ޗައިނާ ސުޕަޕަވަރެއްގެ ގޮތުގައި ލީޑްކުރާ ދުނިޔޭގައި އެމެރިކާއިން އުޅެންބޭނުންނުވާކަމުގައި އެމެރިކާއިން ނޭޓޯއަށް ކަނޑައަޅާފައިވާ އެމްބެސެޑަރ ނިކޮލަސް ބާންސް ވިދާޅުވެއްޖެއެވެ. 
އެމެރިކާގެ ޓީވީ ނެޓްވާކެއްކަމުގައިވާ ސީބީއެސްއެންގެ 60 މިނިޓް ޕްރޮގްރާމްގައި ވާހަކަ ދައްކަވަމުން ބާންސް ވިދާޅުވީ މިހާރާއި ކުރީގެ ފިނި ހަނގުރާމައާއި ބަލާއިރު އޭރު ސޮވިއެޓް ޔުނިއަންގައި ބާރުގަދަ އަސްކަރީ ފައުޖަކާއި ނިއުކްލިއަރ ހަތިޔާރު ހުރި ނަމަވެސް ސޮވިއެޓްޔުނިއަނަކީ އޭރު އިގްތިސާދީ ގޮތުން އެމެރިކާއާއި ވާދަކުރެވޭ ވަރަށްވުރެ ބަލިކަށި ގައުމެއް ކަމަށެވެ. 
އެކަމަކު މިހާރު އެމެރިކާއިން ވާދަކުރަންޖެހިފައިވާ ޗައިނާއަކީ އިގްތިސާދީ ވަރުގަދަ ބާރެއް ކަމަށެވެ. ސޮވިއެޓް ޔުނިއަން 1940 ހާއި 50 އާއި 70 އާއި 80 ގެ އަހަރުތަކުގައި އޮތްވަރަށްވުރެ ޗައިނާ މާ ބާރުގަދަ ކަމަށް އޭނާވިދާޅުވިއެވެ.

އެމެރިކާއިން މިހާރު ކުރަންޖެހިފައިވަނީ އާ ފިނިހަނގުރާމައެއް ނޫންކަމަށް ވިދާޅުވަމުން އޭނާ ފާހަގަކުރެއްވީ ހަނގުރާމައަކީ ޑިމޮކްރެޓިކް ސޮސައިޓީއާއި މިނިވަންކަން ބިނާވެފައިވާ އެމެރިކަން ފަލްސަފާއާއި ޗައިނާގެ ކޮމިއުނިސްޓް ފަލްސަފާއާ ދެމެދު ހިގަމުންދާ ހަގުރާމައެއް ކަމަށެވެ. ޗައިނާއިން ދެކެނީ އެމެރިކާގެ ޑިމޮކްރެޓިކް އައިޑިއާއަށްވުރެ ޗައިނާގެ ކޮމިއުނިސްޓް އައިޑިއާ މާމަތީގައި އޮތްކަމަށާއި އެމެރިކާއިން އެގޮތް ގަބޫލު ނުކުރާނޭ ކަމަށް އޭނާ ވިދާޅުވިއެވެ. މިހާރު މިހިގާ ހަގުރާމައަކީ ދުނިޔެ ލީޑްކުރަންވީ ކޮންބައެއްގެ އައިޑިއާއެއްގެ މަތީގައި ކަން ކަނޑައެޅުމަށް ހިގާހަގުރާމައެއް ކަމުގައިވެސް މިސްޓަރ ބާރންސް ވިދާޅުވިއެވެ.

ޗައިނާއިން އަމާޒުހިފާފައިވަނީ 2035 ވަނައަހަރާއި ހަމައަށްދާއިރު ދުނިޔެ މިހާރު ކޮންޓްރޯލް ކުރަމުންދާ ހުޅަނގުގެ ޙަޟާރަތުގެ މައްޗަށް ޓެކްނޮލޮޖީގެ ގޮތުން ޗައިނާ ކުރިއަރައިގެން ދިއުމަށެވެ. ޗައިނާގެ ރައީސް ޝީޖިންގޕިންގެ ތަސައްވުރަކީ އެއީއެވެ.

އެމެރިކާގެ ސީނިއަރ ޑިޕްލޮމޭޓް ވިދާޅުވީ އެމެރިކާގެ ޓެކް ކުންފުނިތަކާއި ޓެކް އެކްސްޕާޓުން ހަނގުރާމަކުރަމުންދަނީ އާޓިފިޝަލް އިންޓެލިޖެންސާއި ބައޯޓެކްއާއި ގުއަންޓަމްގެ ރޮގުން ޗައިނާއަށްވުރެ ކުރިއެރުމަށެވެ. ސަބަބަކީ މުސްތަގްބަލްގައި އަސްކަރީ ޓެކްނޮލޮޖީ ބިނާވެގެންދާނީ މިޓެކްނޮލޮޖީގެ މައްޗަށް ކަމުގައިވާތީއެވެ. ކުރިއަށް އޮތްތާގައި ސުޕަޕަވަރެއްގެގޮތުގައި ދެމިއޮވެވޭނީ މިރޮނގުން ކުރިއަރައި ދިޔަ ބަޔަކަށެވެ. މިސްޓަރ ބާންސް ވިދާޅުވީ ޗައިނާގެ އަމާޒަކަށްވާނީ މިރޮނގުން ކުރިއަރައިގެންގޮސް އެމެރިކާގެ މައްޗަށް ބާރުވެރިވެގަތުމަށެވެ. އެކަމަކު ޗައިނާ ކޮންޓްރޯލްކޮށްގެންދާ ދުނިޔެއެއްގައި އެމެރިކާ އޮންނަން ބޭނުންނުވާކަމަށް އޭނާ ވިދާޅުވިއެވެ. މިސްޓަރ ބާރންސް އެމެރިކާގެ އެމްބެސެޑަރގެ ގޮތުގައި ޗައިނާގައިވެސް މަސައްކަތްކުރައްވާފައި ވެއެވެ.

އެމެރިކާގެ ޑިޕްލޮމޭޓުގެ މި އިންޓަވިއުއިން ދުނިޔޭގައި އިގްތިސާދީގޮތުންނާއި ޓެކްނޮލޮޖިކަލް ރޮގުން ބާރުގަދަކޮށްފައިވާ ޗައިނާއާމެދު އެމެރިކާ އޮތް ނުތަނަވަސްކަން ވަރަށް ބޮޑަށް ދޭހަވެއެވެ. ޗައިނާއަށް ދަތިކޮށްގެން އެގައުމު ޓެކްނޮލޮޖީގެ ރޮނގުން ކުރިއަރަމުންދާ ދިއުން ހުއްޓުވޭތޯ އެމެރިކާއިން މިހާތަނަށް ކުރި ހުރިހާ މަސައްކަތް އަދިވަނީ ނާކާމިޔާބުވެފައެވެ.