ރައްޔިތުންގެ މަޖިލީހުގެ އިންތިޚާބު ފަސް ކުރާ ގޮތަށް އިންތިޚާބުތަކާއި ބެހޭ ގާނޫނަށް ގެނެވުނު އިސްލާހު، ވަގުތުން ވަގުތައް ތަސްދީގު ކުރައްވަން ޖެހޭނެ ކަމަށާ، އެކަން ނުކޮށް ހުންނަވާ ހުންނެވުމަކީ ރައީސުލްޖުމުހޫރިއްޔާ ގާނޫނު އަސާސީއާއި ޚިލާފަށް ކުރައްވާ ކަމެއް ކަމަށް އިދިކޮޅު އެމްޑީޕީން ބުނެފިއެވެ.
އިންތިހާބު ފަސްކުރާ ބިލް މިހާރު އޮތް ގޮތުން ގާނޫނުއަސާސީގެ ބައެއް މާއްދާތަކާ ފުށު އަރާ ކަމަށް ބުނެ ރައީސް އެ ބިލު ތަސްދީގު ނުކުރައްވައި އަނބުރާ މަޖިލީހަށް ފޮނުވައިލެއްވުމުން، އިތުރު ބަދަލެއް ނުގެނެސް އަލުން ބިލް ފާސްކުރީ އިއްޔެއެވެ.
ގާނޫނުއަސާސީގެ 91 ވަނަ މާއްދާގެ ށ ގައި ބަޔާންކޮށްފައިވާ ގޮތުގައި ރައްޔިތުންގެ މަޖިލީހަށް ރައީސް އަނބުރާ ފޮނުވާ ބިލެއް އެއްވެސް ބަދަލެއް ނުގެނެސް މެންބަރުންގެ އަގުލަބިއްޔަތުން ފާސްކޮށްފި ނަމަ "އެ ބިލެއް ރައީސުލްޖުމްހޫރިއްޔާ ތަސްދީގުކޮށް، ސަރުކާރުގެ ގެޒެޓްގައި ޝާއިއުކުރާންވާނެ" އެވެ. އެހެންކަމުން މި ބިލް ތަސްދީގު ކުރަން ރައީސްއަށް މިހާރު މަޖުބޫރު ވާނެއެވެ.
އެކަމާއި ގުޅޭ ގޮތުން ވާހަކަ ދައްކަވަމުން، އެމްޑީޕީގެ "މިސްރާބު ހަަމަމަގަށް" ކެމްޕެއިން ތަރުޖަމާނު އަދި ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަޙުމަދު އީސަ ވިދާޅުވީ، އަނބުރާ ފޮނުވާލެވުނު ބިލި އަލުން އެގޮތަށް މަޖިލީހުން ފާސް ކުރުމުން މިހާރު އެ ގާނޫނަކަށް ވެފައިވާ ކަމަށެވެ. އަދި ބިލު ތަސްދީގު ކުރެއްވުމަށް އޭނާ ވަނީ ރައީސުލްޖުމްހޫރިއްޔާ ޑރ މުހައްމަދު މުޢިއްޒަށް ގޮވާލައްވާފައެވެ.
އަޅުގަނޑު ރައީސުލްޖުމުހޫރިއްޔާ އަށް ގޮވާލަން، އެ ބިލް ތަސްދީގު ކޮށް، އެ ގާނޫނަށް އަމަލުކުރެވޭނެ މަގުފަހި ކޮށްދިނުމަށް. މީގެ ކުރީގައި، މިފަދަ ހާލަތެއްގައި، ދިވެހިރާއްޖޭގެ ސްޕްރީމްކޯޓުން ވެސް ނިންމާފައި އެބައޮތް، އިންސާނީ ބާރު ނުފޯރާ، ގުދުރަތީ ކާރިސާއެއް ކުރިމަތިވެފައި އޮތް ހާލަތެއްގައި މެނުވީ، އެއްވެސް ލަސްކުރުމެއްނެތި ތަސްދީގު ކުރަން ވާނެ ކަމަށް. އެހެންވީމާ އަޅުގަނޑުމެން ގަބޫލު ކުރާ ގޮތުގައި، އެކަހަލަ އެއްވެސް ސަބަބެއްނެތި، އެ ތަސްދީގު ނުކޮށް، މަޑު ކުރައްވައިގެން ހުންނަވާ ހުންނެވުމަކީ ގާނޫނު އަސާސީއާ ޚިލާފްވުން. އަދި ހަމަ އެއާއެކު ރައްޔިތުންގެ މަޖިލީހަށް ލިބިގެންވާ ބާރުގެ މައްޗަށް ނުފޫޒް ފޯރުވުން.
އަހުމަދު ޢީސާ
ޢީސާ އިތުރަށް ވިދާޅުވީ، ރައީސުލްޖުމްހޫރިއްޔާ ޑރ މުހައްމަދު މުޢިއްޒު ކެންޕެއިންގެ ތެރެއިންވެސް އެންމެ ގިނައިން ވިދާޅުވި އެއް ބަސްފުޅަކީ ގާނޫނު އަސާސީއާއި ޚިލާފް ނުވާނެ ކަމަށް ވިދާޅުވަމުން ގެންދެވި ބަސްފުޅު ކަމަށެވެ. އެހެން ކަމުން، އެއާ އެއްގޮތަށް އަމަލުކޮށް އެ ބިލު ތަސްދީގު ކުރައްވަން އޭނާ ވަނީ އެދިވަޑައިގެންފަ އެވެ.
Advertisement
This content is created and paid for by advertisers and does not involve Voice Journalists
