ޕްރައިމަރީން ނާކާމިޔާބުވުމަކީ އަދި ޕާޓީން ވަކިވެގެންދާން ޖެހޭ ސަބަބެއް ނޫންކަމަށް ޕީޕީއެމް/ޕީއެންސީގެ މަޖިލިސް އިންތިހާބުގެ ޕްރައިމަރީގައި ވާދަކުރެއްވި ޒުހުރިއްޔާ ހުސައިންފުޅު ވިދާޅުވެއްޖެއެވެ.

ޒުހުރިއްޔާ މިފަދައިން ވިދާޅުވީ ރޭ މަޖިލީހުގެ އިނގުރައިދޫ ދާއިރާއަށް ޕީޕީއެމް/ޕީއެންސީގެ ފަރާތުން ކުރިމަތިލައްވާ އިބްރާހިމް ފަލާހްގެ ކެމްޕޭން ރަސްމީކޮށް ފެށުމަށް ބޭއްވި ހާއްސަ ޖަލްސާގެ ތެރެއިންނެވެ. މިގޮތުން ޒުހުރިއްޔާ ވިދާޅުވީ ޕީޕީއެމް/ޕީއެންސީ އަދި ކުރީގެ ޑީއާރުޕީ އަށް އިޚްލާސްތެރިކަމާއި އެކު މަސައްކަތް ކުރި ދަރިއެއްގެ ހައިސިއްޔަތުން ޕީޕީއެމް/ޕީއެންސީ އަކާއި ދުރަކަށް ނުދެވޭނެ ކަމަށެވެ. އަދި ކޮންމެ ގޮތަކަށް ކަންތައް މެދުވެރިވި ނަމަވެސް ހިތާއި ރޫހުން ޕާޓީއަށް ދެވިފައިވާ ލޯތްބާއި ގަދަރެއް ފިލައިގެން ނުދާނެ ކަމަށެވެ.

އިނގުރައިދޫ ދާއިރާ ތަމްސީލް ކުރަން ހުންނަން ޖެހޭނީ ދާއިރާގެ ދަރިއެއްކަން ފާހަގަކުރައްވާ ޒުހުރިއްޔާ ވިދާޅުވީ އެކަމަނާ ހުންނަވާނީ ޕީޕީއެމް/ޕީއެންސީގެ ފަރާތުން ދާއިރާ ތަމްސީލު ކުރައްވާ ފަލާހް އާއި އެކު ކަމަށެވެ. އަދި ޕްރައިމަރީން ބަލި ވުމަކީ ޕާޓީން ވަކިވެގެން ދާން ޖެހޭ ސަބަބެއް ނޫންކަމަށާއި، ޕްރައިމަރީން ލިބޭ ނާކާމިޔާބީ އަކީ ކުރިއަށް އޮތް ތަނުގައި ހުޅުވޭ މަގެއް ކަމުގައި ވެސް ޒުހުރިއްޔާ ވިދާޅުވިއެވެ.

Advertisement

ޒުހުރިއްޔާ ވަނީ ޕީޕީއެމް/ޕީއެންސީ ދެކެ ލޯބިވާ ފަރާތްތަކަށް ފަލާހް އާއި އެކު، ބޮޑު ތަފާތަކުން މި ދާއިރާ ނެގުމަށް މަސައްކަތްކުރުމަށް ގޮވާލައްވާފައެވެ.

ޕީޕީއެމް/ޕީއެންސީގެ މަޖިލިސް ޕްރައިމަރީ ގައި އިތުރު ދެ ކެނޑިޑޭޓަކާއި އެކު ވާދަ ކުރައްވައިގެން ޒުހުރިއްޔާ ލިބިވަޑައިގަތީ ޖުމްލަ 208 ވޯޓެވެ. ބޮޑު ތަފާތަކުން މިދާއިރާގެ ޕްރައިމަރީ ކާމިޔާބު ކުރެއްވި ފަލާޙަށް 832 ވޯޓު ލިބިވަޑައިގެންއިރު، ޕްރައިމަރީގައި ވާދަކުރެއްވި، ހުސައިން އަސްލަމަށް ލިބިވަޑައިގަތީ 130 ވޯޓެވެ.