އަދުގެ ސަރުކާރުން ތަކުރާރުކޮށް "ކުރީ ސަރުކާރު" ކިޔަމުންދަނީ، ކަންކަން މެނޭޖް ކުރަން ނޭނގިގެން ކަމަށް ކުރީ ސަރުކާރުގެ ރައީސް، އަދި އެމްޑީޕީގެ އެޑްވައިޒަރ އިބްރާހިމް މުހައްމަދު ޞާލިހު ރޭ ވިދާޅުވެއްޖެއެވެ.
20 ވަނަ ރައްޔިތުންގެ މަޖިލީހުގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓުންގެ ކެންޕެއިން ރަސްމީކޮށް އިފްތިތާޙް ކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން ޞާލިހު ވިދާޅުވީ، އެމަނިކުފާނުގެ ވެރިކަމުގައި ކުރިމަތިލައްވަން ޖެހިވަޑައިގެންނެވީ ދަތި އުނދަގޫ ދުވަސްތަކަކާ ކަމަށެވެ.
އެގޮތުން އެ ވެރިކަމުގައި ކުރިމަތިވި ޢާލަމީ ވަބާ، ކޮވިޑް-19 ގައި ދިވެހި ރާއްޖެއިން، 20،000 އާއި އެއް ލައްކަ އާއި ދެމެދުގެ އަދަދަކަށް މީހުން މަރުވާނެ ކަމަށް އެމަނިކުފާނަށް، އެކަމާއި ގުޅޭ މާހިރުން ހުށަހެޅި ރިޕޯޓް ތަކުގައި ބުނި ކަން ފާހަގަކުރެއްވި އެވެ.
އެހެންކަމުން، އެ ސަރުކާރުގެ އެންމެ މުހިންމު ކަމެއްގެ ގޮތުގައި ބެއްލެވީ، ރައްޔިތުންގެ ފުރާނަ ސަލާމަތްކުރުން ކަމަށާ، އެކަން ކުރަން ބެލި އިރު ދައުލަތުގެ ރިޒާވްގައި ހުރީ ދޮޅުމަހެއްހާ ދުވަހު ކާބޯތަކެތި ގެނެވޭނެ ފައިސާ ކަމަށް އެމާނިކުފާނު ވިދާޅުވި އެވެ.
އެހެން ނަމަވެސް އެދުވަހު ރާއްޖޭގެ އެއްވެސް ރައްޔިތަކު ބަނޑަށް ނުޖެހި ސަލާމަތް ކުރުމަށްޓަކައި ބަރާބަރަށް ކާބޯތަކެތި އިރާދަކުރެއްވިޔާ އަޅުގަނޑުމެން ގެނައިން. ތެޔޮ ގެނައިން. ސިއްހީ ޚިދުމަތް އަޅުގަނޑުމެން ފޯރުކޮށްދިނިން. އަދި އޭގެ އިތުރުން ކުރީގެ ސަރުކާރުން ނަގާފައި ހުރި ދަރަނިތައްވެސް އަޅުގަނޑުމެން ދައްކަމުން ދިޔައީ. އަދި ދޭދޭ ގައުމު ތަކާއި ވާހަކަ ދައްކައިގެން ލޯނުތައް ފަސްކުރެވުނު.
ކުރީގެ ރައީސް އިބްރާހިމް މުހައްމަދު ޞާލިހު
"އަބޫދާބީ ފަންޑުން ނަގާފައި ހުރި 100 މިލިއަން ޑޮލަރު އަޅުގަނޑުމެން ފަސްކުރިން. އޯޕަން މާކެޓަށް ގޮސް, 500 މިލިއަން ޑޮލަރު ނަގައި 250 މިލިއަން ޑޮލަރު އަޅުގަނޑުމެން ދައްކައި ނިންމިން. ރާއްޖޭގެ ވިޔަފާރިތައް ބަނގުރޫޓް ވިޔަނުދޭން އެހީތެރިކަން ފޯރުކޮށްދޭން ޖެހުނު. ޓޫރިޒަމް ސެކްޓަރ އެހެން ނޫން ނަމަ، ފައިދާ ލިބޭ ތަނެއްގެ ގޮތުގަ އެއްނޫން މިއަދު އޮންނާނީ. ކުދި ވިޔަފާރިތަކަށް ކޮޅަށްޖެހޭނެ ގޮތް ހޯދައި ދިނިން. އެއީ ލޯނު ނަގައިގެން އަޅުގަނޑުމެން ކުރި ކަންތައް. އެހެން ނޫން ނަމަ މިއަދު މި ގައުމު މިހެން ނޯންނާނެ. ހަގީގަތުގައި މިއަދު ވެގެން މިއުޅެނީ މެނޭޖް ކުރަން ނޭނގިގެން. ކުރީގެ ސަރުކާރު، ކުރީގެ ސަރުކާރު، ކުރީގެ ސަރުކާރު." ކޮވިޑް ތެރޭގައި ކަންކަން މެނޭޖް ކުރައްވަމުން ކުރީގެ ރައީސް ޔާމީންގެ ސަރުކާރުން ނަގާފައި ހުރި ލޯން ތައް ދައްކަން ކުރެއްވި މަސައްކަތް ކޮޔައިދެއްވަމުން ޞާލިހު ވިދާޅުވި އެވެ.
ރައީސް ޞާލިހު މިހެން ވިދާޅުވެފައި ވާއިރު، އެމާނިކުފާނުގެ ވެރިކަން ނިމުނު އިރު، ދައުލަތުން ބޭރުގެ އެކި ފަރާތްތަކަށް ދައްކަންޖެހޭ 120 ބިލިއަނާއި، ރާއްޖޭގެ އެކިއެކި ފަރުދުންނަށް ދައްކަންޖެހޭ 9 ބިލިއަން އޮތް ކަމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
