މިދިޔަ 2 މަސް ދުވަސްތެރޭ އެކަނިވެސް މާލެ އާއި ހުޅުމާލޭގައި 600 އެކްސިޑެންޓް ހިނގާފައިވާ ކަމަށް ދިވެހި ފުލުހުންގެ ހިދުމަތުން އާންމުކޮށްފިއެވެ.
ފުލުހުން މިކަން އާންމުކޮށްފައި މިވަނީ އެއިދާރާއިން ބޭއްވި ނޫސްވެރިންގެ ބައްދަލުމެއްގެ ތެރެއިންނެވެ.
މި ބައްދަލުވުމުގައި ވާހަކަފުޅު ދައްކަވަމުން، މާލޭ އޭރިއާ 1 ގެ ވިންގް ހެޑް، ޗީފް ސުޕްރިންޓެންޑެންޓް އޮފް ޕޮލިސް ޙުސައިން ސަމީރު ވިދާޅުވީ މިދިޔަ 2 މަސް ދުވަހުގެ ތެރޭ މާލެއިން އެކްސިޑެންޓުވެގެން 450 މައްސަލަ ހުށައަޅާފައިވާ ކަމަށާއި، އެކްސިޑެންޓް ހިނގަން މެދުވެރިވެފައިވަނީ ޤަވާއިދާ ޚިލާފަށް އޯވަރޓޭކްކުރުމާއި ބުރިޖާއި ހައިވޭގައި ޒިގްޒެގްކޮށް ދުއްވުންކަމަށެވެ.
މީގެ އިތުރުންވެސް ބާރު ސްޕީޑުގައި ދުއްވުމަށް ކަނޑައަޅާފައިވާ ލޭން ނޫން އެހެން ލޭނަކުން ދުއްވުމުން އަނެކާއަށް ލިބޭ ސިހުމަކުން ހިނގާ އެކްސިޑެންޓުތަކާއި، އޯވަރޓޭކްކުރާއިރު ފަރުވާކުޑަކުރުމާއި ތާރު އަޅާފައިވާ މަގުތަކުން ޔޫޓާން ނެގުމުގެ ސަބަބުން ވެސް އެކްސިޑެންޓް ހިނގާފައި ހުރިކަން ސަމީރު ފާހަގަކުރެއްވިއެވެ.
"ޤަވައިދާ ޚިލާފަށް އުޅަނދު މަގުގައި ޕާކުކޮށްފައި އޮތުމުން ދުއްވާ އުޅަނދަށް ފެންނަންވާ ވަރަށް މަގު ސާފުކޮށް ފެންނަން ނެތުމުގެ ސަބަބުން ވެސް އެކިސްޑެންޓް ހިނގަން މެދުވެރިވާކަން، ހިނގާފައިވާ އެކްސިޑެންޓުތަކުން ފާހަގަވޭ."
ސަމީރު ވިދާޅުވިއެވެ.
ސަމީރުގެ އިތުރުންވެސް، މިކަމާއި ގުޅޭގޮތުން ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު ވަނީ ހުޅުމާލޭގައި ކަންބޮޑުވާ ދަރަޖައަށް އެކްސިޑެންޓް ހިނގާފައިވާ ކަމަށާއި ހާއްސަކޮށް، ހުޅުމާލޭގެ ބޮޑެތި މަގުތައް ކަމަށްވާ ނިރޮޅު މަގާއި ހިތިގަސް މަގާއި ރީތިގަސް މަގުގައި އެކްސިޑެންޓު ހިނގާ މިންވަރު އިތުރުވެފައިވާކަމަށް ވިދާޅުވެފައެވެ.
އެގޮތުން، މާލެ އޭރިއާ 2ގެ ޕޮލިސް ސްޓޭޝަނަށް ހުޅުމާލޭގެ ދެ ފިޔަވައްސާއި ހުޅުލެ ހިމެނޭހެން އެކްސިޑެންޓްގެ ގާތްގަނޑަކަށް 150 މައްސަލަ ހުށައަޅާފައިވާ ކަމަށާއި މި އެކްސިޑެންޓްތައް މައިގަނޑު ގޮތެއްގައި ހިނގަން މެދުވެރިވާ ސަބަބެއްގެ ގޮތުގައި ފާހަގަކުރެވިފައިވަނީ ހިނގާބިގާވެ އުޅޭއިރު ސަމާލުނުވުމާއި ދުއްވާ ފަރާތްތަކުން މަގުމަތީގެ ޤަވާއިދުތަކަށް ހުރުމަތްތެރިކޮށް ނުހިތުން ކަމަށް ޝުއައިބު ވިދާޅުވިއެވެ.
"އަޅުގަނޑުމެންނަށް ރިޕޯޓުކޮށްފައިވާ އެސިޑެންޓުތަކުގައި ނުރައްކާތެރި އެކްސިޑެންޓްތައް ހިނގާފައިވޭ. މީހުންނަށް ޖިސްމާނީ ބޮޑެތި އަނިޔާ ލިބި ފުރާނައަށް ނުރައްކާވާ ފަދަ އެކްސިޑެންޓްތައް ހިނގާފައިވުމުން މިހާރުވެސް ބައެއް މީހުންނަށް ހޮސްޕިޓަލުގައި އެޑްމިޓުކޮށް، ދަނީ ފަރުވާދެމުން."
ޝުއައިބު ވިދާޅުވިއެވެ.
މިފަދަ އެކްސިޑެންޓް ތައް މަދުކުރުމަށް ފުލުހުން އެޅުމަށް ނިންމާފައިވާ ފިޔަވަޅުތަކަށް މި ބައްދަލުވުމުގައި އަލި އަޅުވާލާފައިވާއިރު، އޭގެ ތެރޭގައި، އެކްސިޑެންޓްތައް ޢާންމުކޮށް ހިނގާ ބައެއް ޕޮއިންޓުތަކުގައި ރޯޑް ޑިވައިޑަރ ޖެހުމާއި ޓްރެފިކް ކޮންޓްރޯލްކުރުމަށްޓަކައި ރައުންޑްބައުޓް ބެހެއްޓުމާއި ސްޕީޑް ބްރޭކަރުތައް ބެހެއްޓުން ހިމެނެއެވެ. މި މަސައްކަތްތައް ކަމާ ގުޅުންހުރި ސަރުކާރުގެ އިދާރާތަކާ ގުޅިގެން ކުރަމުން އަންނަކަމަށް ޕޮލިސް ރަޖުނީ ޝުއައިބު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
