ވޯޓުލާ ދުވަހަކީ ސަރުކާރު ބަންދު ދުވަހެއްގެ ގޮތުގައި ކަނޑައަޅައި ދިނުމަށް ރައީސް އޮފީހުގައި ދެންނެވުމަށް އިލެކްޝަން ކޮމިޝަން (އީސީ) އިން ނިންމައިފިއެވެ.
މިކަމާއި ގުޅިގެން އިލެކްޝަން ކޮމިޝަން ގެ ނައިބު ރައީސް އިސްމާއިލް ހަބީބް ވިދާޅުވީ އިންތިހާބު ފަސްކުރާ ބިލު ރައީސް ޑރ.މުއިއްޒު ތަސްދީގުކުރެއްވީ މިދިޔަ މަހުގެ 29 ވަނަ ދުވަހުގެރޭގައި ކަމަށެވެ. އެއާއި ޖެހިގެން ދެން އޮތީ ސަރުކާރު ބަންދު ދެދުވަސް ކަމަށްވާތީ، ދެން އެންމެ އަވަހަށް އަންނަ ރަސްމީ ދުވަހު، ވޯޓުލާ ދުވަސް ސަރުކާރު ބަންދު ދުވަހެއްގެ ގޮތުގައި ކަނޑައަޅައި ދިނުމަށް ރައީސް އޮފީހުގައި އެދުމަށް މާކުރިންވެސް ނިންމާފައިވާކަމަށް ވެސް ހަބީބު ވިދާޅުވިއެވެ.
މިދިޔަ ރިޔާސީ އިންތިހާބުގައި ވެސް ވޯޓުލާ ދުވަހާއި ދެން އަންނަ ދެ ދުވަސް ވެސް ބަންދުކުރި ކަން ފާހަގަކުރައްވާ ހަބީބު ވިދާޅުވީ މިފަދައިން އަމަލު ކުރުމަށް ނިންމީ ވޯޓުލާ މަރުކަޒުތަކުގެ ގޮތުގައި ގިނައިން ބޭނުންކުރަނީ ސުކޫލުތަކަށް ވުމުގެ އިތުރުން، ވޯޓުލާ މަރުކަޒުތަކުގައި އޮފިޝަލުންގެ ގޮތުގައި ގިނައިން ހަރަކާތްތެރިވަނީ ޓީޗަރުން ކަމަށްވުމުންކަމަށެވެ.
ރަމަޟާން މަސް ނިމޭތާ 10 ދުވަސް ފަހުން މަޖިލިސް އިންތިޚާބު ބާއްވާގޮތަށް މަޖިލީހުން ފާސްކުރި ބިލް، ރައީސް ތަސްދީގުކުރެއްވުމާއެކު އީސީން ނިންމީ އިންތިހާބު އޭޕްރިލް މަހުގެ 21 ވަނަ ދުވަހު ބޭއްވުމަށެވެ. އެއީ އާދިއްތަ ދުވަހަކަށްވީ ނަމަވެސް މިފަދައިން އީސީން ނިންމީ އެއަށްވުރެ އިންތިޚާބު ލަސްކޮށްފިނަމަ، ގާނޫނުގައިވާ ގޮތަށް މިހާރު އޮތް މަޖިލިސް އުވުމުގެ އެއް މަސް ދުވަސް ކުރިން އާ މަޖިލިސް ނުހޮވިދާނެތީ ކަމަށް އިލެކްޝަންސް ކޮމިޝަންގެ ރައީސް ފުވާދު ތައުފީގް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
