ކުރިއަށް އޮތް ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވާ ދުވަސް ބަންދުކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިފަދައިން ވިދާޅުވީ މިހާރު ރައީސް ޑރ.މުއިއްޒު ރ އަތޮޅާއި ބ އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން ރ.ދުވާފަރަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަފުޅުގެ ތެރެއިންނެވެ. މިގޮތުން މަޖިލީހުގެ ތާރީޚާއި ގުޅޭ ގޮތުން ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، އެޕްރީލް 21 ގައި އިންތިޚާބު ބާއްވާކަން އެ މަނިކުފާނަށް ވެސް އެނގިވަޑައިގަތީ ނޫސްތަކުން ކަމަށެވެ. އެއީ ދުވަހަކު ވެސް ރާއްޖޭގައި ހެދި ގޮތެއް ނޫންކަމަށާއި، އެއާއި އެކު އެ ދުވަހު ބާއްވަން ނިންމީ ކީއްވެތޯ އެމަނިކުފާނު އިލެކްޝަން ކޮމިޝަނުން ސާފުކުރެއްވި ކަމަށް ވެސް ވިދާޅުވިއެވެ.

ރޯދަ މަހަށް ފަހު 10 ދުވަސް ފަހުން އިންތިހާބު ބޭއްވުމަށް މަޖިލީހުން ފާސްކުރި ބިލު ރައީސް ޑރ.މުއިއްޒު ތަސްދީގު ކުރެއްވީ، މިދިޔަ މަހުގެ 29 ވަނަ ދުވަހުގެ ރޭގައެވެ. އެއާއި އެކު އީސީން ނިންމީ އިންތިހާބު އޭޕްރިލް މަހުގެ 21 ވަނަ ދުވަހު ބޭއްވުމަށެވެ.  

މިކަމާއި ގުޅިގެން އިދިކޮޅު އެމްޑީޕީގެ އެޑްވައިޒަރު، ކުރީގެ ރައީސް އިބްރާހީމް މުޙައްމަދު ޞާލިހު ވަނީ މަޖިލިސް އިންތިޚާބު ސަރުކާރު ބަންދުނޫން ދުވަހެއްގައި ބާއްވަން އީސީން ނިންމީ ރައީސްގެ ނުފޫޒާއެކު ކަމަށް ތުހުމަތުކުރައްވައިފައެވެ. މި ތުހުމަތުތަކަށް ރައްދު ދެއްވަމުން ރައީސް ޑރ.މުއިއްޒު ވިދާޅުވީ، ބަންދު ނޫން ދުވަހަކު އިންތިހާބު ބާއްވަން ނިންމެވީ ރައްޔިތުން ވޯޓް ލިޔަ ނުދޭން ކަމަށާއި، އެ ދުވަސް ބަންދު ކުރުމަށް ގަސްތު ނުކުރާ ކަމަށްބުނެ އިދިކޮޅުން ފަތުރަނީ ދޮގު ވާހަކަ ކަމަށާއި އެ މަނިކުފާނަކީ އިތުރުފުޅު ހައްދަވާނެ ބޭފުޅެއް ނޫންކަމަށެވެ.

ރައީސް ޑރ.މުއިއްޒު މިފަދައިން ނިންމަވާފައިވާއިރު، މިއަދު އީސީން ވެސް ވަނީ ވޯޓުލާ ދުވަހަކީ ސަރުކާރު ބަންދު ދުވަހެއްގެ ގޮތުގައި ކަނޑައަޅައި ދިނުމަށް ރައީސް އޮފީހުގައި ދެންނެވުމަށް ނިންމާފައެވެ.

އީސީން  މިފަދައިން ނިންމީ  ވޯޓުލާ މަރުކަޒުތަކުގެ ގޮތުގައި ގިނައިން ބޭނުންކުރަނީ ސުކޫލުތަކަށް ވުމުގެ އިތުރުން، ވޯޓުލާ މަރުކަޒުތަކުގައި އޮފިޝަލުންގެ ގޮތުގައި ގިނައިން ހަރަކާތްތެރިވަނީ ޓީޗަރުން ކަމަށްވުމުންކަމަށް އެ ކޮމިޝަނުގެ ނައިބު ރައީސް އިސްމާއިލް ހަބީބް ވަނީ ވިދާޅުވެފައެވެ.

އިންތިހާބު ބާއްވަން އީސީން ނިންމި ދުވަހަކީ އާދިއްތަ ދުވަހަކަށްވީ ނަމަވެސް މިފަދައިން ނިންމީ އެއަށްވުރެ އިންތިޚާބު ލަސްކޮށްފިނަމަ، ގާނޫނުގައިވާ ގޮތަށް މިހާރު އޮތް މަޖިލިސް އުވުމުގެ އެއް މަސް ދުވަސް ކުރިން އާ މަޖިލިސް ނުހޮވިދާނެތީ ކަމަށް  އިލެކްޝަންސް ކޮމިޝަންގެ ރައީސް ފުވާދު ތައުފީގް ވަނީ ވިދާޅުވެފައެވެ.