ރައްޔިތުންގެ މަޖިލީހުން ރައީސް އަޒުލު ކުރުމުގެ ގަވާއިދަށް ގެނައި އިސްލާޙަށް އަމަލު ކުރުން މަޑުޖައްސާލުމަށް ސުޕްރީމް ކޯޓުން ވަގުތީ އަމުރެއް ނެރެފައިވަނިކޮށް، މަޖިލީހުން ނިންމި ނިންމުންތައް ސައްހަތޯ ބެލުމަށް ސުޕްރީމް ކޯޓުން ނިންމައިފިއެވެ.

މިއަދު ހެނދުނު 10 ޖެހިއިރު ފެށި މި ޝަރީއަތް ބައްލަވަނީ ފަސް ފަނޑިޔާރުންގެ ބެންޗަކުންނެވެ. ރިޔާސަތުގައި އިންނެވީ ފަނޑިޔާރު ޑރ. އަޒްމިރަލްދާ ޒާހިރެވެ. ދެން ތިއްބެވީ ފަނޑިޔާރު އައިޝާ ޝުޖޫނާއި، ފަނޑިޔާރު ހުސްނުއްސުއޫދު، ފަނޑިޔާރު މަހާޒު އަލީ ޒާހިރު، އަދި ފަނޑިޔާރު ޑރ. މުހައްމަދު އިބްރާހީމެވެ.

މި މައްސަލައިގެ ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު ޑރ. އަޒްމިރާލްދާ ޒާހިރު ވަނީ ސުޕްރީމް ކޯޓުގެ އަމުރަށްފަހު ރައްޔިތުންނާ ގުޅޭ އެއްވެސް ކަމެއްގައި ރައްޔިތުންގެ މަޖިލީހުން ނިންމި އެއްވެސް ނިންމުމެއްވާނަމަ ސުޕްރީމް ކޯޓާއި ހިއްސާ ކުރެއްވުމަށް، އެ އަޑުއެހުމުގައި އޭޖީގެ ފަރާތުން ވަކާލާތު ކުރައްވާ އެ އޮފީހުގެ ކައުންސެލް ޖެނެރަލް ފާތުމަތު ހަލީމްއަށް އަންގަވައިފައެވެ.

ސުޕްރީމް ކޯޓުގެ އަމުރަށްފަހު މަޖިލީހުން ކަންތައް ކުރަމުންގެންދިޔަ ގޮތާމެދު ފަނޑިޔާރު ހުސްނުއްސުއޫދު ވަނީ ކައުންސެލް ޖެނެރަލްއަށް ގިނަ ސުވާލުތަކެއް ކުރައްވައިފައެވެ.

މިސުވާލު ތަކަށް ޖަވާބު ދެއްވަމުން ކައުންސެލް ޖެނެރަލް ވިދާޅުވީ، މަޖިލީހުން ކަންތައް ކުރިއަށްގެން ދިޔައީ ސުޕްރީމް ކޯޓުން އެންގޮ ގޮތާއި ޚިލާފަށް ކަމަށެވެ. މިގޮތުން މަޖިލީހުގެ  މެންބަރުންގެ އަދަދަކީ 80 ކަމަށް ބަލައިގެން ނިންމުންތައް ނިންމަމުން ގެންދިޔަ ކަން ފާހަގަ ކުރެއްވިއެވެ.

މީގެ އިތުރުން ވެސް ރޯދަމަސް ނިމޭތާ 10 ދުވަސް ފަހުން އިންތިހާބު ބާއްވަން ޖެހޭގޮތަށް އިންތިހާބުތަކާ ބެހޭ އާންމު ގާނޫނަށް އިސްލާހު ގެންނަން މަޖިލީހުން ފާސްކޮށްފައި ވަނީވެސް ސުޕްރީމް ކޯޓުން އަމުރު ނެރެފައި ވަނިކޮށް ކަމަށް ވެސް ކައުންސެލް ޖެނެރަލް ވަނީ ވިދާޅުވެފައެވެ.

ހަމަ އެހެންމެ މި މައްސަލަ ކޯޓުގައި އޮއްވާ، މިމަހުގެ 15 ވަނަ ދުވަހު އޮތް އާންމު ކޮމިޓީގެ ބައްދަލުވުމުގައި، ގާނޫނު އަސާސީއާ ހިލާފުކަމަށް ބުނާ އެ ތިން މާއްދާ ގަވާއިދުން އުނިކުރުމަށް ފާސްކުރި ކަމަށް ވެސް ކައުންސެލް ޖެނެރަލް ވަނީ ފާހަގަކުރައްވާފައެވެ. އަދި މީގެ ބަދަލުގައި ގަވާއިދުގެ 242 މާއްދާއަށް އަކުރެއް އިތުރުކޮށް އެ މާއްދާގައި ހިމެނުމަށް ވެސް ނިންމާފައިވަނީ ކޯޓުން އަމުރު ނެރެފައި ވަނިކޮށް ކަމަށާއި މިއީ ކޯޓުތަކުގެ ގާނޫނާ ހިލާފް ކަމެއް ކަމަށް ވިދާޅުވިއެވެ.

މިއަދު އޮތް މިމައްސަލައިގެ ޝަރީއަތް ނިންމާލައްވަމުން ފަނޑިޔާރު ޑރ. އަޒްމިރާލްދާ ޒާހިރު ވަނީ ސުޕްރީމް ކޯޓުގެ އަމުރަށްފަހު މަޖިލީހުން ފާސްކުރި ބިލްތަކާއި މަޖިލީހުގެ ގަވާއިދަށް ބަދަލު ގެންނަން ނިންމި ޔައުމިއްޔާ އެ ކޯޓަށް ހުށަހެޅުމަށް ކައުންސެލް ޖެނެރަލްއަށް އަންގަވައިފައެވެ.

އެ ހުށައެޅުންތަކަށް ބެއްލެވުމަށްފަހު، އިތުރު އަޑު އެހުމެއް ބާއްވަން ނުޖެހޭނަމަ، ދެން އޮންނާނީ ބަންޑާރަ ނައިބު އޮފީހުން ރައްޔިތުންގެ މަޖިލީހަށް ރައްދުވާގޮތަށް ހުށައަޅާފައިވާ މި ދުސްތޫރީ މައްސަލައިގެ ހުކުމް ކުރުމެވެ.