ރައްޔިތުންގެ މަޖިލިސް އިންތިޚާބު ބާއްވާ ތާރީޚަށް ގެނައި ބަދަލާއެކު އިތުރު 560 މީހުންނަށް މި އިންތިޚާބުގައި ވޯޓުލުމުގެ ޙައްގު ލިބޭނެ ކަމަށް އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
މީގެ ކުރިން ރައްޔިތުންގެ މަޖިލީހުގެ އިންތިޚާބު ބާއްވާ ގޮތަށް އޮތީ މާރިޗު 17 ވަނަ ދުވަހު އެވެ. އެހެން ނަމަވެސް އިންތިޚާބާ ބެހޭ ގާނޫނަށް ގެނެވުނު އިސްލާހު، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ރޭ ތަސްދީގު ކުރެއްވުމާއިއެކު މިހާރު އިންތިޚާބު ބާއްވަން ހަމަޖެހިފައި ވަނީ އޭޕްރިލް މަހުގެ 21 ވަނަ ދުވަހުއެވެ.
އެކަމާއި ގުޅިގެން އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ކުރެއްވި ޕޯސްޓެއްގައި ވިދާޅުވީ މަޖިލިސް އިންތިޚާބުގެ ވޯޓުލުން ކުރިއަށްދާނީ އަންނަ މަހުގެ 21 ވަނަ ދުވަހުގެ ހެނދުނު 8:00ން ހަވީރު 4:00 އަށް ކަމަށެވެ. އަދި 4:30 ގެ ފަހުން ވޯޓު ގުނަން ފަށާނެ ކަމަށް ވެސް އޭނާ ވިދާޅުވިއެވެ.
މީގެ އިތުރުން މަޖިލިސް އިންތިޚާބުގެ ދާއިމީ ނަތީޖާ އަންނަ މަހުގެ 28 ވަނަ ދުވަހު އިއުލާން ކުރައްވާނެ ކަންވެސް އޭނާ ފާހަގަކުރެއްވިއެވެ.
ހަބީބު އިތުރަށް ވިދާޅުވީ ތާރީޚަށް ގެނައި ބަދަލާއެކު މަޖިލިސް އިންތިޚާބުގައި 560 މީހުންނަށް އަލަށް ވޯޓުލުމުގެ ޙައްގު ލިބޭނެ ކަމަށެވެ. އެހެންކަމުން މި އިންތިޚާބުގައި ވޯޓުލެވޭ މީހުންގެ އަދަދު 284،887 އަށް ވަނީ އަރާފައެވެ.
މިއާއެކު ހަބީބު ވިދާޅުވީ މަޖިލިސް އިންތިޚާބުގައި ވޯޓުލުމަށް ރީ-ރަޖިސްޓްރީ ކުރުމަށް ދެވަނަ ފުރުސަތެއް ވަރަށް އަވަހަށް ހުޅުވާލާނެ އެކަމަށް 3 ދުވަހުގެ މުއްދަތެއް ދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
