ހުޅުމާލެ ފޭސް 2 ގައި ބިނާކުރެވޭ ފުރަތަމަ ދާއިމީ މިސްކިތް، މަސްޖިދު ޙަސަން އާދަމް އަންނަ ހުކުރު ދުވަހު ހުޅުވިގެންދާނެ ކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އެކްސް ގައި ކުރެއްވި ޕޯސްޓެއްގައި މިނިސްޓަރު ޝަހީމް ވިދާޅުވީ، މި މިސްކިތަކީ 1500 މީހުންނަށް އެއް ފަހަރާ ނަމާދު ކުރެވޭވަރުގެ ބޮޑު މިސްކިތެއް ކަމަށާއި، މި މިސްކިތުގެ ސަބަބުން ކުރިއަށް އޮތް ރޯދަ މަހަށް ފޭސް 2 ގެ ރައްޔިތުންނަށް ވަރަށް ބޮޑު ފަސޭހައެއް ލިބިގެންދާނެ ކަމަށެވެ.

މުނި އެންޓަޕަރައިސަސް ޕްރައިވެޓް ލިމިޓެޑުން ޚަރަދުކޮށްގެން އިމާރާތްކޮށްފައިވާ މި މިސްކިތުގެ ހަރިންމައިގައި 19،341.13 އަކަފޫޓު ހުންނައިރު، ނަމާދުކުރާބައިގައި 16،388.38 އަކަފޫޓު ހުރެއެވެ.

މިއީ އަމިއްލަ ފަރާތްތަކުން އަޅަމުންދާ 5 މިސްކިތެއްގެ ތެރެއިން އެއް މިސްކިތަށް ވާއިރު، މީގެ ކުރިން މިނިސްޓަރު ޝަހީމް ވަނީ އަމިއްލަ ފަރާތްތަކެއްގަ ދީލަތި އެހީގައި ހުޅުމާލެގައި އިތުރު 2 މިސްކިތް، މާލެގައި ތިންބުރީގެ 1 މިސްކިތް އެޅުމަށް ފުރުސަތު ލިބިފައިވާކަމަށާއި ކުރިއަށް އޮތް ދޮޅުއަހަރު ތެރޭ އެ ތަންތަނުގެ މަސައްކަތް ނިމޭނެކަމަށް ވިދާޅުވެފައެވެ.

މި މިސްކިތްތަކަށް އިމާމުންނަށް ހަމަޖައްސާނީ ދެވަނަ ފޭސްގައި ދިރިއުޅޭ މީހުންގެ ތެރެއިން ރީތިކޮށް ކިޔަވާ އިލްމީ ފަރާތްތައް ކަަމަށާއި އޭގެތެރެއިން ހާއްޞަކޮށް ޙާފިޒުންނަށް އިސްކަން ދެވޭނެ ކަމަށެވެ. އަދި މި ރަމަޟާން މަހު ފޭސް ދޭއްގައި ހުޅުވޭ ދާއިމީ މިސްކިތުގައި ދަމު ނަމާދު ކުރުމަށް ހަމަޖެހިފައިވާކަމަށް ވެސް ވިދާޅުވިއެވެ.

ރާއްޖޭގެ އެކި ކަންކޮޅުތަކުގައި މިސްކިތް ބިނާކުރަން ބޭނުންވާ ފަރާތްތަކަށް މިދިޔަ ޑިސެމްބަރުގައި މިނިސްޓްރީން ވަނީ އެ ފުރުސަތު ހުޅުވައިލައިފައިވާއިރު، މިސްކިތްތަކުގެ އާބާތުރަ ފިލުވައި، ރީތިކޮށް ބެލެހެއްޓުމަށް ޓަކައި ކޮންމެ އަހަރަކު ދައުލަތުގެ ބަޖެޓުން އެކަމަށް ކުރެވޭ ޚަރަދު މިހާރަށްވުރެ ތިންގުނައަށް އިތުރުކުރަން ސަރުކާރުން ނިންމާފައިވާކަން ފާހަގަކޮށްލެވެއެވެ.