ހުޅުމާލޭގައި ގާއިމުކޮށްފައިވާ ރަށުމާރުކޭޓު ގޮޅި ކުއްޔަށް ހިފުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުވާލައިފިއެވެ.

އެޗްޑީސީން ކުރި އިއުލާނެއްގައި ބުނީ  ގޮޅި ކުއްޔަށް ދޫކުރެވޭނެ ފަރާތެއް ކަނޑައަޅާނީ ބީލަން ހުށައަޅާ ފަރާތްތަކުގެ ތެރެއިން އެންމެ މަތީ އަގު ހުށައަޅާ ފަރާތަކަށް ކަމަށެވެ. ބީލަން ބަލައިގަތުމަށް ހަމަޖެހިފައިވަނީ މި އަންނަ މަހުގެ  13 ވަނަ ދުވަހުއެވެ. ހަމަ އެދުވަހު ބީލަން ހުޅުވާލާއިރު، ގޮޅި އިޚްތިޔާރުކުރުން އޮންނާނީ މާރޗް މަހުގެ 20 ވަނަ ދުވަހު ކަމަށް އެޗްޑީސީން ކުރި އިއުލާނުގައި ވެއެވެ.

ބީލަން ހުށައެޅުމާއި ގުޅޭ މައުލޫމާތާއި ފޯމު މިހާރު ވަނީ އެ ކޯޕަރޭޝަނުގެ ވެބްސައިޓުގައި އާންމުކޮށްފައެވެ.

އެޗްޑިސީން ބުނީ މިފަހަރު ދޫކުރުމަށް ހަމަޖެހިފައިވަނީ 73.33 އަކަފޫޓުގެ 11 ގޮޅި ކަމަށާއި ގޮޅި ދޫކުރުމަށް ހަމަޖެހިފައިވަނީ 2 އަހަރު ދުވަހުގެ މުއްދަތަކަށް ކަމަށެވެ. އަދި މި ގޮޅިތަކުގެ ބީލަން ފެށޭ އަގަކީ މަހަކު 3،500 ރުފިޔާ ކަމަށް ވެސް އެޗްޑީސީން ވަނީ ބުނެފައެވެ.

ރަށުމާރުކޭޓުގެ ގޮޅި ކުއްޔަށް ހިފުމަށް ބޭނުންވާ ފަރާތްތަކުގެ ކިބައިގައި ހުންނަން ޖެހޭނެ ކަމަށް އެޗްޑީސީން ކަނޑައަޅާފައިވާ ޝަރުތުތަކަކީ ދިވެހި ރައްޔިތެއްކަމުގައިވުން ނުވަތަ ރަޖިސްޓަރކޮށްފައިވާ ވިޔަފާރިވެރިއެއްކަމުގައިވުމާއި، މީލާދީގޮތުން 18 އަހަރު ފުރި، ރަށު މާރުކޭޓުން ގޮޅިއެއް ކުއްޔަށް ހިންގުމުގެ އެއްބަސްވުމެއްގައިވާ ފަރާތަކަށް ނުވުމުގެ އިތުރުން، އެޗްޑީސީއަށް ދައްކަންޖެހޭ ފައިސާއެއް ނުދައްކާ ހުރި ފަރާތެއްކަމުގައި ނުވުމެވެ.

އެޗްޑީސީން ބުނީ ރަށު މާރުކޭޓުން ގޮޅިއެއް ކުއްޔަށް ހިފުމުގެ ފުރުޞަތު ލިބިފައިވާކަން އަންގާ ސިޓީ ފޮނުވާ ތާރީޚުން ފެށިގެން ރަސްމީ 5 ދުވަހުގެ ތެރޭގައި ލީސް ޑިޕޮސިޓުގެ ގޮތުގައި 3 މަސް ދުވަހުގެ ކުލި ދައްކަންވާނެ ކަމަށެވެ. އެއަށްފަހު، އެއްބަސްވުމުގައި ސޮއިކޮށް، ރަސްމީ 7 ދުވަސް ތެރޭ ގޮޅި ހަވާލުކުރެވޭނެކަމަށް ވެސް އެކޯޕަރޭޝަނުން ބުނެއެވެ.