ފެބްރުއަރީ މަހުގެ 7 ވަނަ ދުވަހު ގަލޮޅު ރަސްމީ ދަނޑުގައި ކުޅުނު މެޗެއްގެ ތެރެއިން ހިންގި މާރާމާރީ އާއި ގުޅިގެން ފުލުހުން ހައްޔަރުކުރި 16 މީހުންގެ ތެރެއިން 13 މީހަކު ދޫކޮށްލައިފިއެވެ.

މިކަމާއި ގުޅިގެން މިއަދު ފުލުހުން ވިދާޅުވީ، މިމައްސަލައިގައި މިހާތަނަށް 16 މީހަކު ހައްޔަރު ކުރެވުނު ކަމަށާއި، އެމީހުންގެ ބަންދަށް ގޮތެއް ނިންމުމަށް ކޯޓަށް ހާޒިރުކުރުމުން، އޭގެތެރެއިން 13 މީހުން ދޫކޮށްލީ ޝަރުތުތަކެއް ކުރުމަށް ފަހު ކަމަށެވެ. އަދި މިދިޔަ ހަފުތާ އާދީއްތަ ދުވަހު ، ބާކީ ތިބި ތިން މީހުން ކޯޓަށް ހާޒިރުކުރުމުން، ބަންދަށް އިތުރު 15 ދުވަސް ޖެހި ކަމަށް ވެސް ފުލުހުން ވަނީ ބުނެފައެވެ.

މި މާރާމާރީ ހިންގީ ގަލޮޅު ދަނޑުގައި އެދުވަހުގެ ހަވީރު ކުރިއަށް ދިޔަ ދެވަނަ ޑިވިޝަން ފުޓްބޯޅަ މުބާރާތުގެ މެޗެއްގެ ތެރެއިންނެވެ. މި މެޗުގައި ބައްދަލުކުރީ ކުޑަހެންވޭރު ޔުނައިޓެޑް އާއި ވިކްޓަރީ ސްޕޯޓްސް ކްލަބެވެ. 1-3 ނަތީޖާއަކުން ވިކްޓަރީ މެޗުގެ ލީޑުގައި އޮއްވާ، މެޗު ނިމެން ކައިރިވެފައިވަނިކޮށް މި ހަމަނުޖެހުން ފެށުނީ ވިކްޓަރީގެ ކޯޗު، ސޮބާހް މުހައްމަދު އިބްރާހިމަށް ހަމަލާއެއް ދިނުމުންނެވެ.

އޭގެ ފަހުން ކުޑަ ހެންވޭރުގެ ސަޕޯޓަރުންގެ ބަޔަކު ވަނީ ދަނޑު މައްޗަށް އަރައި ހަމަނުޖެހުން ހިންގާފަ އެވެ. އަދި ސޮބާހުގެ މޫނުމަތީ ގޮށްމުށުން ޖަހައި އޭނާގެ އަނގަމަތި ފަޅާލާފައި ވާއިރު، މީގެ އިތުރުންވެސް އޭނާއަށް ވަނީ އެކިވަރުގެ އަނިޔާ ލިބިފައެވެ.

މި ކަމުގެ ސަބަބުން މެޗުގެ ސެކިއުރިޓީ ބަލަހައްޓަން ތިބި ފުލުހުންގެ އިތުރުންވެސް ހަމަނުޖެހުން ހުއްޓުވުމަށް އިތުރު ފުލުހުންވެސް ވަނީ ސްޓޭޑިއަމަށް އައިސް ހަރަކާތްތެރިވެފައެވެ. އަދި މި ހަމަނުޖެހުމާއި އެކު މެޗު އިތުރަށް ކުރިއަށް ނުގެންގޮސް ވަނީ ހުއްޓާލާފައެވެ.