އެކި އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރެއިން، 103 ކިލޯއަށްވުރެ ގިނަ މަސްތުވާތަކެތި މިއަދު ނައްތާލައިފިއެވެ.

958 މައްސަލައާއި 197 އިންސިޑެންޓުގައި ހިމެނޭ 3121 އެވިޑެންސް ނައްތާލާފައިވަނީ ދޫނިދޫގައެވެ. އޭގެތެރޭގައި، މަސްތުވާތަކެތި ހުރި 8293 ރަބަރު ޕެކެޓު، 2731 ސެލޯފިންކޮޅު، ފިލްމުހުސްކުރި 237 ދަޅު، 585 ބުލެޓު އަދި 30 ބިޑި، 537 މަނާ ބޭސްގުޅައިގެ އިތުރުން އެހެނިހެން ތަކެތީގެ ގޮތުގައި 3045 އައިޓަމެއް ވަނީ ނައްތާލާފައެވެ.

މިއަދު ފުލުހުން ނައްތާލި މި ތަކެތީގެ މަގުމަތީ އަގު 425،590،234.92 ރުފިޔާ އަށް އަރާކަމަށް ފުލުހުން މައުލޫމާތު ދެއެވެ.

މި ތަކެތި ނައްތާލީ ފުލުހުންގެ ބެލުމުގެ ދަށަށް ގެނެވޭ މަސްތުވާތަކެއްޗާއި މަސްތުވާތަކެތީގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލާފައިވާ ކޮމިޓީގެ ބެލުމުގެ ދަށުންނެވެ. މި ހަރަކާތުގައި، ދާޚީލި ސަލާމަތާއި ފަންނިއްޔަތާބެހޭ ވަޒީރު ޢަލީ އިޙްސާން އާއި ކޮމިޝަނަރ އޮފް ޕޮލިސް ޢަލީ ޝުޖާއު އާއި ޑެޕިއުޓީ ކޮމިޝަނަރ އޮފް ފަރުހާދު ފިކުރީ އަދި ފުލުހުންގެ އެގްޒެކެޓިވް ބައެއް އޮފިސަރުންނާއި ކޮމިޝަންޑު ބައެއް އޮފިސަރުން ބައިވެލިވެލެއްވިއެވެ.

މީގެ އިތުރުންވެސް، ނޫސްވެރިންނާއި، މިދިޔަ މަހުގެ 29 ވަނަ ދުވަހު، ފުލުހުންގެ ބެލުމުގެ ދަށަށް ގެންނަ މަސްތުވާތަކެތި ނައްތާލުމުގައި އޮބްޒާވަރުންގެ ގޮތުގައި އާންމު ރައްޔިތުންނަށް ބައިވެރިވުމަށް ހުޅުވާލި ފުރުސަތުގައި، ނަންނޯޓު ކުރި އާންމު ރައްޔިތުން ވެސް ވަނީ މި ހަރަކާތުގައި ބައިވެރިވެފައެވެ.