ބާރު ސްޕީޑެއްގައި ދުއްވާފައި ދަނިކޮށް ޕާކުކޮށްފައި އޮތް ވޭނެއްގައި ސައިކަލެއް ޖެހި ރޭ ދަންވަރުގެ ވަގުތެއްގައި ހިނގި އެކްސިޑެންޓުގައި އަނިޔާވި މީހާގެ ހާލު ސީރިއަސް ކަމަށް ޓްރީޓޮޕް ހޮސްޕިޓަލުން ހާމަކޮށްފިއެވެ.
މި އެކްސިޑެންޓްގައި އަނިޔާވި 19 އަހަރުގެ މީހާގެ ހާލު ސީރިއަސް ކަމަށް ޓްރީޓޮޕް ހޮސްޕިޓަލުން ބުނި ނަމަވެސް އޭނާއަށް ލިބިފައިވަނީ ކިހާވަރެއްގެ އަނިޔާއެއްކަމެއް ހޮސްޕިޓަލުން ހާމަކޮށްފައެއް ނުވެއެވެ.
ފުލުހުން ބުނީ މި އެކްސިޑެންޓް ހިނގާފައިވަނީ ހުޅުމާލޭ ފޭސް 1 ގެ ގުލްއަލާމާ ހިންގުމުން ހުޅަނގުން އިރަށް ބާރު ސްޕީޑެއްގައި ދުއްވާފައި ދިޔަ ސައިކަލެއް ކޮންޓްރޯލް ނުވެ ގޮސް ޑިޓެންޝަން ސެންޓަރ ކުރިމަތީގައި ޕާކުކޮށްފައި އޮތް ވޭނެއްގައި ޖެހުމުން ކަމަށެވެ. ސައިކަލް ދުއްވަން އިން މީހާއަށް އަނިޔާވެފައިވާއިރު ސައިކަލް ވެސް ބޭނުން ނުކުރެވޭ ވަރަށް ހަލާކުވެފައި ކަމަށާއި، މި އެކްސިޑެންޓްގައި ވޭން އަށް ވެސް ބޮޑެތި ގެއްލުންތަކެއް ވެފައިވާކަމަށް ފުލުހުން ވަނީ ބުނެފައެވެ.
މި އެކްސިޑެންޓުވެފައި ވަނިކޮށް ފެނުނީ ރޭ ދަންވަރު 2:30 ހާއިރު ޕެޓްރޯލްކުރަމުންދިޔަ ފުލުހުންނަށް ކަމަށާއި މި ހާދިސާ ފުލުހުން އިތުރަށް ތަހްގީގު ކުރަމުން އަންނަ ކަމަށް ބުނެއެވެ.
Advertisement
This content is created and paid for by advertisers and does not involve Voice Journalists
