ރައްޔިތުން މަޖިލީހުގެ މިއަދުގެ ޖަލްސާއަށް ކޯރަމް ހަމަނުވެގެން ޖަލްސާ ނުބޭއްވި މެދުކަނޑާލައިފިއެވެ.
މަޖިލީހުގެ ރައީސް މުހައްމަދު އަސްލަމާއި ނައިބު ރައީސް އަހުމަދު ސަލީމް ވެސް ރަށުގައި ވަޑައިގެން ނޫޅުއްވާތީ މިއަދުގެ ޖަލްސާގެ ރިޔާސަތު ބަލަހައްޓަވާނީ ހަނިމާދޫ ދާއިރާގެ އެމްޑީޕީ މެމްބަރު އަބްދުލް ގަފޫރު މޫސާ ކަމަށް މިއަދުގެ ޖަލްސާ ފެށުމުގެ ކުރީގައި މަޖިލީހުގެ އަމީންއާންމު ފާތިމަތު ނިޔުޝާ ވަނީ ވިދާޅުވެފައެވެ.
އެހެންނަމަވެސް، މިއަދުގެ 9 ޖަހާއިރު ފަށަން އޮތް ޖަލްސާ އަށް ކޯރަމް ހަމަނުވާތީ ގަފޫރު ވަނީ ޖަލްސާ ފެށުން 09:30 އަށް ފަސްކޮށްފައެވެ. މިއީ މި ހަފްތާގައި ބޭއްވި ފުރަތަމަ ޖަލްސާ ނަމަވެސް މިއަދުގެ ޖަލްސާއަށް ހާޒިރުވީ އެންމެ 11 މެންބަރުންނެވެ.
އެންމެ ފަހުން 9:30 ގައި ފެށިއިރު ވެސް ޖަލްސާ ފަށަން ބޭނުންވާ ގާނޫނީ އަދަދަށް މެންބަރުން ހަމަވެފައި ނުވާތީ، ގަފޫރު ވިދާޅުވީ ޖަލްސާ ބޭއްވެން ނެތް ކަމަށާއި ދެން ޖަލްސާއެއް ބޭއްވޭނެ ތާރީޚެއް ފަހުން އިއުލާނުކުރައްވާނެ ކަމަށެވެ.
ގާނޫނުއަސާސީ ބުނާ ގޮތުން މަޖިލީހުގެ ޖަލްސާ ފެށޭނީ 22 މެންބަރުން ތިބެގެންނެވެ.
މިއަދު މަޖިލީހުގެ ޖަލްސާގެ އެޖެންޑާ ގައި ސަރުކާރުގެ ފަރާތުން ހުށަހަޅާފައިވާ ދަތުރު ރާވައި ހިންގުމުގެ ޚިދުމަތް ދިނުމާބެހޭ ބިލާއި ރިއަލް އެސްޓޭޓް ވިޔަފާރީގެ ފުރަތަމަ ކިޔުން ހިމެނެއެވެ. އަދި ރާއްޖޭގެ ހާރިޖީ ސިޔާސަތު ހަރުދަނާ ކުރުމަށް ގޮވާލާ ހުޅާހަޅާފައިވާ ގަރާރަށް މިއަދު ގެ ޖަލްސާގައި ބަހުސް ކުރުމަށް ވެސް އޮތީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
