ދާދިފަހުން އެމްޑީޕީގެ ރައީސްކަމުގެ މަޤާމާއި ހަވާލުވެ ވަޑައިގެންނެވި ކުރީގެ ހާރިޖީ ވަޒީރު ޢަބުދުﷲ ޝާހިދުގެ ފުރަތަމަ ދަތުރުފުޅެއްގެ ގޮތުގައި، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ތޮއްޑޫ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް ހުސެން ސަމީރުގެ ކެމްޕޭނުގައި ބައިވެރިވެވަޑައިގަތުމަށް އ.އަތޮޅަށް ވަޑައިގެންފިއެވެ.
އެގޮތުން އެމްޑީޕީގެ ރައީސް ޢަބްދުﷲ ޝާހިދު މިއަދު މި ދަތުރުފުޅުގައި އެންމެ ފުރަތަމަ ވަޑައިގަތީ އއ އުކުޅަހަށެވެ. އެރަށުން ޝާހިދު އަށާއި އެމްޑީޕީގެ ޓީމަށް މަރުޙަބާ ވިދާޅުވީ ސަމީރުގެ އިތުރުން އުކުޅަސް ކައުންސިލް ރައީސް ޝައުކަތު އިބްރާހިމާއި އަދި ދާއިރާގެ އެމްޑީޕީ ކެމްޕޭން ޓީމެވެ.
އުކުޅަހުން އެމްޑީޕީގެ އާ ރައީސް ޝާހިދުއަށް ދެންނެވި ހޫނު މަރުހަބާއަށް އެބޭފުޅާ ވަނީ ޓުވިޓާ މެދުވެރިކުރައްވާ އެފަރާތްތަކަށް ޝުކުރުވެސް އަދާކުރައްވާފައެވެ. ހަމަ އެއާއި އެކު ތޮއްޑޫ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް ހުސެން ސަމީރަށް ވޯޓްދިނުމަށްވެސް އެދި ވަޑައިގެންފައެވެ.
" ރާއްޖޭގެ މިސްރާބު ހަމަ މަގަށް އެޅުވުމަށް ހުސެއިން ސަމީރު ކެންޑިޑޭޓް ނަމްބަރ 4 އަށް އެންމެހާ ބޭފުޅުން ވޯޓްދެއްވާ" އެމްޑީޕީގެ އާ ރައީސް އަބުދުﷲ ޝާހިދު ވިދާޅުވެފައިވެއެވެ.
އުކުޅަހަށް ވަޑައިގަތުމަށްފަހު ޝާހިދު ވަނީ އެރަށު ބަނދަރުމަތީގައި އެމްޑީޕީގެ ދިދަ ނަންގަވައިދެއްވާފައެވެ. އަދި މިސްރާބު ހަމަމަގަށް ގެނައުމަށް ކުރަން ޖެހޭ މަސައްކަތްތަކާއި، ކެމްޕޭން ކުރިއަށް ގެންދިޔުމާ ގުޅޭ ގޮތުން ކެމްޕޭން ޓީމާއެކު މަޝްވަރާކުރައްވާފައެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ތޮއްޑޫ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް ހުސެން ސަމީރު ގެންދަވަނީ ވަރަށް ވަރުގަދަ ކެންޕެއިނެއް ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
