫނު އިސްލާހުކޮށްފައެވެ. އިންތިހާބާއި ބެހޭ ޤާނޫނަށް މި ގެނައި އިސްލާހަށް އަމްލަކުރަން ޖެހޭނީ ރައީސުލްޖުމުހޫރިއްޔާ އެ އިސްލާހް ތަސްދީގު ކުރެއްވުމުންނެވެ.