މި ސަރުކާރުން ރައްޔިތުންގެ ހެވާ ލާބައަށް ކަންކަން ކުރާނެ ގޮތް ބަޔާންކޮށް މަގުފަހި ކުރާއިރު، އެކަންކަން ބާރު ސްޕީޑުގައި ގެންދެވޭނެ ތަނަކަށް މަޖިލިސް ބަދަލުކޮށްލުމަށް ނިންމާނީ ރައްޔިތުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މި ފަދައިން ވިދާޅުވީ ރޭ ކުރިއަށްގެންދިޔަ "އަހާ" ފޯރަމުގައި ކުރިއަށް އޮތް މަޖިލިސް އިންތިޚާބު ސަރުކާރަށް ކާމިޔާބުވުމުގެ މުހިންމުކަމާއި ގުޅޭގޮތުން ބައިވެރިއަކު ކުރި ސުވާލަކަށް ޖަވާބު ދެއްވަމުންނެވެ.
ރައީސް ޑރ.މުއިއްޒު ވިދާޅުވީ ދިވެހިރާއްޖޭގެ ޤާނޫނު އަސާސީގައިވާ ގޮތުން މަޖިލީހަށް ސަރުކާރަށް ބާރު ހިންގުމުގެ ފުރުސަތު އެބައޮތް ކަމަށެވެ. އެގޮތުން، މި ހިނގާ 19 ވަނަ މަޖިލީހުގެ ތެރެއިން ވެސް އެ މަންޒަރުތައް ފެންނަ ކަމަށާއި އެއްވެސް އަސާސެއް ނެތި އެކި ފިއްތުންތައް ސަރުކާރަށް މަޖިލީހުން ކުރިމަތި ކުރުވަމުންދާކަން ރައީސް ޑރ.މުއިއްޒު ފާހަގަ ކުރެއްވިއެވެ. އެހެންކަމުން، ރައީސް ޑރ.މުއިއްޒު ވިދާޅުވީ ރިޔާސީ އިންތިހާބަކުން ވެރިއަކު ހޮވައި ރައްޔިތުން ބޭނުންވާ ކަންކަން ކުރަން ފުރުސަތު ނުދީ އެއްވެސް އަސާސެއް ނެތި އެއަށް ހުރަސް އެޅޭނެ ނިޒާމެއްގެ ތެރެއިން ކަންކަން ހިންގާގޮތަށް މަޖިލިސް އޮންނަ އޮތުމާއި ބެހޭގޮތުން ރައްޔިތުން ގޮތް ނިންމަން ޖެހޭކަމަށެވެ.
އިގްތިސާދު ހަރުދަނާކޮށް، ފުޅާ ކުރާނެ ގޮތް ފަދަ ކަންކަން ކަނޑައަޅައި އެކަންކަން ނިންމަމުންދާއިރު އެކަމަށް މަގުފަހި ވާނެ ގޮތަކަށް މަޖިލީސް ބަދަލުކޮށްލުމުގެ ބާރު އޮތީ ރައްޔިތުންގެ އަތުގައި ކަމަށް ވެސް ރައީސް ޑރ.މުއިއްޒު ވަނީ ވިދާޅުވެފައެވެ.
"ރައްޔިތުންނޭ ގޮތް ނިންމާނީ. ޕާފޯމް ކުރަމުންދާއިރު، ޑެލިވަރ ކުރަމުންދާއިރު އަދި ކުރިއަށް ހުރި ކަންކަން ކުރާނެ ގޮތް ބަޔާންކޮށް މަގުފަހި ކުރާއިރު، އިގްތިސާދު ހަރުދަނާ ކުރާނެގޮތް. އޮގްތިސާދު ފުޅާކުރާނެ ގޮތް، ދަރަނި ކުޑަކުރާނެ ގޮތް، ދަރަނި އަނބުރާ ދައްކާނެ ގޮތް. މިހުރިހާ ގޮތެއް ކަނޑައަޅައި، އެކަންކަން ކުރަމުންދާއިރު އައިއެމްއެފުން އެވަނީ ބަލައިގެންފައި އަޅުގަނޑުމެންގެ އިގްތިސާދީ އެޖެންޑާ. އެހެންވީމަ މި ހުރިހާ ކަމެއް ރަނގަޅު މަގުން މިގޮތަށް ބައްޓަން ކުރެވިގެންދާއިރު އެއަށް މަގުފަހިކޮށްދޭން އެކަން ބާރު ސްޕީޑުގައި ގެންދެވޭނެ ގޮތަކަށް މަޖިލިސް ނިންމާނީ ރައްޔިތުން،"
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުން ވެސް ރައީސް ޑރ.މުއިއްޒު ވަނީ މިހާރު ސަރުކާރުން ކުރަމުންދާ ކަންކަމުގެ ތެރެއިން ހަފުތާ 14 ގައި ކަނޑައަޅައިގެން ގެދޮރުވެރިކަމާއި ގުޅޭ ބިލުތައް ޑްރާފްޓްކޮށް މަޖިލީހަށް ފޮނުވުމުގެ މަސައްކަތް ކުރިއަށްދާކަން ފާހަގަކުރައްވާ، މަޖިލީހުގެ މި ދައުރުގެ ތެރެއިން ވެސް އިތުރު ކަންކަން ކުރުމަށް ބިލުތައް ހުށަހަޅުއްވަމުން ގެންދަވާނެކަމަށް ވިދާޅުވެފައެވެ.
ގެދޮރުވެރިކަމާއި ބެހޭ ބިލުގެ އިތުރުން ރައީސް ޑރ.މުއިއްޒު ވަނީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް ދަތިތައް ދިމާވާ ކަމަށް ވިދާޅުވެފައެވެ. މި ދަތިތައްވެސް ހައްލު ކުރެވެން އޮތީ މަޖިލިސް މެދުވެރިކޮށް ކަމަށްވާތީ އެ ފުރުސަތު ރައްޔިތުން ފަހިކޮށްދެއްވައިފިނަމަ އެ ޤާނޫނުތައް އިސްލާހު ކުރައްވާނެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
