2013 ވަނަ އަހަރުން ފެށިގެން 2018 ވަނަ އަހަރާއި ހަމައަށް ކުރި ވެރިކަމުގެ އަނިޔާވެރި ދުވަސްތައް ހަނދާނުން ފިލައި ދިޔައީ 2018 ވަނަ އަހަރުން 2023 ވަނަ އަހަރާއި ހަމައަށް ވެރިކަން ކުރެއްވި، ކުރީގެ ރައީސް އިބްރާހިމް މުހައްމަދު ޞާލިހު ގެ ހެޔޮ ވެރިކަމުގެ ސަބަބުން ކަމަށް، އިދިކޮޅު މައި ޕާޓީ، އެމްޑީޕީގެ ޗެއާރޕާސަން އަދި ރައީސް ޞާލިހުގެ ސަރުކާރުގެ އިކޮނަމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ. 

ފައްޔާޒު މިފަދައިން ވިދާޅުވެފައި ވަނީ، 20 ވަނަ ރައްޔިތުންގެ މަޖިލީހުގައި އެމްޑީޕީފެ ފަރާތުން ވާދަކުރައްވާ ކެންޑިޑޭޓުންގެ ކެންޕެއިން ރަސްމީކޮށް އިފްތިތާޙް ކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުންނެވެ. 

އެގޮތުން ފައްޔާޒް ވިދާޅުވީ އެމްޑީޕީން މިހާރު އަނެއްކާވެސް ނުކުންނަނީ އަނިޔާވެރި މުޖުތަމައެއްގެ ހާލަތު ބަދަލުކޮށް، ރައްޔިތުންނަށް ހައްގުވާ މިންވަރު ހޯދައިދިނުމަށް ކަމަށެވެ.

އަދި އެ މަސައްކަތް އެމްޑީޕީން ޒަމާންތަކެއް ވަންދެން ކޮށްފައިވާ ކަމަށާއި، އޭގެ ތެރެއިން ވެރިކަމުގެ ނިޒާމާއި ދައުލަތުގެ ނިޒާމް ބަދަލުކޮށް، އެންމެ ބާރުވެރި ބަޔަކީ ރައްޔިތުންކަމަށް އެމްޑީޕީން ހަދައިދީފައިވާ ކަމަށް އޭނާ ވިދާޅުވި އެވެ.

ފައްޔާޒު ވިދާޅުވި ގޮތުގައި، އާ ގާނޫނު އަސާސީއާއެކު ރައްޔިތުންނަށް ބާރުތައް ހޯދައިދިނީ އެމްޑީޕީއެވެ. އަދި ވަރަށް އަނިޔާވެރި ވެރިކަންތަކުގައި ވެސް ރައްޔިތުންގެ ހައްގުތައް ހޯދައިދޭން އެމްޑީޕީން މަސައްކަތްކުރި ކަމަށާ ވިދާޅުވިއެވެ. 

ކަންމިހެން ހުރި ނަމަވެސް، އެމްޑީޕީގެ އެތެރޭގައި ޖެހުނު މައްސަލަތަކުގެ ސަބަބުންނާއި، ދޮގާއި ފިތުނަ ވިއްކައިގެން މިހާރުގެ ސަރުކާރު ވެރިކަމަށް އައި ކަމަށާ، އަނެއްކާވެސް އެމްޑީޕީއަށް ކުރަން ޖެހިފައިވަނީ ކުރިން ކުރި ފަދަ މަސައްކަތް ތަކެއް ކަމަށް އޭނާ ވިދާޅުވި އެވެ. 

މީގެ އިތުރުން ވެސް، ރޭގެ ޖަލްސާގައި ފައްޔާޒު ވަނީ އަދުގެ ސަރުކާރަށް ވަރަށް ބޮޑަށް ފާޑުވިދާޅުވެ، ސަރުކާރުން ރައްޔިތުންނަށް އޮޅުވާލަމުންދާ ކަމަށް ވިދާޅުވެފައެވެ. އަދި ސަރުކާރު ހަމަ މަގަށް އެޅުވުމަށް މަޖިލީހުގެ މެޖޯރިޓީ އެމްޑީޕީއަށް ލިބުން މުހިންމު ކަމަށްވެސް އޭނާ ވިދާޅުވި އެވެ.