އިންޑިއާ އަކީ ބުލީ ކުރާ ބަޔަކު ނަމަ އަވައްޓެރި ޤައުމަކަށް ހާލު ޖެހުމުން 4.5 ބިލިއަން އެމެރިކާ ޑޮލަރުގެ އެހީއެއް ފޯރުކޮށް ނުދޭނެ ކަމަށް އިންޑިއާގެ އެކްސްޓާރނަލް އެފަރޒް މިނިސްޓަރު ސުބްރަމާނިއަމް ޖައިޝަންކަރު ވިދާޅުވެއްޖެއެވެ.

ރާއްޖެ ކުޑަވި ނަމަވެސް އެއީ ރާއްޖެއަށް ބުލީ ކުރުމަށް ދެވޭ ލައިސަންސެއް ނޫން ކަމަށް ވިދާޅުވެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްކެވި ވާހަކަފުޅާއި ގުޅިގެން އިންޑިއާގެ ނޫސްތަކުން ވަނީ ޖައިޝަންކަރާއި މިކަމާއި ގުޅޭ ގޮތުން ސުވާލު އަމާޒު ކުރައްވާފައެވެ.

އިންޑިއާގެ ވެރިރަށް ނިއުދިއްލީގައި އޮތް ހަފްލާއެއްގައި ނޫސްވެރިންގެ ފަރާތުން ކުރި މިސުވާލަށް ޖަވާބު ދެއްވަމުން ޖައިޝަންކަރު ވިދާޅުވީ، އިންޑިއާ ސިފަވެފައި އޮންނަނީ ވަރަށް ބޮޑަށް ނުލީ ކުރާ ގައުމެއްގެ ގޮތުގައި ކަމަށާއި، މިފަދައިން ބުލީ ކުރާ ބަޔަކު އަވައްޓެރި ޤައުމަކަށް ހާލު ޖެހުމުން 4.5 ބިލިއަން އެމެރިކާ ޑޮލަރުގެ އެހީއެއް ފޯރުކޮށް ނުދޭނެ ކަމަށެވެ. އަދި އެފަދަ ބަޔަކު ކޮވިޑް ގެ ބަލިމަޑު ކަމުގެ ތެރޭގައި ވެކްސިންގެ އެހީތެރިކަން ވެސް ފޯރުކޮށްނުދޭނެ ކަމަށާއި، ދުނިޔޭގައި ހިނގަމުން އަންނަ ހަނގުރާމައަކާ ގުޅިގެން އަަވަށްޓެރި ގައުމަކަށް ޚާއްސަ އުސޫލެއްގެ ދަށުން ކާބޯތަކެއްޗާއި އެ ނޫން އެހެނިހެން އެހީތައް ފޯރުނުކޮށްދޭނެ ކަމަށް ވެސް އޭާ ވިދާޅުވިއެވެ.

އިންޑިއާއިން އަވައްޓެރި އެހެން ގައުމުތަކަށް ވެދީފައިވާ އެހީތަކުގެ މައްޗަށް އަލިއަޅުއްވާލައްވަމުން ޖައިޝަންކަރު ވިދާޅުވީ، ބަންގްލަދޭޝާއި، ނޭޕާލާއި، ސްރީލަންކާއާއި ބޫޓާނާއި އިންޑިއާ ދެމެދު އޮތް ގުޅުން ބަދަހިވަމުން އަންނަކަމަށާއި، މައްސަލަ ޖެހިފައިވަނީ އެންމެ ގައުމަކާ އެކުގައިކަން ވަރަށް ރަނގަަޅަށް ހާމަވާކަމަށެވެ.

މީގެ ކުރިން، ރައީސް ޑރ.މުއިއްޒު ޗައިނާއަށް ކުރެއްވި ފުރަމާނަ ދަތުރުފުޅަށްފަހު އެނބުރި ރާއްޖެ ވަޑައިގެން އެއާޕޯޓުގައި ހުންނަވައި ދެއްކެވި ވާހަކަފުޅުގައި ވަނީ ރާއްޖެ ކުޑަވުމަކީ ބޭރުގެ ބޮޑެތި ގައުމުތަކުން ބުލީކުރަން ލިބޭ ލައިސަންސެއް ނޫން ކަމަށް ވިދާޅުވެފައެވެ. އަދި އިންޑިއާ ކަނޑަކީވެސް ވަކި ޤައުމެއްގެ ކަނޑެއް ނޫންކަމަށް ވިދާޅުވެ އެ ދުވަހު ރައީސް ޑރ.މުއިއްޒު ވަނީ ރާއްޖެއަކީ ވަކި ގައުމެއްގެ "ބެކްޔާޑު" ގައި އޮތް ގައުމެއް ނޫންކަމަށް ވެސް ވިދާޅުވެފައެވެ.